Drew Nacino

Hinamon ni Senador Jinggoy Estrada ang Bureau of Immigration na tiyaking idedeport ang mahigit 48K POGO workers na kinansela ang Visa.

Ayon kay Estrada, ang aksyon ng B.I. laban sa Illegal POGO workers ay tumutugon din sa kanyang panawagang magsagawa ng crackdown laban sa Illegal o Unlicensed Offshore Gaming Operators sa bansa.

Binigyang-diin ng Senador na walang nakukuhang economic gains ang gobyerno sa pagpapatuloy ng operasyon ng mga hindi lisensyadong POGO at kanilang mga manggagawa.

Hindi rin anya patas sa 34 na PAGCOR-approved POGOs at kanilang mga empleyado na nagbabayad ng 5% gross gaming revenue at 25% Withholding Tax sa gross income kung hahayaang manatili sa bansa ang mga Illegal POGOs.

Ipinaliwanag pa ng mambabatas na ang kanselasyon sa lisensya ng mga POGO ay mangangahulugan din ng kanselasyon ng Visa ng mga worker nito kaya wala nang dahilan para manatili sila sa bansa.

Ipinunto ni Estrada na sa loob ng 59 na araw ay dapat ipadeport na ang Illegal Aliens at hindi na dapat hayaan ang anumang iligal na transaksyon para manatili o magtagal sa bansa. —ulat mula kay Cely Ortega Bueno (Patrol 19)

Aminado ang Bureau of Immigration na hindi pa nila batid ang kinaroroonan ng mahigit 40K pogo workers na nakatakdang ipadeport ng gobyerno.

Ito ang inamin ni B.I. Deputy Commissioner Fortunato Manahan Jr., nang tanungin ni Senador Grace Poe sa pagdinig ng Senate Committee on Ways and Means.

Ayon kay Manahan, ang nasabing bilang ay tantsa pa lamang kung mayroong 200 manggagawa ang mahigit 200 POGO firms na may terminated licenses.

Gayunman, pinuna ni Poe ang B.I. official at iginiit na wala naman palang katiyakan ang 40,000 POGO worker o hindi aktuwal na bilang at pinaka-mahirap pa anya ay hindi rin masabi kung nasaan ang mga ito.

Kahapon nagsimula ang hearing ng Kumite na layuning timbangin ang benepisyo ng mga POGO at epekto nito sa lipunan.

Dagsa pa rin ang mga nagkukumahog na PUV operator sa mga tanggapan ng Land Transportation Franchising and Regulatory Board upang kumuha ng fare matrix, matapos ang unang araw ng implementasyon ng dagdag-pasahe.

Ang fare matrix o taripa ay requirement ng LTFRB para sa mga PUV bago maningil ng sobrang-pasahe sa mga mananakay.

Gayunman, 10% lamang ng 260,000 units sa buong bansa ang nakakuha ng taripa.

Hindi naman basta-basta ang pagkuha ng fare matrix para sa mga operator dahil kailangan nilang maghanda ng Official Certificate of Certificate of Registration;

Kopya ng Provisional Authority o Certificate of Public Convenience o (CPC), patunay na dumaan sa verification process ang CPC at lahat ng ito ay isasagawa sa mga tanggapan ng LTFRB.

Nanindigan si LTFRB chairperson Cheloy Garafil na mahigpit sila sa requirement bilang proteksyon sa mga pasahero at upang matiyak na hindi colorum ang mag-o-operate sa kalsada.

Noon pa anyang Setyembre nila inabisuhan ang mga operator na kumuha na ng fare matrix o bago pa man ipatupad ang fare increase at nagbukas na rin ng tanggapan tuwing Sabado upang ma-accommodate ang mga naghahabol na operator.

Tinututukan na ng Department of Justice ang kumakalat na balita na mayroon umanong serye ng hawaan ng Sexually Transmitted Disease (STD) sa mga Philippine Offshore Gaming Operators (POGO) workers.

Agad ipinag-utos ng DOJ sa National Bureau of Investigation na magkasa ng imbestigasyon kahit hindi pa man natutukoy ang lawak ng hawaan.

Ayon kay DOJ spokesperson Mico Clavano, batay sa kanilang mga natanggap na ulat ay mayroong 15 hanggang 20 STD cases sa isang POGO Company.

Hindi na anya nila hihintaying paabutin pa sa mga Pilipino ang nasabing sakit.

Umaasa naman ang kagawaran na matitigil na ang iba’t ibang isyung lumalaganap dulot ng POGO.

Malayo pang matapos ang Covid-19 pandemic sa bansa.

Ito, ayon kay Dr. Jomar Rabajante ng U.P. COVID-19 pandemic response team, ay dahil inaasahang mananatili sa 2,000 ang cases kada araw hanggang katapusan ng taon.

Gayunman, nilinaw ni Rabajante na kaya ng pamahalaan ang Healthcare Utilization kahit mataas ang naitatalang arawang kaso sa bansa.

