Drew Nacino

Hindi kailangang sumagot ang gobyerno sa pahayag ni International Criminal Court Prosecutor Karim Khan na nagsabing walang merito ang mga argumento ng Pilipinas sa drug war.

Ito ang inihayag ni Justice Secretary Jesus Crispin Remulla sa tanong kung dapat bang tumugon ang gobyerno ng Pilipinas sa pahayag ng ICC prosecutor.

Ayon kay Remulla, hindi na miyembro ng ICC ang Pilipinas at wala nang hurisdiksyon sa bansa ang nasabing korte.

Mayroon naman anyang umiiral na demokrasya at sistema ng hustisya ang bansa at walang otoridad ang ICC na pilitin ang Pilipinas na lumahok sa imbestigasyon.

Iginiit ng kalihim na isinumite na rin ang mga kaukulang dokumento para lamang makatugon at hindi nangangahulugan na nagpapasakop ang pilipinas otoridad ng ICC.

Labindalawang cabinet secretaries at dalawang commissioners ang nangangailangan ng re-appointment ni Pangulong Ferdinand “Bongbong” Marcos, Jr. makaraang i-bypass ng Commission on Appointments.

Sa ipinadalang listahan ni Senate President Juan Miguel Zubiri, ang mga hindi nakalusot sa C.A. ay sina Press Secretary Trixie Cruz-Angeles; Energy Secretary Raphael Perpetuo Lotilla;

Finance Secretary Benjamin Diokno; Human Settlements and Urban Development Secretary Jose Rizalino Acuzar; Information and Communications Technology Secretary Ivan John Enrile Uy;

Migrant Workers Secretary Susan Ople; Public Works and Highways Secretary Manuel Bonoan; Science and Technology Secretary Renato Solidum; Social Welfare and Development Secretary Erwin Tulfo;

Trade Secretary Alfredo Pascual; Transportation Secretary Jaime Bautista; National Economic and Development Authority Secretary Arsenio Balisacan at Commission on Audit Chairman Jose Calida.

Na-bypass din ang appointment ni Executive Secretary Victor Rodriguez kahit nagbitiw na ito sa pwesto maging ang nominasyon ni Nelson Java Celis bilang commissioner ng Commission on Elections.

Tatalakayin sana ng komisyon ang appointment nina Tulfo at Bonoan kahapon pero kinapos na sa oras dahil inihabol ang pagratipika sa dalawang mahalagang bicam reports na magiging batas, bago mag-adjourn ang Kongreso, sa sabado.

Alinsunod sa rules ng C.A., mawawalan ng bisa ang ad interim appointment sa oras tutulan ng komisyon o kung hindi makumpirma ay sa pagbabalik ng Kongreso pa sila maisasalang muli sa C.A.

Umaapela na ng tulong ang local government ng bayan ng General Tinio, Nueva Ecija para sa mga residenteng naapektuhan ng bagyong Karding.

Ayon kay General Tinio Mayor Isidro Pajarillaga, kailangan ng mga mamamayan ang food packs at construction materials para sa pagsasaayos ng kanilang mga nawasak na bahay.

Aminado si Pajarillaga na ngayon pa lang nakababawi ang kanilang bayan sa epekto ng covid-19 pero hinagupit naman ng bagyo kaya’t panibago itong sakripisyo.

Anuman anyang tulong na ipararating, lalo ng national government, ay malugod nila itong tatanggapin.

Aabot sa apatnaraang kabahayan ang nawasak at nasa apatnalibong iba pa ang napinsala, kabilang ang munisipyo sa General Tinio.

Ito rin ang unang bayan sa Nueva Ecija na nasalanta ng bagyong Karding matapos ang ikalawang landfall nito sa karatig bayan ng Dingalan, Aurora.

Bukas ang Philippine Drug Enforcement Agency at Dangerous Drugs Board sa posibleng paggamit ng medical cannabis bilang lunas sa ilang karamdaman.

Sa pagdinig sa proposed 2023 budget ng dalawang ahensya na dinaluhan nina PDEA Director-General Wilkins Villanueva at DDB Chairman Catalino Cuy, muling iginiit ni Senador Robin Padilla ang paggamit ng medical cannabis.

Bilang tugon, nilinaw ng PDEA at DDB na hindi pa nila isinasara ang usapin sa posibleng paggamit ng marijuana bilang gamot bagay na ikinatuwa ni Padilla.

Sa panig ni Senador Ronald Dela Rosa, inihayag nitong bagaman maaari namang magamit ang medical cannabis, dapat tutukan pa rin ng PDEA ang paghuli sa mga gagamit nito sa iligal na paraan.

Matapos nito ay inaprubahan sa committee level ang proposed 2023 budget ng PDEA na P3.1 billion at DDB na P447 million.

Nagbabadya ang panibagong dagdag-singil sa tubig sa susunod na taon.

Dahil ito sa patuloy na pagbulusok ng halaga ng piso kontra dolyar.

Ayon Kay Metropolitan Waterworks and Sewerage System (MWSS) Chief Regulator Patrick Lester Ty, posible ang dagdag-singil sa magiging bagong rate simula Enero ng susunod na taon.

Tiniyak naman ni Ty na gagawin nila ang lahat ng paraan upang mabawasan ang epekto ng mahinang piso sa singil sa tubig sa susunod na limang taon upang hindi mabigla ang consumers.

Kahapon, bahagyang lumakas ang piso matapos magsara ang palitan sa P58.98 kada dolyar kumpara sa P58.99 noong Martes.

Pinagmulta ng Metropolitan Waterworks and Sewerage System (MWSS) ng P9.2 million ang Maynilad dahil sa serye ng water interruption na naka-apekto sa maraming consumer.

