Angelica Doctolero

Nauwi sa pagluluksa ang pamamasyal ng grupo ng mga bikers sa India nang masawi ang isa nilang kasamahan habang nagsi-swimming, ngunit hindi ito dahil sa pagkalunod, kundi dahil nag-dive ito sa swimming pool na hindi naman pala malalim.

Ang buong kwento, eto.

Isang tanghali matapos kumain ng grupo ng mga bikers sa isang private resort sa Karnataka, India, naisipan ng isa sa mga ito na kinilalang si Nishant, 35-anyos, na mag-swimming.

Sa isang video na inilabas ng mga otoridad, makikita na sabay-sabay na lumingon at nanood ang mga kasamahan ni Nishant nang mag-dive ito sa swimming pool.

Matapos ang ilang sandali, naalarma ang mga ito nang hindi na umahon pa ang lalaki kung kaya agad silang lumusong sa swimming pool para iahon si Nishant na nawalan na ng malay.

Napag-alaman na 5’10 ang height ni nishant at 4.5 feet lang ang lalim ng tinalon nitong swimming pool.

Ayon sa mga doktor, tumama raw ang lalaki sa sahig ng pool na siya namang nagresulta sa tinamo nitong injury sa spinal cord.

Samantala, hindi na raw nagkaroon pa ng improvement sa kalagayan ni Nishant at sa kasamaang palad ay nasawi habang inililipat ng ospital.

Hindi rin nagsalita ang pamilya ni Nishant at ang panig ng private resort kaugnay sa insidente.

Sa mga mag-a-outing ngayong bakasyon, magiging extra careful na ba kayo matapos marinig ang kwento na ito?

Isa na namang sunog ang naitala dahil sa powerbank! Pero sa pagkakataon na ito, sa isang airport naman sa Estonia nangyari ang insidente.

Kung ano ang mga sumunod na pangyayari, eto.

Sa isang video, makikita ang isang maliit na maleta na nakapatong sa isang mesa. Kung titingnan ay tila isa lang itong tipikal na bagahe pero bigla na lang itong naglabas ng usok at hindi nagtagal ay bigla na lang nagliyab.

Nangyari ito sa tallinn international airport sa Estonia.

Katatapos lang daw dumaan ng maleta sa security nang mangyari ang insidente.

Mabuti na lang at mayroong nakaantabay na airport staff kung kaya agad na naapula ang apoy gamit ang fire extinguisher.

Matapos nito ay sinuri ang maleta at napag-alaman na mayroon itong laman na powerbank.

Ayon naman sa pahayag ng Tallinn Airport, tinawag pa nila itong ‘lucky accident’ dahil nataon na sumabog ito bago pa maikarga sa eroplano.

Matatandaan na kamakailan lang ay naging sanhi ng sunog sa isang Korean aircraft ang isang powerbank na nakapaloob sa isang bagahe na inilagay sa overhead bin.

Samantala, ayon sa mga eksperto, ginagamitan ang mga powerbank ng lithium-ion batteries na mabilis magliyab lalo na kung mayroon itong defect o damage.

Ikaw, magiging mas maingat ka na ba sa paggamit ng powerbank matapos marinig ang sunud-sunod na insidente dahil sa mga ito?

Hindi inaasahan na nagtapos ang buhay ng isang firefighter paramedic mula sa Kansas City nang saksakin ito ng mismong pasyente na ililigtas sana nila at dadalhin sa ospital.

Ang detalye ng masalimuot na pagkamatay ng lalaki, eto.

Linggo ng umaga nang ipadala ang mga pulis sa North Oak Trafficway para bantayan ang isang babae na nadiskubreng palakad-lakad sa kahabaan ng highway sa nasabing lugar.

Humingi ng tulong at nagpatawag ng medics ang mga otoridad para dalhin ang 39-anyos na babae na tinukoy na si Shanetta Bossell sa ospital.

Dumating ang ambulansya na sakay ang mga firefighter paramedics kabilang ang 29-anyos na si Graham Hoffman na maghahatid sana kay Bossell sa ospital.

Habang nasa byahe ay bigla na lang naglabas ng kutsilyo si Bossell at sinaksak sa puso si Hoffman.

Bigla na lang itinigil ng driver ang ambulansya nang sumigaw dahil sa sakit ang lalaki, at nang bumukas ang pinto ay agad na sinubukan ni Bossell na tumakas ngunit naharang din ito ng mga nakasunod na pulis.

Agad na isinugod sa ospital ang lalaki ngunit binaiwan din ito ng buhay habang nasa ICU dahil sa tindi ng tinamo nitong injuries.

