Nanawagan si Caloocan 2nd District Representative Edgar “Egay” Erice sa mga kapwa niya mambabatas at sa pamahalaan na wakasan na ang sistema ng political dynasty sa bansa.
Sa panayam ng DWIZ, binigyang-diin ni Congressman Erice na pangunahing dahilan ng korapsyon at pagbagsak ng demokrasya sa Pilipinas ang pagkakaroon ng nasabing sistema.
Anya, sampu sa pinakamahihirap na probinsya sa bansa ay pinamumunuan ng political dynasty.
Ipinunto rin ng mambabatas na noong panahon na malakas pa ang mga political parties tulad ng Nacionalista at Liberal, hindi naging dominante ang mga dinastiya sa pamahalaan. Subalit nang magwakas ang sistemang ito at naging multi-party system ang Pilipinas, lumakas ang kapangyarihan ng mga political families.
Dagdag pa niya, ang ganitong sistema ang dahilan kung bakit nagiging monarkiya ang pamahalaan sa halip na maging demokratiko.
