Natanggap na ng senado ang General Appropriations Bill o panukalang pambansang budget para sa susunod na taon na inaprubahan ng Kamara.
Ito’y ayon sa tanggapan ni Senador Sonny Angara na chairman ng Senate Committee on Finance.
Ayon naman kay Senador Panfilo Lacson, bagamat may tinukoy siyang constitutional issues sa pag-apruba ng Kamara sa panukalang budget, ikinatuwa naman niya ang naging maagang transmittal nito.
Paliwanag ni Lacson, dahil sa maagang pag-transmit ng Kamara sa naturang panukalang budget, ay magkakaruon ang mga senador ng sapat na panahon para pag-aralan ito at sapat na panahon din para maisalang ito sa Bicameral Conference Committee.
Nauna rito, hiniling ng mga senador na ipadala ng kamara ang panukalang budget sa loob ng linggong ito o bago magtapos ang buwan ng Oktubre para masunod ang kanilang plano na pasimulan ang plenary deliberations hinggil sa budget, oras na bumalik sila sa Nobyembre a-9.
Samantala, iginiit din ni Senador Lacson, na makatitiyak na rin umanong maiiwasan ang pagkakaruon ng re-enacted budget. —ulat mulas kay Celty Ortega-Bueno (Patrol 19)