Bukod sa pamilya ni Hoffman, labis din na naapektuhan ang mga nakasama nito sa Kansas City Fire Department (KCFD) simula pa noong 2022. Sa katunayan ay na-offer-an ang mga myembro ng KCFD ng grief counseling dahil sa bigat ng pagkawala ng lalaki.

Nagbigay naman ng kasiguraduhan ang Prosecuting Attorney ng Clay County na si Zachary Thompson na gagawin nila ang lahat, makamit lang ang hustisya.
Samantala, nasa kustodiya naman na ng mga otoridad ang suspek na mayroon na palang naunang kaso na second-degree assault dahil sa pang-aatake sa isang pulis.

Ikaw, ano sa tingin mo ang nararapat na matanggap na parusa ng babae?

Talaga nga naman na kailangang tutukan at maging alerto ng mga magulang o guardian sa pagbabantay sa mga bata lalo na at malilikot ang mga ito at curious sa maraming bagay. Katulad na lang ng bata sa kwento na ito na panandaliang na-trap sa refrigerator matapos pumasok dito habang naglalaro.

Kung ano ang kinahinatnan ng bata, eto.

Sa isang video na nakuhanan sa loob ng tindahan, makikita ang isang lolo na nililinisan ang refrigerator sa kanilang tindahan. Bukod diyan, tinanggalan niya rin ito ng shelves at tinanggal sa pagkakasaksak para i-defrost.

Kasunod naman nito ay makikita ang bagong gising niyang tatlong-taong-gulang na apo na si JK na agad na naglaro sa labas ng kanilang tindahan habang binabantayan ng kaniyang lola.

Nang panandaliang lumabas ang lolo para kuhanan ng shorts ang kaniyang apo ay ang siya namang pagpasok ng bata sa tindahan para kumuha ng juice.

Pero sa halip na kuhanin ang juice, pumasok ang bata sa bakanteng refrigerator, naupo, at isinara ang pinto nito.

Sa pagbalik ng lolo sa tindahan, nakarinig ito ng pag-iyak ng isang bata na inakala niyang nanggaling mula sa labas. Kasunod naman nito ay ang pagdating ng lola na agad na narinig ang pag-iyak ng kaniyang apo na nanggagaling sa loob ng refrigerator at natatarantang pinalabas ang bata.

Dahil sa pag-aalala sa bata ay nakatanggap ng mga negatibong komento ang video pero ayon sa nanay ni JK na si Rona May Gajisan, bilang isang nanay ay hindi niya rin naman daw gugustuhin na may mangyaring hindi maganda sa kaniyang anak. Sinabi niya rin na kaya lang naman umiyak ang bata sa loob ng refrigerator ay dahil takot daw ito sa dilim at sinigurado na walang bata ang naagrabyado sa insidente.

Sa mga magulang diyan, sa paanong paraan kayo nakakasigurado na palagiang ligtas ang mga anak niyo saan man kayo magpunta?

Kung mayroong iba’t ibang uri ng pagmamahal, mayroon ding iba’t ibang klase ng love stories. Katulad ng magkasintahan na ito sa kenya na nagkakilala six decades ago pero noong 2024 lang nagpakasal.

Kung bakit inabot ng mahabang panahon bago nagpakasal ang magkasinatahan, eto.

Taong 1960 nang magkakilala at ma-in love sa isa’t isa ang Kenyan natives na si Ibrahim Mbogo, at Tabitha Wangui.

Nag-viral ang love story ng dalawa nang magpakasal ang mga ito noong 2024 sa edad na 95 at 90.

Ginanap sa isang simbahan sa maliit na bayan ng Mukurweini ang kasal ng dalawa, kung saan makikita sa isang nag-viral na picture na nakasuot ng smart grey suit at silver neck tie si Ibrahim, habang si Tabitha naman ay mayroong puting cap, cream-colored brocade jacket, at white outfit.

Pero sa isang pahayag, sinabi ni ibrahim na kung ang Kikuyu Customs o ang kultura sa Kenya lang din naman ang pagbabasehan, ilang taon na silang legally married ni Tabitha.

Ngunit bilang pareho rin silang Christians, napagdesisyunan ng dalawa na magpakasal din sa simbahan bilang respeto sa kanilang paniniwala.

Samantala, nang tanungin naman kung ano ang sikreto sa kanilang mahabang pagsasama, nagbigay ng advice si Tabitha sa mga kababaihan na irespeto ang kanilang mga asawa at humingi ng tawad kapag nakagawa ng pagkakamali.

