Drew Nacino

Bumuo na ng Special Task Force ang Bureau of Internal Revenue para habulin ang mga big-time tax evaders at mga namumuhay sa tinatawag na ‘Underground Economy.’

Ito ay ang mga malalaking negosyo o indibidwal na nagtatago o namemeke ng mga dokumento na mula umano sa mga smuggled na oil products at cigarettes na gumagamit ng pekeng revenue stamps upang makatakas sa pagbabayad ng excise tax.

Binuo ang Task Force ni B.I.R. commissioner Lilia Catris Guillermo at tinawag na “BIR Strike Group” na pamumunuan ni Revenue Deputy Commissioner for Operations Romeo Lumague, Jr.

Magkakaroon ng dalawang team na tututok sa mga taxpayer sa ilalim ng Large Taxpayers Service at mga Taxpayers sa kanilang mga Regional Office.

Layunin ng hakbang na paigtingin ang pagbabayad ng buwis ng mga mamamayan at maiwasan ang mga nagtatago, namemeke at nagpapanggap para makaiwas dito.

Asahan na ang pagbigat ng daloy ng trapiko sa ilang kalsada sa Pasig City sa pagsasara ng bahagi ng Meralco Avenue.

Simula mamayang alas-9 ng gabi hanggang taong 2028 ay sarado ang nasabing kalsada sa tapat ng Capitol Commons hanggang Shaw Boulevard upang bigyang-daan ang konstruksyon ng Shaw Boulevard Station na bahagi ng Mega Manila Subway Project.

Hinimok naman ng MMDA ang mga motorista na dumaan na lamang sa mga alternatibong ruta kung pupuntang Pasig o Mandaluyong Cities.

Aminado si MMDA Task Force Special Operations chief Bong Nebrija na hindi biro ang volume ng sasakyan na daraan sa kahabaan ng Capt. Henry Javier, Danny Floro Streets at Julia Vargas Ave.

Lalo anyang sisikip ang mga nasabing kalsada pagsapit ng Holiday season, kung saan ilang kalapit na malls ang magkakaroon ng sale na tiyak na daragsain ng Christmas shoppers.

Isang Online sabong operator at pitong mananaya ang arestado matapos salakayin ng Manila Police District ang isang iligal na Online sabong operation sa loob ng isang palengke sa Tundo.

Ito’y kahit ipinatigil na noon ang nasabing sugal ni dating Pangulong Rodrigo Duterte.

Kinilala ang mga suspek na si Jayvee Mingoy, 21-anyos, residente ng F. Varona Street, Barangay 80 at operator ng nasabing pasugalan; Bobby Hernandez, 41-anyos;

Alexis Banares, 40-anyos; Jose Quinto, 51; Rosauro Exconde, 54; Rene Petallo, 52; John John Tambaon, 41 at Jeng Pascual, 37-anyos.

Ayon sa M.P.D. – District Special Operations Unit, karamihan sa mga naaresto ay mga tindero at helper sa palengke na na-aadik sa Online sabong.

Nasakote ang mga suspek sa loob ng Asuncion Public Market.

Narekober naman sa 8 ang nasa P2-k halaga ng taya at iba’t ibang online sabong paraphernalia at mahaharap sa kasong paglabag sa Presidential Decree 1602 o Illegal Gambling.

Balik sa P100 o higit pa ang presyo ng kada kilo ng asukal sa ilang palengke sa Metro Manila, bago ang milling season at nakatakdang sugar importation.

Sa price monitoring ng Department of Agriculture, nagmahal ng P11 ang kada kilo ng asukal sa Blumentritt, Maynila, P107 na mula sa dating P96 noong isang linggo.

Nagsimula na ring tumungtong sa P100 ang kada kilo ng refined sugar sa Trabajo Market sa Sampaloc.

Nasa P75 naman ang washed sugar habang P80 ang brown sugar sa ilan pang pamilihan.

Samantala, inaasahang darating sa Nobyembre ang 150,000 metric tons ng refined sugar na inimport ng bansa upang mapunan ang kakulangan ng supply at mapababa ang presyo.

Aabot na sa P10 hanggang P20 ang itinaas ng presyo ng ilang agricultural products sa ilang pamilihan sa Metro Manila isang linggo matapos ang pananalasa ng bagyong Karding.

Aminado si D.A. undersecretary at Spokesperson Kristine Evangelista na nagtataka sila kung bakit P10 hanggang P20 ang dagdag presyo ng mga gulay pagdating sa Metro Manila gayong P2 hanggang P5 lamang ang pataw sa trading post.

Halimbawa na lamang sa Maynila, P120 na ang kada kilo ng pechay o chinese cabbage sa Blumentrit mula sa dating P60.

Nagmahal din ang pulang sibuyas, P240 mula sa P190 kada kilo; kamatis, P160 mula sa P120; sitaw P100 mula sa P80; talong, P100 mula sa P80; carrots, P160 mula sa P140 at patatas, P100 mula sa dating P60 per kilo.