Ang naranasang interruptions maging ang ilang water quality issues ay namonitor ng MWSS noong Mayo hanggang Hulyo sa ilang bahagi ng Las Piñas, Parañaque, Muntinlupa Cities at lalawigan ng Cavite.

Ipatutupad ang penalty sa nobyembre sa pamamagitan ng bill rebates sa mga apektadong Maynilad customers.

Tiniyak naman ng Maynilad na susunod sila sa desisyon ng MWSS subalit iginiit na algal bloom o pagdami ng lumot sa Laguna de bay ang dahilan ng problema, na hindi umano nila kontrolado.

Lusot na rin sa makapangyarihang Commission on Appointments si Foreign Affairs Secretary Enrique Manalo.

Sa muling pagharap ni Manalo sa C.A., naitanong ni Senator Francis Tolentino kung ano ang gagawin ng D.F.A. upang himukin ang ibang mga bansa na ang Pilipinas ay sumusunod sa itinatakda ng human rights conventions.

ito’y sa kabila ng mga pag-atake na ginagawa ng European Union at Western countries sa mga isyu ng karapatang-pantao sa bansa.

Bilang tugon, tiniyak ni Manalo na sisikapin niyang makumbinsi ang ibang mga bansa na ang Pilipinas ay tumatalima sa human rights treaties, sa pamamagitan ng pagdalo sa U.N. Human Rights Council meeting sa Geneva sa susunod na linggo.

Ayon sa kalihim, gagamitin niya itong pagkakataon upang kumbinsihin ang foreign partners na ang Pilipinas ay sumusunod sa lahat ng human rights conventions at mahigpit na ipinapatupad ang human rights program at agreement.

Ipakikita din niya na ang Pilipinas ay fully-cooperative, bukas at transparent sa pagtugon sa mga human rights issues.

Dagdag pa ni Manalo, nais niyang magpatupad ng isang “positive approach” sa mga isyu hinggil sa karapatang pantao na ang magiging focus ay ang kooperasyon sa ibang mga bansa. —Mula sa ulat ni Cely Ortega-Bueno (Patrol 19)

Nakumpirma na sa Commission on Appointment si Budget Secretary Amenah Pangandaman.

Matapos na makalusot sa committee level, agad sumalang si Pangandaman sa plenary session para sa official confirmation.

Mismong si Senate President Juan Miguel Zubiri ang nagrekomenda ng plenary confirmation ng kalihim na sinegundahan naman ni Senator Loren Legarda.

Kabilang sa itinanong kay Pangandaman ang posisyon nito sa procurement service ng Department of Budget and Management makaraang maharap sa samu’t saring kontrobersiya sa pagbili ng mga kagamitan at supplies para sa ilang ahensya.

Tiniyak naman ng kalihim na mayroon na siyang inihandang listahan ng mga reporma sa P.S.-D.B.M. at kabilang dito ang pagtutok sa ‘common use supplies’ sa pagbili ng mga produkto upang matiyak ang maayos na inventory at online bidding process para sa transparency sa publiko.

Itinutulak din ni Pangandaman ang pagda-download ng budget ng mga government agencies sa P.S.-D.B.M. para sa mga proyektong hindi kayang tapusin o ipatupad upang maiwasan ang kontrobersyal na ‘parking’ ng pondo.

Bago maging D.B.M. Secretary, nagsilbi si Pangandaman bilang chief of staff ni dating Senate President Edgardo Angara, nagtrabaho kay Senator Loren Legarda, naging dating budget undersecretary at Bangko Sentral ng pilipinas assistant governor noong Duterte administration. — Mula sa ulat ni Cely Ortega-Bueno (Patrol 19)

Dapat nang ikunsidera ngayon pa lamang ng Department of Agriculture ang pag-a-angkat muli ng bigas sakaling maberipika ang matinding pinsalang dulot ng bagyong karding sa mga palayan sa Central Luzon.

Para kay Albay Rep. Joey Salceda, dapat nang mag-advance order ang Pilipinas ng imported na bigas, bilang paghahanda sa pagtaas ng presyo, lalo’t humihina ang piso laban sa dolyar.

Ayon kay Federation of Free Farmers National Manager at Agriculture secretary Raul Montemayor, dahil bumaba ang halaga ng piso, asahang mas magiging mahal ang imported rice.

Ito anya ang dahilan kaya’t dapat nang ilarga ng gobyerno ang subsidiya at income support para sa mga magsasaka upang makapagsimula muli silang makagpagtanim.

Una nang tiniyak ni D.A. Spokesperson at Undersecretary for Consumer and Political Affairs Kristine Evangelista na may sapat na rice stocks ang bansa dahil sa mga naunang import at nagpapatuloy na anihan.

Gayunman, batay sa projection ay aabutin lamang ng dalawa’t kalahating buwan ang stock na bigas ng bansa malayo sa kailangang 100-day buffer stock na requirement upang mapunan ang pangangailangan sa susunod na taon kasabay ng planting season.

Nagpadala na ang Estados Unidos ng family food packs at shelter tarpaulins para sa mga pamilyang naapektuhan ng Super Typhoon Karding.

Ayon sa U.S. Embassy, ipinamahagi ang mga food pack at shelter tarpaulin sa mga pamilyang apektado sa CALABARZON at Central Luzon sa tulong ng World Food Programme at International for Migration-Philippines.

Tumutulong na rin ang U.S. Agency for International Development-Philippines sa National Emergency Telecommunications at Logistic Operations.

Bukod sa Amerika, nagpahayag na rin ng kahandaang tumulong ni Australian Ambassador-designate to the Philippines Hae Kyong Yu para sa recovery ng mga lugar na nasalanta ng kalamidad.