Drew Nacino

Karagdagang 3,520 COVID-19 cases ang naitala ng Department of Health kahapon.

Ito na sa ngayon ang pinaka-mataas na cases sa nakalipas na anim na araw at naitala matapos ang tatlong sunod na araw na mas kaunti sa 2,000 ang bagong infections.

Tumaas din sa 35,399 ang aktibong kaso kumpara sa 32,323 noong Sabado o ikatlong sunod na araw namang nakapagtala ng mahigit sa 30k active cases.

Lumobo naman sa 3,938,203 ang total case load kabilang ang 3,840,041 recoveries habang nadagdagan ng 31 ang death toll kaya’t sumampa na sa 62,790 ang namatay.

Nangunguna pa rin ang National Capital Region sa may pinaka-maraming kaso sa nakalipas na dalawang linggo na 13,808; sinundan ng CALABARZON, 5,054 at Central Luzon, 2,804.

Muling tumaas ang daily COVID-19 cases sa bansa.

Nakapagtala ang Department of Health ng karagdagang 2,702 cases kahapon matapos ang dalawang magkasunod na araw na umabot lamang sa below 2,000 ang mga kaso.

Dahil dito, sumirit pa sa 3,929,819 ang total caseload.

Nasa 1,915 ang bagong recoveries kaya’t aabot na sa 3,839,094 ang gumaling.

Kabilang din sa mga nadagdag ang 38 fatalities kaya’t lumobo na sa 62,695 ang death toll.

Umakyat naman sa 28,030 ang aktibong kaso kahapon kumpara sa 27,284 noong Miyerkules.

Samantala, nangunguna pa rin ang National Capital Region sa may pinaka-maraming mga kaso sa nakalipas na dalawang linggo na 12,475.

Sinundan ito ng CALABARZON, 4,388; Central Luzon, 2,456; Davao region, 1,279 at Western Visayas, 913.

Umarangkada na ang programang pabahay ni Pangulong Ferdinand “Bongbong” Marcos Jr., sa Quezon City.

Ito’y makaraan ang Memorandum signing sa pagitan ng Department of Human Settlements and Urban Development (DHSUD) at ng Quezon City Government.

Una nang ipinag-utos ni PBBM sa DHSUD na lutasin ang backlog ng pabahay sa bansa sa pamamagitan ng pagbibigay ng ligtas at disenteng tirahan mahigit anim na milyong pamilya sa loob ng anim na taon.

Ang nasabing kasunduan ay nilagdaan nina DHSUD secretary Jose Rizalino Acuzar at Quezon City Mayor Joy Belmonte para sa proyektong pabahay na malapit nang itayo sa Harmony Hills Terraces sa Barangay Batasan Hills.

Layunin ng naturang programa, na nilikha mismo ni Pangulong Marcos, na makapagtayo ng isang milyong housing units kada taon.

7 sa bawat 10 Pilipino ang namamatay sa Non-Communicable Disease (NCD), kung saan karamiha’y babae.

Batay ito sa bagong pag-aaral mula sa United Nations –World Health Organization (WHO).

Ayon sa WHO, umabot na sa 511,748 NCD deaths ang naitala sa Pilipinas noong 2019 kung saan 72% ay babae habang 68% ay lalaki.

Nangungunang sanhi ng pagkamatay ang cardiovascular diseases gaya ng heart attack at stroke, na may kabuuang halos 250,000 deaths.

Binanggit din sa report na hindi pa nagpapatupad ang Pilipinas ng epektibong guidelines upang pamáhalaan ang cancer, cardiovascular diseases, diabetes at cardio-respiratory diseases, maging ng drug therapy.

Ibinaba ng Department of Health ang target sa PinasLakas Campaign ng gobyerno para sa booster vaccination coverage.

Mula sa 50%, ini-adjust ito sa 30% pagsapit ng Oktubre a – 8 para sa unang isandaang araw sa pwesto ni Pangulong Bongbong Marcos.

Gayunman, nilinaw ni DOH-OIC Undersecretary Maria Rosario Vergeire na nananatili ang kanilang target na makamit ang 50% booster coverage pagsapit ng katapusan ng taon sa ilang rehiyon gaya ng NCR.

Hindi rin anya ito nangangahulugan na magiging maluwag ang kagawaran sa kanilang pagsisikap at makuntento na lamang sa pag-abot sa 30%.

Umapela naman si Vergeire sa publiko na makiisa sa layunin ng gobyerno na protektahan ang sambayanan laban sa COVID-19 at magpa-booster, lalo ang mga hindi pa natuturukan nito.

Inireklamo na ng mga residente ng Taal, Batangas ang perwisyong idinulot ng napakabahong amoy ng sako-sakong pinaghalong dumi umano ng hayop at tao na nagkalat sa Diversion Road sa Taal, Batangas.

Ayon kay Taal Mayor Pong Mercado, nagmula umano ang mga dumi sa isang truck.

Nais anya nilang mabatid kung sinadya o aksidente lamang ang nangyari.

Inihayag naman ni Taal Police chief, Maj. Dante Majadas na natunton nila sa pamamagitan ng CCTV ang dump truck na inabandona sa bayan ng Sta. Teresita.

Bagaman biglang nawala ang truck nang malingat ang mga Pulis, nakuha naman ng mga otoridad ang plaka ng sasakyan at nakikipag-ugnayan na sa LTO.

Pinag-aaralan na ang mga kasong maaaring isampa sa driver o kumpanya nito habang nagsagawa na ng clearing operations kung saan tatlong mini-truck na ng mga dumi ang nakolekta ng Taal LGU na agad ibinaon sa lupa.

