Buntis patay matapos umanong bugbugin ng live in partner

Patay ang isang apat na buwang buntis na ginang matapos umanong bugbugin ng kanyang live-in partner sa lungsod ng Muntinlupa.

Kinilala ang biktima na si Cecilia Galicia, 19-anyos na nakatira sa barangay Alabang habang hindi pa nagpapakita ang hinihinalang suspek na si Carl David Asehan, 19-anyos.

Ayon sa inisyal na imbestigasyon, naganap ang insidente sa Studio One Condo at sa tindi umano ng bugbog na inabot ng biktima ay binawian ito ng buhay habang ginagamot sa Asian Hospital sa Alabang.

Ayon kay Mang Alex dela Plata, amain ng biktima, posibleng hindi lang bugbog ang inabot ni Cecilia dahil maaaring inuntog pa umano ito ng suspek na pinaniniwalaang nagdulot ng matinding head injuries sa biktima.

Nakitaan din umano ng mga pasa sa mukha at hita ang katawan ng biktima.

Pinaniniwalaang tumakas ang suspek matapos isagawa ang insidente habang dumulog agad sa himpilan ng pulisya ang mga magulang ng biktima.

Isasailalim pa sa autopsy ang bangkay upang matukoy kung ano ang tunay nitong ikinasawi.

Report from Gilbert Perdez

Comments

comments