Sa mga may asawa diyan, willing ka ba na pakasalan ulit ang asawa mo matapos ang ilang taong pagsasama?

Dahil sa kaniyang obsession na makita ang mga bumbero in action, patung-patong na parusa ang inabot ng isang lalaki sa United Kingdom dahil sa pag-iimbento nito ng emergency para lang makita ang mga bumbero.

Ang buong kwento ng lalaki, eto.

Isang gabi noong September 2023 nang alertuhin ng 26-anyos na lalaki mula sa Ashington, Northumberland na si James Brown ang mga bumbero dahil sa maliit na sunog sa kaniyang bahay dulot ng umano’y spark sa electricity meter.

Agad namang rumesponde ang mga bumbero at hindi nagtagal ay naapula ang maliit na sunog ng mga kumot sa isang cabinet.

Pagkatapos nito ay pinutol na ng mga bumbero ang linya ng kuryente sa bahay ni Brown para maiwasang maulit ang insidente.

Pero makalipas lang ang mahigit isang oras ay nakatanggap na naman ng report ang mga bumbero mula kay Brown dahil nasusunog na naman daw ang mga kumot nito.

Naghinala naman ang mga bumbero sa ikalawang report ng lalaki dahil matatandaan na pinutulan na nila ito ng kuryente.

Nang imbestigahan ang mga pangyayari, nabuko na hindi aksidente ang mga nangyaring sunog at sinadya ng suspek.

Lumabas din sa imbestigasyon na 80 beses na tumawag si Brown sa mga bumbero noong 2022.

Inamin naman ng lalaki sa korte na guilty siya sa two counts of arson at reckless endangerment.

Ayon sa judge, obsessed ang lalaki sa mga bumbero kung kaya sumailalim ang lalaki sa therapy para gamutin ito.

Samantala, pinatawan naman si brown ng walong buwang pagkakakulong, dalawang taong suspension, at 150 hours of community service.

Pinagsisihan naman daw ng lalaki ang ginawa niyang pagsasayang sa resources ng mga bumbero at tinigilan na rin ang mga ito matapos siyang maaresto.

Ikaw, mayroon ka rin bang weird obsession?

Ilang taon na ang nakalipas nang gimbalin ng Corona Virus ang buong mundo at ilang taon na rin ang nagdaan nang magsimulang mag-recover ang mga tao mula rito. Pero mayroon pa palang mga tila hindi maka-move on sa takot sa virus at ilang taon na nagkulong sa bahay dahil dito.

Kung ano ang buong kwento ng pamilya na ito, eto.

Taong 2021 nang lumipat ang pamilya Steffen sa Oviedo, Spain at simula nang dumating ang mga ito ay naging mailap agad sila sa mga kapitbahay.

Sa sobrang pag-iingat ng mga ito, tanging ang philosopher na padre de pamilya na si Christian lang ang lumalabas sa kanilang bahay para mag-receive ng inorder nilang groceries mula sa delivery riders.

Kapansin-pansin din daw na pagpatak ng 5:10 ng hapon ay nakababa na ang window blinds mula sa kwarto ng mga anak nito na 8 at 10 years old na namataang nakasilip.

Ang mga patterns na yan ay nagmula sa obserbasyon ng kapitbahay nila na tinawag sa pangalang Silvia. Tumawag ito sa mga otoridad nang mapansin na ang mga bata sa katapat niyang bahay ay masyado nang matanda para sa mga diaper na nakikita niyang idinedeliver sa bahay ng Steffen family.

Dahil dito ay agad na inimbestigahan ng polisya ang bahay ng nasabing pamilya at doon natagpuan ang nagkakat na maruruming diapers at sanitary napkins ng nanay na si Melissa.

Nang suriin ang mga bata, napag-alaman na mayroong severe constipation ang mga ito dahil hindi raw sila pinapayagang gumamit ng banyo at pinagsusuot lang ng diapers.

Takot daw ang dahilan ng mga magulang kung bakit sila nakakulong sa bahay dahil sa paniniwala na mayroong sakit ang mga anak nila at mamamatay ang mga ito kapag nahawaan ng virus.

Samantala, napilitan lang din ang pamilya na lumipat sa spain matapos matakot ng mag-asawa na maabisuhan ang social services ng germany nang makiusap at ma-deny ang request nila sa eskwelahan ng mga bata na ipagpatuloy ang pag-aaral ng mga ito nang hindi pumapasok sa school.