Bukod sa Blumentrit, ang mga nasabing presyo ay na-monitor din anya sa New Las Piñas City Public Market; Guadalupe Public Market sa Makati City; Marikina Public Market; Malabon Central Market;

Pamilihang Lungsod ng Muntinlupa City; San Andres Market, Quinta Market at Pritil Market sa Maynila;  Pasig City Market at Pasig City Mega Market; Commonwealth, Muñoz at MEGA Q Mart sa Quezon City.

Tumaas na rin ang presyo ng imported na de lata at gatas sa gitna ng patuloy na pagbulusok ng halaga ng piso kontra dolyar.

Batay sa Suggested Retail Price list ng Department of Trade and Industry, naglalaro lamang sa P13.25 hanggang P19.58 ang kada 155 grams ng sardinas.

Gayunman, halos triple na ang presyo ng imported sardines na nasa P75 hanggang P90 na.

Aabot naman sa P64.75 hanggang P73.30 centavos ang kada 150 grams ng local powdered milk habang P90 ang imported.

Samantala, nagpatupad ng price freeze ang DTI sa anim na lugar na lubhang napinsala ng bagyong Karding, kaya’t hindi maaaring magtaas ng presyo sa mga pangunahing bilihin sa loob ng dalawang buwan.

Kabilang dito ang buong Nueva Ecija; Dingalan, Aurora; San Miguel, Bulacan; Macabebe, Pampanga; General Nakar, Patnanungan, Panukulan, Polillo, Burdeos at Jomalig, Quezon.

Marami pang Public Utility Vehicles ang hindi pa maaaring magpataw ng dagdag pasahe sa pagsisimula ng fare increase ngayong araw.

Ito’y dahil karamihan ng operator o driver ang wala pang fare matrix o taripa na requirement ng Land Transportation Franchising and Regulatory Board (LTFRB) bago magdagdag ng pasahe.

Ayon kay Liga ng Transportasyon at Operators sa Pilipinas (LTOP) president Orlando Marquez, halos kalahati pa lamang ng kanilang mga miyembro ang nakakuha ng taripa.

Nasa 70% hanggang 80% naman ng kanilang miyembro ang inaasahang makakukuha na ng fare matrix ngayong linggo.

Sa datos ng LTFRB Central Office hanggang noong Biyernes, 2,711 o 6.9 % lamang ang nag-apply para sa taripa.

Samantala, ipinanawagan naman ni Stop and Go Coalition president Zaldy Ping-Ay sa LTFRB na pasimplehin ang requirements sa pag-a-apply para sa fare matrix upang mapabilis ang pagkuha rito.

Karagdagang 2,117 Covid-19 cases ang naitala ng Department of Health kahapon habang bahagya muling bumaba sa 28,872 ang aktibong kaso.

Dahil dito, sumampa na sa 3,953,886 ang kabuuang kaso sa bansa.

Sa mga pinaka-bagong nadagdag na infections, 908 sa mga ito ay mula sa Metro Manila.

Nadagdagan naman ng 32 ang death toll kaya’t umakyat sa 63,013 ang bilang ng fatality habang sumampa na sa 3,862,001 ang recoveries.

Suportado ng mga telecommunications company ang mandatory registration ng mga sim card na isinusulong sa kongreso.

Tiniyak ng Globe Telecom, PLDT-Smart at DITO Telecommunity na handa silang makipag-tulungan sa mga otoridad matapos ipasa ng senado at kamara ang kani-kanilang bersyon ng Sim Registration Bill.

Ayon kay Froilan Castelo, General Counsel ng Globe, magiging pangunahing panlaban sa spam at scam SMS ang Sim Card Registration Bill dahil makikilala na ang mga gumagamit ng prepaid sim card.

Inihayag naman ni PLDT-Smart President at CEO Alfredo Panlilio na handa silang makibahagi sa babalangkasin ng Implementing Rules and Regulations.

Samantala, sinabi ni DITO Chief Technology Officer, retired Maj. Gen. Rodolfo Santiago na handa rin silang tumalima at ipatupad ang batas sa oras na maipasa ito.

Mahigit P3-bilyong na ang halaga ng pinsala ng bagyong Karding sa sektor ng agrikultura sa Nueva Ecija.

Sa pagtaya ng Provincial Disaster Risk Reduction and Management Council (PDRRMC), pinakamatinding naapektuhan ang ekta-ektaryang palayan sa lalawigan.

Damay din ang mga maisan, high-value crops, kabilang ang mga gulayan.

Samantala, bagaman unti-unti namang bumabalik ang mga negosyo limang araw matapos manalasa ang bagyo, wala pa ring kuryente sa districts 3 at 4.

Alinsunod sa rekomendasyon ng PDRRMC kay Governor Aurelio “Oyie” Umali, wala pa ring klase ngayong araw sa lahat ng antas sa mga nasabing distrito dahil hindi pa naibabalik ang power supply.

Ang District 3 ay binubuo ng Cabanatuan City, mga bayan ng Bongabon, Gabaldon, General Mamerto Natividad, Laur, Palayan at Santa Rosa.

Binubuo naman ang district 4 ng Gapan City, mga bayan ng Cabiao, General Tinio, Jaen, Peñaranda, San Antonio, San Isidro at San Leonardo.