Nagbabala ang grupong OCTA research na posibleng umabot sa 50,000 hanggang 100,000 ang aktibong kaso ng COVID-19 sa Pilipinas sa gitna ng pagtaas ng case infection sa South Africa at India.
Ipinaliwanag ni OCTA fellow, Dr. Guido David na binabantayan din nila ang COVID-19 situations sa iba pang bansa at nakita sa South Africa ay umakyat ng 1,000 hanggang 4,000 sa loob lamang ng isang linggo.
Tumaas din anya ang mga kaso ng virus sa New Delhi, India at nakababahala ang ganitong scenario.
Ipinunto ni David na tila sumusunod ang Pilipinas sa sitwasyon ng ilang bansang gaya ng South Africa, India at Indonesia.
Dahil dito, may posibilidad anyang makakikita ng pagtaas ng bilang kaso sa Pilipinas sa mga susunod na panahon pero hindi matiyak ng OCTA kung sa Mayo o Hunyo ito magaganap.
Ang sinasabing ugat ng pagtaas sa COVID-19 cases sa South Africa ay ang dalawang bagong sub-variants ng mas nakahahawang Omicron variant na BA.4 at BA.5, habang sa India ay ang Omicron sub-lineage na BA 2.12.
