Drew Nacino

Inalok ni Senador Imee Marcos ng total amnesty ang mga rebelde at makakaliwang grupo na naglunsad noon ng kudeta laban sa administrasyon ng amang si dating Pangulong Ferdinand Marcos Sr.

Ito’y matapos humingi ng paumanhin sa kanya ang mga dating miyembro ng Communist Party of the Philippines-New People’s Army-National Democratic Front sa paggunita sa 50^th Anniversary ng deklarasyon ng Martial Law noong Martes.

Aminado ang nakababatang Marcos na ginawa nito ang nasabing hakbang dahil matagal na niyang gustong makawala sa panahon na ang kanilang pangalan ay pilit umanong sinisira ng salitang batas militar.

Ang alok ng Senador ay ginawa kahit hindi pa man natatalakay sa kanyang kapatid na si Pangulong Ferdinand “Bongbong” Marcos Jr., na kasalukuyang nasa Estados Unidos.

Kampante naman ang mambabatas na makukumbinsi niya si PBBM sa pagkakaloob ng total amnesty sa mga dating nag-aklas laban sa kanilang ama dahil kahit noong buhay pa anya ito ay nagbigay din noon ng amnestiya. —ulat mula kay Cely O. Bueno (Patrol 19)

Tinitingnan na ng Pilipinas ang posibleng investments mula sa American Companies sa pagtatayo ng mga small modular nuclear power plant sa ilang piling lugar sa bansa.

Ito ang kinumpirma ni Trade secretary Alfredo Pascual matapos ang Philippine Economic Briefing sa New York, na dinaluhan nina Pangulong Ferdinand “Bongbong” Marcos Jr., at mga opisyal ng tatlong kumpanyang maaaring mamuhunan sa modular nuclear power plants.

Ayon kay Pascual, kabilang sa mga nakausap ni Pangulong Marcos ang US-based Nuscale Power Company.

Tinatanya pa anya nila ang posibilidad na maaaring ilagay ang isang modular reactor sa isa sa mga Isla, Tulad sa Palawan.

Aminado naman ang Kalihim na nakikipag-usap din sila sa iba pang kumpanya na hindi lamang gumagawa ng modular reactors, kundi maging ng mas malalaking Nuclear Power Plant.

Sumampa na sa 13 ang patay sa Acute Gastroenteritis sa Iloilo City.

Ayon sa datos na inilabas ng City Epidemiology and Surveillance Unit (CESU) nitong Martes.

Mula July 26 hanggang Sept. 20, umabot na sa 637 ang kaso ng Acute Gastroenteritis at Cholera sa lungsod, kabilang ang 19 na mga bago at 30 na aktibo.

Nakatakdang magbibigay ng Bakuna kontra Cholera at Gastroenteritis ang Iloilo City Health Office sa mga Barangay sa Lungsod na mataas ang kaso ng waterborne diseases.

Para magbigay ng tulong sa mga nagkakasakit ng Acute Gastroenteritis at Cholera sa Lungsod, inilunsad ng Regional Finance Service Office ng Police Regional Office 6 (PRO-6) ang “Strengthening Barangay and Police Partnership against Cholera.”

Nakatanggap ng food packs, vitamins, at gamot mula sa RFSO 6 ang mga nagkasakit na residente sa Barangay Zamora Melliza.

Ang Barangay Zamora Melliza ay nangunguna sa may pinakamaraming naitalang kaso ng Acute Gastroenteritis at Cholera sa lungsod.

Maaaring mag-apply ng panibagong fare matrix ang mga driver at operator ng mga Public Utility Vehicles bilang requirement sa dagdag-pasahe simula Oktubre a –3.

Nilinaw ni LTFRB board member, Atty. Mercy Jane Paras-Leynes na kailangang nakapaskil ang fare matrix ng sa mga PUV bago maningil ng mas mahal na pasahe.

