Laya na ang umano’y isa sa mga leader ng New People’s Army (NPA) na si Andrea Rosal, anak ng yumaong NPA Spokesman Gregorio “Ka Roger” Rosal.
Mag-aalas-9:00 kagabi nang lumabas ng Taguig City Jail sa Camp Bagong Diwa ang nakababatang Rosal matapos ibasura ang kanyang kasong murder at kidnapping sa Mauban, Quezon Regional Trial Court Branch 64.
Ayon kay Krissy Conti ng National Union of People’s Lawyer, at abogado ni Andrea, handa nilang kasuhan ang mga nagpakulong sa kanyang kliyente at una rito ang Bureau of Jail Management and Penology (BJMP).
Aminado naman si Rosal na kaunting saya ang kanyang nararamdaman dahil hindi niya kasama ang anak na binawian ng buhay matapos ipanganak habang nasa kulungan noong isang taon.
Magugunitang isinisi sa gobyerno ang pagkamatay ng anak na babae ni Andrea matapos umanong tanggihan ng BJMP ang kanyang hiling na makapagpa-check up.
By Drew Nacino
