Hindi pa kumbinsido ang Armed Forces of the Philippines o AFP na suicide bombings ang magkasunod na pagpapasabog sa Jolo, Sulu na ikinasawi ng mahigit dalawampu katao, noong isang linggo.
Taliwas ito sa pahayag nina Pangulong Rodrigo Duterte at Interior Secretary Eduardo Año na mga Indonesian suicide bomber ang nasa likod ng pambobomba.
Ayon kay AFP spokesman, Brig. Gen. Edgard Arevalo, batay sa initial findings ay pinasabog ang improvised explosive device sa loob ng Mount Carmel Cathedral sa pamamagitan ng isang remote controlled device.
Gayunman, hindi pa rin aniya nila isinasantabi ang anggulong suicide bombing hangga’t hindi pa natatapos ang imbestigasyon.