Hinimok naman ng LTFRB official ang mga mananakay na isumbong ang mga tsuper na magpapatupad agad ng fare increase bago mag-Oktubre a –3.

Maaari anyang tumawag sa LTFRB 24/7 hotline 1342 o magpadala ng mensahe sa LTFRB official facebook page o bumisita sa official website ng ahensya.

Aminado naman si Leynes na napakahirap i-balanse ang interes ng mga operator o driver at commuter pero pinipilit ng ahensya na magkaroon ng rasonableng pasahe na patas para sa lahat.

Sa desisyon ng LTFRB, magiging P12 na ang minimum fare sa traditional jeep mula sa kasalukuyang onse habang P14 sa modern jeepney.

Dalawang chinese na sangkot sa pagdukot sa kanilang kapwa tsino ang natimbog ng mga otoridad sa Mandaue City, Cebu.

Kinilala ang mga suspek na sina Lin Tuanjie, 50 anyos, residente ng Aldea Del Sol Subdivision sa Barangay Bankal at Ji Chenglong, 33- anyos, ng Bestwater Subdivision, Barangay Marigondon.

Inaresto sina Lin at Ji sa bisa ng warrants na inilabas ni Judge Annie Marie Militante ng Regional Trial Court 7 Branch 53 ng Lapu-Lapu City sa mga kasong Kidnapping at Serious Illegal Detention.

Nasakote ng Anti-Kidnapping Group Visayas Field Unit sa pangunguna ni Lt. Zozimo Ravanes Jr., si Lin sa restaurant nito sa Sitio Soong 1, Barangay Mactan habang dinampot si Ji hindi kalayuan sa Lapu-Lapu City.

Ang mga naturang dayuhan ang itinuturong kasabwat ng apat na iba pang tsino na napatay sa isang police operation upang mailigtas ang chinese businessman na si Lyu Xingou, sa Barangay Lahug, Lapu-Lapu City noong Mayo a-30.

Niyanig ng magkasunod na lindol na may kaparehong lakas ang lalawigan ng Quezon, kagabi.

Alas 10:24 nang tumama ang magnitude 4.4 at natunton ng PHIVOLCS ang sentro nito 15 kilometro, timog-silangan ng bayan ng real.

Tectonic ang origin ng pagyanig at may babaw na isang kilometro.

Naramdaman ang intensity 3 sa Real, Lucban, General Nakar, Infanta, Polilio at Dolores, Quezon Province;  Marikina at Quezon Cities; Intensity 2 sa Tagaytay City, Cavite; Talisay, Batangas at Los Baños, Laguna;

Intensity 1 naman sa Magallanes, Cavite; Alabat, Quezon; Tanay at Morong, Rizal.

Makalipas ang apat na minuto, isa pang magnitude 4.4 ang yumanig sa kaparehong epicenter o walong kilometro timog-silangan ng Real at may lalim namang tatlong kilometro.

Sa pagkakataong ito ay lumakas ang Intensity sa 4 na naramdaman sa Real, Quezon; Intensity 3 sa Lucban, Infanta at Polilio, Quezon; Maynila; Intensity 2 sa General Nakar at Dolores, Quezon;

Habang Intensity 1 sa Quezon City; Tagaytay City, Cavite; Los Baños, Laguna; Angono, Morong, Cainta at Tanay, Rizal.

Walang inaasahang aftershocks at pinsala sa magkasunod na pagyanig.

Muling ipinanawagan ng rice watch group na Bantay Bigas ang pagbasura sa Republic Act 11203 o Rice Tariffication Law sa kabila ng hindi maawat na pagtaas ng presyo ng pagkain, lalo ng bigas.

Ayon kay Bantay Bigas spokesperson Cathy Estabillo, malaki na masyado ang lugi ng mga magsasaka kaya’t hindi na nila kakayaning tiisin pa ng anim na taon ang implementasyon ng nasabing batas.

