Nakumpiska ng mga tauhan ng Bureau Of Customs (BOC) at Philippine Coast Guard (BCG) ang 5.1 milyong pisong halaga ng ‘ukay-ukay’ sa Sorsogon.
Sa pahayag ng BOC-Legazpi, naharang ng border protection team at PCG-Sorsogon sa Matnog Port, ang isang one-wing van truck na may dala ng mga second hand na damit.
Nabatid na mula pa sa Mindanao Avenue sa Quezon City ang nasabing kargamento na binubuo ng 449 na bundles ng mga damit na nakatakda sanang ibiyahe patungong Davao City.
Ayon pa sa BOC, ang pag-aangkat at pagbibiyahe ng second hand na mga damit ay paglabag sa Republic Act 4653 na sumasaklaw sa importation ng mga damit, at sections 118, 1113 at 1401 ng Republic Act 10863 o Customs Modernization and Tariff Act.—sa panulat ni Hya Ludivico