Umapela naman si Rabajante sa gobyerno na suriing mabuti ang mga pagluluwag sa restriksyon lalo na ang paglabas-masok ng mga dayuhan at Pilipino sa bansa kasabay ng panawagan sa publiko na patuloy na magsuot ng face mask.

Umabot na sa P4.4 Billion ang nakolektang tax ng Bureau of Internal Revenue mula sa Philippine Offshore Gaming Operators (POGO) sa unang walong buwan ng taon o simula Enero hanggang Agosto.

Ito ang inihayag ng BIR sa pagdinig sa Senate Ways and Means Committee hinggil sa POGO, kahapon.

Ayon kay BIR director, Atty. Sixto Dy Jr., nalampasan ng revenue ngayong taon ang nakolekta ng ahensya na P3.91 billion noong 2021.

Magugunitang bumaba noong nasabing panahon ang nakolektang buwis sa kabila na ipinasang Republic Act 11590 o POGO Law ni dating Pangulong Rodrigo Duterte.

Gayunman, hindi na nagbalikan ang POGO entities sa Pilipinas at hindi naabot ang pre-pandemic level na bilang ng mga dayuhang POGO worker na kalauna’y nabawasan.

Sa iprinesentang datos ng ahensya sa Senado, mayroon na umanong 163 POGO entities sa bansa sa nitong Hunyo 2022 na binubuo ng 35 licensees at 130 service providers.

Samantala, mayroon namang 34,245 POGO industry workers kung saan 17,509 ang dayuhan at 16,736 ang Pilipino.

Nagwagi ang Adelaide 36ers kontra Phoenix Suns sa final ng Preseason exhibition game ng NBL-NBA.

Nanguna sa koponan si Kai Sotto matapos magpakitang Gilas sa laban na ginanap sa Footprint Center sa Arizona kahapon, oras sa Pilipinas.

Nakapagtala si Sotto ng 11 points, 2 rebounds, at 2 steals habang nakaambag din sa koponan ng 35 points si Craig Randall at Robert Franks na mayroong 32 points.

Abangan naman ang susunod na laban ng Adelaide para sa isa pang nba Preseason Game kung saan, kanilang makakaharap ang Oklahoma City Thunder bago sila bumalik sa Australia para sa 2022-2023 National Basketball League Season.

Patay ang isang beteranong radio broadcaster makaraang tambangan sa Barangay Talon Dos, Las Piñas City.

Kinilala ng Las Piñas City Police ang biktimang si Percival Mabasa na mas kilala bilang Percy Lapid ng DWBL.

Lulan si mabasa ng kanyang Black Toyota Innova na may plakang NGS-8294 nang pagbabarilin ng isang lalaking sakay ng Toyota Fortuner sa Sta. Cecilia Gate, BF Resort Village, mag aalas-9 kagabi.

Matapos nito dalawang lalaking lulan ng motorsiklo ang sumulpot at pinagbabarilin din ang biktima.

Patungo na sana si Ka-Percy sa studio ng DWBL sa EDSA-Reliance, Mandaluyong City para sa kanyang Online program nang maganap ang krimen.

Nagsasagawa na ng imbestigasyon sa krimen ang Las Piñas City Police.

Maliban sa pagiging hard-hitting commentator, naging anchor din si Lapid ng DWIZ at DZRJ.

Si Ka-Percy ay kapatid ni dating National Press Club president Roy Mabasa ng Manila Bulletin.

Inihatid na sa kani-kanilang huling hantungan ang dalawa sa limang rescuer na nasawi sa kasagsagan ng pananalasa ng Bagyong Karding sa Bulacan.

Umalingawngaw ang sirena ng mga bumbero at emergency vehicles nang ihimlay si Jerson Resurreccion sa Catmon Cemetery sa bayan ng Sta. Maria, kahapon.

Ang 33-anyos na si Jerson ang Team Leader ng mga rescuer nang maganap ang trahedya sa kasagsagan ng kanilang misyon sa Bayan ng San Miguel.

Inilibing na rin ang rescuer na si Marby Bartolome sa Musuleyo ng kanilang pamilya sa Malolos City.

Noon namang Sabado ay inihimlay na rin ang tatlo pang rescuer na sina George Agustin, Troy Agustin at Narciso Calayag Jr., sa kani-kanilang hometown.

Pawang binigyang-pugay ng Bulacan Provincial Government at National Disaster Risk Reduction Management Council ang limang biktima.

Sumampa na sa P3.3 billion ang halaga ng pinsala ng bagyong Karding sa sektor ng agrikultura at imprastraktura.

Ayon sa NDRRMC pinakamalaki ang pinsala sa agrikultura na nananatili sa mahigit P3-B habang umabot na sa P304 million imprastraktura.

Kabilang sa pinaka-matinding naapektuhan ang ekta-ektaryang palayan at gulayan sa Central Luzon, CALABARZON, Cordillera Administration,  Ilocos, Cagayan Valley at Bicol regions.

Samantala, nasa 51k kabahayan ang nawasak o bahagyang napinsala sa mga nasabing rehiyon.