Limang pambato ng Pilipinas ang sasabak sa World International Mathematical Olympiad (WIMO) na nakatakdang ganapin sa January 7 hanggang 8 sa Bangkok, Thailand.
Kabilang sa mga lalaro sa kompetisyon sina Ma. Cassandra Doque; Christian Ray Malvar; Charlie Quetula; Cesar Alejandro Respicio; at Jesrel Briones Gudoy Jr., na nanalo ng apat na gintong parangal at isang pilak noong August 2021 sa Hong Kong International Mathematical Olympiad.
Ang nasabing kompetisyon ay sasalihan ng 14 na bansa na binubuo ng Hong Kong, China, Indonesia, Singapore, Malaysia, Thailand, Ukraine, Kyrgyzstan, Iran, Taiwan, Vietnam, Myanmar, Cambodia at ang Pilipinas kung saan, magiging libre ang airfare, accommodation, at iba pang gastusin ng mga atleta.
Layunin nitong payamanin at pasiglahin ang interes ng mga kabataan sa pag-aaral ng matematika, palakasin ang kakayahan ng kanilang malikhaing pag-iisip, palawakin ang kanilang pandaigdigang pananaw, itaguyod ang pag-unlad ng elementarya at sekondaryang edukasyon at pakikipagpalitan ng mga kulturang pang-edukasyon sa mga bansa at rehiyon.