Drew Nacino

Posible muling tumaas ang singil ng Meralco sa residential customers sa susunod na buwan dahil sa pagmahal ng mga panggatong na coal at krudo.

Sa gitna ito ng inaasahang desisyon ng Energy Regulatory Commission (ERC) ngayong linggo o sa mismong Oktubre a – kwatro, sa hirit na rate hike ng San Miguel Corporation at Meralco.

Dagdag 30 centavos per kilowatt hour ang hirit ng mga power plant na pag-aari ng San Miguel sa loob ng kalahating taon upang mabawi ang lugi bunsod ng pagsipa ng presyo ng coal.

Tiniyak naman ni ERC Commissioner Floresinda Baldo- Digal na ilalabas nila anumang araw mula ngayon ang kanilang tugon sa hiling na power rate hike.

Una nang ibinabala ng SMC Global Power Holdings Corporation (SMCGP) na maaari nitong i-terminate ang dalawang Power Supply Agreements (PSA) sa Meralco sa Martes, Oktubre a – kwatro kung hindi magpapasya ang ERC.

Magugunitang naghain ang SMCGP at Meralco ng power rate hike matapos lumobo sa P15 billion ang kanilang lugi dahil sa mataas na presyo ng oil products at mahigpit na supply ng natural gas.

Samantala, inihayag ni Meralco Vice President at Utility Economics Head Lawrence Fernandez na ang pagpapanatili sa kanilang PSA sa SMC ang pinaka-mainam na opsyon para sa mga consumer.

Idinagdag pa ni Fernandez na apat hanggang limang generation para sa emergency purchase ng kuryente ang kanilang kinontrata, na may average na P7 hanggang P8 per kilowatt hour para sa isang taong supply simula Oktubre.

Tumaas na rin o halos na-doble na ang singil sa kuryente sa ilang probinsya.

Ngayong buwan lamang, halos P21 na ang dagdag-singil sa kada kilowatt hour ng mga electric cooperative na Mopreco sa Cordillera Administrative Region at Bileco sa Eastern Visayas.

Halos P20 naman sa Samelco 2; Soleco at Dorelco na nasa Eastern Visayas na pawang pinaka-mahal na sa mga kooperatiba.

Aminado naman ang samahan ng mga Electric Cooperative na Philippine Rural Electric Cooperatives Association Incorporated (Philreca) na hindi nila kontrolado ang mga nasabing rate.

Ayon kay Philreca Executive Director Janeene Colingan na ipinasa sa kanila ng mga power generation company ang mga nasabing rate.

Inamin din ni Emmanuel Jueza, administrator ng National Electrification Administration na walang magagawa sa ngayon kundi magtipid sa paggamit ng kuryente.

Samantala, naghahanda na si Energy Regulatory Commission Chairperson Monalisa Dimalanta ng action plan kasama ang Department of Energy at iba pang mga ahensya upang masolusyonan ang pagsirit ng singil sa kuryente.

Namemeligrong tumaas ang presyo ng imported na karneng baboy simula sa Enero ng susunod na taon.

Ito ang ibinabala ng grupo ng mga importer ng karne na Meat Importers And Traders Association (MITA) dahil mapapaso na sa disyembre ang Executive Order 134 ni dating Pangulong Rodrigo Duterte.

Ipinatupad ang naturang kautusan noong 2021 upang mapababa ang taripa sa imported na karne at dahil dito ay naging 5 hanggang 15% lang ang taripa mula sa 30 hanggang 40%.

Ayon kay MITA President Emeritus Jesus Cham, tataas nang 15% ang presyo ng imported na karne ng baboy o katumbas ng hanggang P30 na dagdag kung mapapaso ang E.O. 134.

Umaapela naman sina Cham kay Pangulong Bongbong Marcos, na kalihim ng Department of Agriculture, na palawigin ang paniningil ng mas mababang taripa bilang tugon sa patuloy na pagtaas ng presyo ng bilihin.

Tutol naman sa naturang hakbang ang Pork Producers Federation of the Philippines o pro-pork at nanawagan kay Pangulong Marcos na pakinggan sila sa pagkakataong ito.

Iginiit ni Pro-Pork Vice President Nicanor Briones na kung hindi mahabol ng local hog raisers ang mababang presyo ng imported na karne, mapipilitan ang ilan na tumigil sa pagbababoy at maaapektuhan ang supply sa bansa.

Ipinunto ni Briones na mas dapat tulungan ang mga local hog raiser sa halip na tangkilikin ang mga imported na karne.

Aabot sa $4 billion ang investment ang iniuwi ni Pangulong Bongbong Marcos sa anim na araw nitong pagbisita sa New York, U.S.A. para sa 77th United Nations General Assembly.

Ayon sa palasyo, karamihan sa mga pangakong investments ay mula sa information technology, business process management, data centers at manufacturing na maaaring makalikha ng isandaan labindalawang libong trabaho.

Nilinaw naman ng malakanyang na ang naturang halaga ay hindi otomatikong sasalamin ng future investment.

Bagaman maraming kompanya ang interesadong maglagak ng puhunan sa bansa, kailangan pa ring maselyuhan ang mga investment pledges.

Bukod sa U.N. general assembly, dumalo rin si Pangulong Marcos sa isang economic briefing at nanghikayat ng mga negosyanteng mamuhunan sa Pilipinas.

Walang nakikitang pangangailangan si DOH o.i.c. Undersecretary Maria Rosario Vergeire upang magbukas ng bagong isolation facility.