Ibinasura ng Manila Regional Trial Court Branch 19 ang proscription case ng Department of Justice na naglalayong ideklara ang Communist Party of the Philippines at New People’s Army bilang mga teroristang grupo.

Sa 135 pahinang resolusyon ni presiding Judge Marlo Magdoza-Malagar, sinabi nito na ang pagsusuri sa programa ng CPP-NPA ay nagpapakita na ito ay inorganisa hindi para sa layuning sumali sa terorismo.

Ipinunto ng Korte na bagaman kaakibat na ng armadong pakikibaka ang karahasan, ito lamang ang aprubadong paraan upang makamit ang layunin ng CPP-NPA, at magkaiba anya ang ‘means’ o paraan sa ‘purpose” o layunin.

Ipinaliwanag din sa resolusyon na iba ang terorismo sa rebelyon, na nag-ugat sa pagkadismaya sa umiiral na sistema ng gobyerno na sa tingin ng iba ay hindi patas sa nakararami at pumapabor lamang sa iilan.

Tinukoy ng Korte ang terorismo bilang paghahasik ng malawakan at matinding takot sa nakararami upang mapuwersa ang pamahalaan na paboran ang isang hiling na sa tingin nito’y labag sa batas.

Inihain ng Department of Justice ang proscription case noong 2018 na naglalayong ideklara ang CPP-NPA bilang isang teroristang grupo sa ilalim ng Section 17 ng Human Security Act of 2007.

Samantala, inihayag ni DOJ spokesman Mico Clavano na pag-aaralan muna ng kagawaran ang desisyon. —ulat mula kay Aya Yupangco (Patrol 5)

Hindi maka-aapekto sa kampanya ng gobyerno laban sa insurgency ang pagbasura ng korte sa proscription case ng Department of Justice na naglalayong ideklara bilang terrorist group ang CPP-NPA.

Ayon kay Senator Ronald “Bato” Dela Rosa, na dating PNP chief, hindi magiging sagabal sa pagsisikap ng pamahalaan na sugpuin ang naturang grupo na banta o salot sa lipunan.

Bagaman nakalulungkot at nakapang-hihinayang na hindi nagtagumpay ang hangarin na ipadeklarang teroristang grupo ang CPP-NPA, iginagalang anya nila ang desisyon ng Manila Regional Trial Court Branch 19.

Aminado si Dela Rosa na malaking tulong sana sa pagresolba o paglaban sa insurhensiya kung idineklarang teroristang grupo ang CPP-NPA. —ulat mula kay Cely O. Bueno (Patrol 19)

Hindi na umano dapat makipag-peace talks ang Pamahalaan sa National Democratic Front at armed wing nitong Communist Party of the Philippines-New People’s Army.

Ito ang iginiit ni Senador Ronald ‘Bato” Dela Rosa makaraang ibasura ng Manila Regional Trial Court Branch 19 ang proscription case ng Department of Justice na layuning ideklara bilang terrorist group ang CPP-NPA.

Ayon kay Dela Rosa, sa halip na usapang kapayapaan, ipagpatuloy na lamang ang pagtugis at huwag nang pagbalakan pang kausapin muli ang mga nasabing grupo.

Tanging gobyerno anya ang sinsero sa usapang pangkapayapaan pero niloloko lang ito ng CPP-NPA kapag humaharap sa peace talks.

Binigyang-diin ng Senador na kapag mayroong peace talks at ceasefire ay nagpapalakas naman ng hanay, nag-a-armas at nagre-recruit ang NPA dahil libre silang nakapapasok sa mga barangay at kanayunan.

Naniniwala naman si Bato na isa sa paraan laban sa CPP-NPA ay ang pagbubuhos ng infrastructure projects sa mga kanayunan sa pamamagitan ng National Task Force to End Local Communist Armed Conflict (NTF-ELCAC). —ulat mula kay Cely O. Bueno (Patrol 19)

Nagpulong na sa kauna-unahang pagkakataon si Pangulong Ferdinand “Bongbong” Marcos Jr., at U.S. president Joe Biden sa “sidelines” ng 77^th United Nations General Assembly (UN-GA) sa New York.

Sa kanilang paghaharap, pinapurihan ni Biden ang matatag na relasyon ng Pilipinas at Amerika na bagaman nagkakaroon ng kaunting gusot minsan, na-aayos naman anya ito lalo’t napakalalim ng ugnayan ng dalawang bansa.

Ilan anya sa patunay nito ang milyun-milyong Filipino-Americans na naninirahan at may malaki o mahalagang papel na ginagampanan sa U.S.

Umaasa si Biden na magkakaroon pa sila ng malalim na talakayan ni Pangulong Marcos sa ilan pang issue, gaya ng COVID-19 recovery at South China Sea dispute habang nagpasalamat din ang U.S. President sa posisyon ng Pilipinas sa giyera sa pagitan ng Russia at Ukraine.

Bilang tugon, nagpasalamat si PBBM sa pagkakataong makausap si Biden at aminadong marami pa silang mga paksang dapat talakayin.

Partikular na tinukoy ni Pangulong Marcos ang papel ng Amerika sa pagpapanatili ng kapayapaan sa Indo-Pacific bagay na pina-pahalagahan ng Pilipinas at iba pang bansa sa Asya.

Binigyang-diin naman ni PBBM na pagdating sa geopolitical issues, pangunahin anyang konsiderasyon ng Pilipinas at gumagabay na prinsipyo sa foreign policy ng bansa ay panatilihin ang kapayapaan.

Umaasa rin si Presidente Marcos na magkakaroon pa ng mas malalim na pagtalakay sa mga nasabing issue sa kabilang mga kinakaharap na mga hamon simula noong mga nakalipas na buwan.