Dahil anya sa Rice Tariffication Law ay mas naging prayoridad ang importasyon sa halip na tutukan ang produksyon na siya namang tunay na solusyon upang makamit ang self-sufficiency sa pagkain.

Inihayag ni Estabillo na sa katunayan ay umabot na sa 50,000 signatures ang kanilang nalikom para ibasura ang R.A. 11203 at sa halip ay palitan ito ng mas angkop na panukalang mas pakikinabangan ng mga magsasaka.

Sa ilalim ng House Bill 405 o Rice Industry Development Act, ibabalik ang regulatory powers ng national food authority na tiyakin ang sapat na supply ng pagkain, lalo ng bigas.

Nasa 700 centenarians o mga edad 100 pataas ang hindi pa rin nakatatanggap ng 100,000 peso cash gift mula sa Department of Social Welfare and Development.

Napabilang sa waitlisted ang mga nasabing senior citizen makaraang aminin ng DSWD na walang inilaan ang Department of Budget na dagdag-pondo para sa cash gift.

Sa pagharap sa House Special Committee on Senior Citizens Organizational Meeting, inihayag ni DSWD director for Program Management Bureau Maricel Deloria kasama sa kanilang binabayaran ngayong taon ang mga na-waitlisted noong isang taon.

Ayon kay Deloria, pinaka-maraming waitlisted ay mula sa  Ilocos region, 120 beneficiaries; Western Visayas, 116; Central Visayas, 110 at NCR, 45 beneficiaries.

Nagsumite na anya sila ng request para sa dagdag pondo sa DBM at kanila nang hinihintay ang tugon nito.

Nilinaw ng Philippine National Police ang issue sa umano’y hindi pag-aresto ng mga pulis sa mga armado umanong lalaking pumasok sa Masungi Georeserve sa Baras, Rizal kamakailan.

Ayon kay PNP spokesman, Col. Jean Fajardo, napag-alaman ng pulisya na totoong naka-detail ang mga security guard sa nasabing lugar subalit may security officer na kulang sa firearm registration.

Nakatakda naman anyang magpaliwanag ang sinagtala security agency kaugnay nito.

Magsasagawa ang Regional Civil Safety Unit ng Police Regional Office-4A ng administrative proceedings upang mabatid kung anong administrative liabilities ang maaaring ipataw sa naturang security agency.

Nilinaw din ni Fajardo na wala silang nakitang 30 armadong lalaki sa masungi taliwas sa naunang sumbong dahil anim na security guards lang ang nadatnan at kasalukuyang nagka-kampo sa lugar.

Samantala, kabilang din sa iniimbestihahan ay kung may mga retirado at aktibong Pulis na sinasabing naging sangkot sa iligal umanong pag-okupa sa masungi na isang protected area.

Naglunsad ng kilos-protesta ang ilang residente ng Baras, Rizal laban sa umano’y pang-aagaw ng lupa ng Masungi Georeserve Foundation.

Hinarangan ng mga demonstrador ang kalsada sa barangay pinugay subalit agad silang sinita ng mga Pulis.

Inihayag naman ng Baras Municipal Police na walang permit ang mga residente upang magkilos-protesta.

Iginiit ng mga demonstrador na tatlong taon na anilang hindi napakikinabangan ang kanilang lupang sinasaka mula nang bakuran ng Masungi.

Batay sa iprinesenta nilang survey plan, bahagi ng Upper Marikina River Basin Protected Landscape ang hinahabol nilang Lot 2.

Taong 2017 nagkaroon ng kasunduan ang Department of Environment and Natural Resources (DENR) at Masungi Georeserve Foundation upang mapangalagaan ang naturang protected area.

Gayunman, base sa website ng DENR ay may nakabinbing ancestral domain claim ang mga katutubong dumagat-remontado sa nasabing lugar, na bahagi ng lupang dating sinasaka at tinitirahan ng mga nagprotesta.