Ito’Y sa kabila nang nakikitang pagtaas ng kaso ng covid-19 sa National Capital Region.

Ayon kay Vergeire, sa kasalukuyan ay mayroon pa ring ilang isolation facilities sa mga local government units bukod pa sa may nakakontratang mga hotel, lalo na para sa mga health care workers na nagkakasakit.

Halimbawa na lamang anya nito ang covid-field hospital sa Maynila kung saan inilipat ang ibang mga pasyente.

Binigyang-diin ni Vergeire na ginagamit pa naman ang mga isolation facility kaya’t hindi na kailangang pang magtayo nito.

Nakikipag-usap na ang Office of the Vice President sa Government Service Insurance System (GSIS) upang magamit ang Coconut Palace sa Pasay City bilang permanenteng opisina ni Vice President Sara Duterte at ng mga susunod pa sa kanyang katungkulan.

Ito ang inihayag ni Duterte sa pagdinig ng senate Finance Committee sa proposed P2.3 billion budget ng ovp sa susunod na taon.

Ayon kay VP Sara, maaaring i-donate o ibenta ng GSIS ang mga pag-aari nitong properties bilang permanent property ng ovp.

Bagaman ang Coconut Palace ang tangi nilang target na gawing official residence, nilinaw naman ng pangalawang-pangulo na naghahanap rin ang ovp ng iba pang pag-aari ng gobyerno na magagamit bilang permanenteng opisina.

Naglaan na anya ang ovp ng P10 million na pondo bilang downpayment sa makukuhang property upang matiyak ang kontrata.

Samantala, hindi pa idinedetalye ng GSIS ang halaga ng Coconut Palace na naging opisina ni dating Vice President Jejomar Binay mula 2010 hanggang 2016.

Muling pinaalalahanan ng Department of Health ang publiko na sumunod sa health protocols upang maiwasan ang pagkalat ng covid-19 lalo ngayong malapit na ang pasko kung saan maraming mga pagtitipon at selebrasyon.

Ayon kay Department of Health officer-in-charge Maria Rosario Vergeire, dapat ugaliing magsuot ang face mask sa mga crowded area at isipin na ang virus ay lagi nating kasamang namumuhay.

Umaasa naman si Vergeire na magpapatupad ang mga kumpanya ng mga polisiya, gaya ng pagpapahintulot sa mga bakunado lamang na dumalo sa pagdiriwang, lalo sa loob ng establisyimento.

Samantala, umapela rin ang DOH sa publiko na magdoble-ingat at tandaan ang safety protocols upang hindi na dumami pa ang magkakasakit sa holiday season.

Hindi pa kailangang mag-angkat ang bansa ng bigas sa kabila ng matinding pinsalang dulot ng Bagyong Karding sa sektor ng agrikultura.

Tiniyak ito ni Agriculture Senior Undersecretary Domingo Panganiban kay Pangulong Bongbong Marcos, na tumatayong kalihim ng DA.

Ipinaliwanag ni Domingo na mayroon pang sapat na “buffer stock” ang Pilipinas.

Sa datos ng DA-Disaster Risk Reduction and Management Operations Center, halos dalawang bilyong piso na ang halaga ng pinsalang dulot ng bagyo sa agrikultura.

Pinaka-matinding naapektuhan ang nasa 145,000 hectares ng palayan, maisan at gulayan, lalo sa Central Luzon; Cordillera Administrative Region, Ilocos Region, CALABARZON at Bicol.

Hinatulan ng guilty sa kasong indirect contempt ng Himamaylan City Regional Trial Court Branch 55 sa Negros Occidental si dating Sugar Regulatory Administration Chief Hermenegildo Serafica.

Kaugnay ito sa pag-issue ni Serafica ng Memorandum Circular 11 na nagpahintulot sa sugar importation kahit ipinahinto na ng Korte.

Sa labing-isang pahinang desisyon ni RTC Branch 55 Judge Walter Zorilla, pinatawan ang dating SRA administrator ng labinlimang araw na pagkakabilanggo at multang tatlumpung libong.

Mayo a – katro nang ilabas ni serafica ang memorandum na nagpahintulot na ipagpatuloy ang implementasyon ng sugar order number para sa importasyon ng 200,000 metric tons ng standard grade at bottler’s grade refined sugar.

Sa kabila ito ng Writ of Preliminary Injunction na inilabas ng Korte noong Marso a – dos upang pigilan pagpapatupad ng Sugar Order number 3.

Ang nasabing injunction ay may kaugnayan sa petisyon ng Negros Occidental Federation of Farmers Association na tumutol sa pag-aangkat ng asukal sa ilalim ng mga nasabing kautusan ng SRA.

Plano ng Department of Transportation na magdeploy ng karagdagang isandaang bus, maglagay pa ng mga istasyon sa EDSA busway at lifters sa mga bus.

Ito, ayon kay DOTr Undersecretary Mark Steven Pastor, ay upang ma-accommodate ang mas maraming pasahero at matulungan ang mga senior citizen at persons with disability sa pagbiyahe.

Patuloy anya kasing dinaragsa ang National Capital Region ngayong ber-months, lalo ang EDSA busway gawa ng libre pa rin ang sakay.

Kabilang sa mga idaragdag ang mga istasyon sa high volume areas, tulad sa Tramo, Magallanes at Kamuning habang palalawakin ang mga istasyon sa Guadalupe, Bagong Barrio at Monumento.

Gayunman, hindi idinetalye ng kagawaran kung kailan sisimulan o gagawin ang pag-upgrade sa mga nasabing istasyon.