Gayunman, nakaligtas na ang mga bata habang ang mga magulang naman nila, na ayon sa psychologists ay maaaring mayroong COVID Syndrome, ay mahaharap sa lima hanggang pitong taon na pagkakakulong na maaari pang madagdagan kung mayroon pang madadagdag na reklamo laban sa mga ito.

Sa mga labis na naapektuhan noong pandemic, tuluyan na ba kayong naka-recover o napapraning pa rin kayo kapag nakakaramdam ng mga sintomas ng COVID?

Madalas ay ang bride ang pinakahuling hinihintay na dumating sa kasal at ang kaniyang entrance ang isa sa pinakainaabangan ng mga bisita. Pero ang bride na ito sa Florida, paniguradong grand entrance talaga ang ginawa dahil na-late na nga ito sa mismo niyang kasal, pinahinto pa ng pulis dahil sa humaharurot nitong sasakyan papunta sa venue.

Kung nakahabol sa kasal ang bride, eto.

Sa isang video na in-upload ng Port St. Lucie Police Department, makikita ang isang sasakyan na pinahinto sa gilid ng Crosstown Expressway sa Florida dahil sa bilis ng takbo nito na umabot ng 105 miles per hour.

Kasunod nito ay ang paglapit ng pulis sa sasakyan kung saan makikita ang mga pasahero nito na isang babae at isang lalaki na kapwa bihis na bihis para sa isang okasyon.

Pagkalapit ay tinanong ng pulis ang mga pasahero ng, “whose wedding is it?” na siya namang sinagot ng bride na nakaupo sa passenger’s seat.

Panandalian pang nagtanong ang otoridad sa babae at doon napag-alaman na late na pala ito sa sarili nitong kasal.

2:30 PM nagsimula ang kasal ng babae pero makikita sa body cam footage ng pulis na 2:42 na ng hapon nang pahintuin ang mga ito sa gilid ng expressway.

Sa huli, hinayaan din ng understanding na pulis na makaalis at makahabol sa kasal ang bride pero nagbilin ito sa nagmamaneho ng sasakyan, na isa pala sa mga guests, na magkakaroon ito ng mandatory court appearance at binigyan ng petsa kung kailan ito pupunta sa korte.

Samantala, ayon sa The Denson Firm sa Florida, ang pagmamaneho ng higit 50 miles per hour o paglagpas sa speed limit ng mga highway sa nasabing lugar ay maaaring magresulta sa felony.

Kung ikaw ang bride, papayag ka rin ba na magkaaberya at ma-late ka sa kasal na matagal mong pinaghandaan?

Sa bagong generation ngayon, labanan na ng uniqueness at haba ng pangalan ng mga ipinapanganak na baby. Dahil dito, nacha-challenge ang mga bata sa pagsulat ng mga sarili nilang pangalan. Katulad ng bata sa kwento na ito na umiiyak pa habang sinusubukang isulat nang buo ang kaniyang pangalan!

Kung matagumpay itong naisulat ng bata, alamin.

Sa isang video na kinuhanan sa loob ng bahay ng pamilya Dano, makikita ang 4-year-old na si Victoria Merielle na umiiyak habang tinuturuan ng kaniyang daddy na magsulat.

Ang reklamo ni Merielle, masyado raw kasing mahaba ang pangalan niya!

Pero kagaya ng iba, hango pala sa pangalan ng kaniyang parents na sina Victor at Mariel ang kaniyang pangalan.

Ayon kay Victor, ang madalas daw na isulat ng kaniyang anak sa school ay ang first name nito na Victoria, pero ang pagsusulat sa second name nito na merielle, tila isang malaking challenge para sa bata lalo na at nag-aaral pa lang itong magsulat.

Dahil dito, nag-advice raw ang teacher ni Merielle na sanayin ang writing skills ng bata, kung kaya naman gumawa ng writing material ang kaniyang mommy kung saan kakailanganing mag-trace ni Merielle ng letters.

Samantala, improving naman na ang pagsusulat ni Merielle, pero hindi nga lang daw talaga nito maiwasang magreklamo sa tuwing nagpa-practice.

Para kay victor, naniniwala siya na kapag tuluyan nang nasanay at natuto si Merielle sa pagsusulat ay maa-appreciate rin nito ang kaniyang pangalan.

Soon enough, makakapagsulat din nang diretso si baby Merielle nang hindi na nahihirapan at umiiyak.

Sa mga may anak na pre-school diyan, pwede niyo bang i-share ang nakakatuwang kwento kapag tinuturuan niyo sa pag-aaral ang mga chikiting niyo?