Bumuo ng ‘3- member panel of prosecutors’ ang DOJ o Department of Justice na hahawak sa preliminary investigation ng kaso ng pagkamatay ni Kian Delos Santos.
Itinalaga ni Officer in Charge Prosecutor General Severino Gaña Jr. sina Senior Assistant State Prosecutor Tofel Austria, Assistant State Prosecutor Amanda Garcia at Associate Prosecution Attorney Moises Acayan sa kasong murder at paglabag sa Anti-Torture Law na isinampa ng magulang ng 17-anyos na binata.
Kabilang sa mga pulis na sinampahan ng kaso sa DOJ sina PO3 Arnel Oares, PO1 Jeremias Pereda, PO1 Jerwin Cruz at ang precinct commander na si Chief Inspector Amor Cerillo at ilang hindi pa pinangalanang pulis.
Matatandaang inakusahan ang 17-anyos na binata na isang drug runner at napatay sa isinagawang drug operation ng Caloocan Police noong Agosto 16.
By Arianne Palma
