Muling nagpatupad ang mga kumpanya ng langis ng tapyas presyo sa kanilang mga produkto.
Epektibo alas-12:00 kaninang hatinggabi nang ilarga ng Flying V at Seaoil ang bente sentimos (P0.20) na rollback sa kada litro ng gasoline, sisenta sentimos (P0.60) sa diesel at singkwenta sentimos (P0.50) sa kerosene.
Nagpatupad din ng kahalintulad na bawas presyo epektibo alas-6:00 ng umaga ang Petron at Shell sa gasolina, diesel at kerosene maging ang PTT Philippines, Phoenix Petroleum, Jetti, Eastern Petroleum at Total maliban sa kerosene.
By Drew Nacino
Mag-iisang taon na umanong nga-nga sa showbusiness ang tinaguriang Queen of All Media na si Kris Aquino.
Magugunitang September 2016 nang layasan ni Kris ang ABS-CBN sa paniniwalang hahabulin siya nito para sa panibagong kontrata kasama ang pagpapabongga pa ng TV show niyang Kris TV.
Ayon sa ilang showbiz insiders, tila nawala na ang “magic” ni Kris dahil umaayaw na sa kaniya o hindi na interesado sa kaniya ang mismong ang mga malalaking network na una nang nagkakadarapa sa kaniya para makuha lamang ang kaniyang serbisyo.
Flopsina nga anila ang trip ni Kris TV Special sa GMA 7 kayat hindi na ito nasundan pa samantalang sinubukan ding mag-TV 5 para sa isang panayam sa Pangulong Rodrigo Duterte na hindi naman sinipot ang programa.
May nagtanong pang netizen kay Kris kung babalik ba sa Kapamilya network na sinagot naman ng dating presidential daughter na: No talks, no offer, sorry!”
Sinabi ni Kris na mas pinagtutuunan niya ng pansin ang digital work aniya niya at Youtube project gayundin ang pagsisimula ng shooting para sa kaniyang iflix.ph project sa mga susunod na araw.
By Judith Larino
Tiniyak ni Pangulong Rodrigo Duterte na kanyang sesertipikahan bilang urgent ang bagong draft ng Bangsamoro Basic Law o BBL.
Ito ang inihayag ni Pangulong Duterte matapos niyang tanggapin sa Malacañang ang kopya ng panukalang BBL, kahapon.
Ayon sa Pangulo, dapat mapabilis ang pagpasa sa BBL upang tuluyan ng magwakas ang rebelyon at magbigay daan sa pag-unlad ng Mindanao.
Isinumite ng Bangsamoro Transition Commission sa pangunguna ng Moro Islamic Liberation Front ang proposed BBL isang linggo bago ang ikalawang State of the Nation Address o SONAng Pangulo.
Joint communication plan
Isang joint communication plan ang nilagdaan ng peace panels ng gobyerno at MILF para maisulong ang ratification ng BBL o Bangsamoro Basic Law.
Winelcome ni GPH Implementing Panel Chair Irene Santiago ang nasabing plano dahil maituturing aniyang ultimate goal nila ay magpatuloy ang positibong public opinion sa BBL at makakuha ng suporta sa pagpapatupad ng Bangsamoro Transition Authority sa July 2018.
Sa ilalim ng joint communication plan, bubuo ng iisang mensahe ang GPH at MILF para maipaabot pa sa taumbayan ang mga positibong dulot ng BBL.
Kabilang sa communication plan ang paggawa ng information campaign materials tulad ng flyers, brochures at advertisements, pagsasagawa ng seminar, workshop at social experiments.
Bukod pa ito sa gagawing website at social media accounts.
Binigyang diin ni Santiago na pinanghahawakan nila ang suporta ng publiko sa BBL base na rin sa resulta ng survey ng SWS na nagsasabing mas maraming Pilipino ang sang-ayong mapag-iisa ang mga Pilipino kapag nabigyan ng tunay na awtonomiya ang Bangsamoro.
By Drew Nacino / Judith Larino
Naubos na ang pagtitimpi ni Pangulong Rodrigo Duterte kay Ombudsman Conchita Carpio Morales kaya’t binuweltahan ito sa issue ng mga kriminal.
Sa kanyang talumpati sa oath taking ng mga appointed official sa Malacañang, sinabi ng Pangulo na walang control ang bunganga ni Morales at nagmimistula itong konsensiya ng komunidad.
Wala anyang kaalam-alam si Morales na bumalik na ang illegal drug trade sa New Bilibid Prison o NBP sa Muntinlupa City dahil wala itong ginawa kundi umupo sa kanyang tanggapan.
Mismong ang tanggapan aniya ng Tanod Bayan ay balot din ng katiwalian pero tila hindi alam ni Morales.
PAKINGGAN: Bahagi ng pahayag ni Pangulong Rodrigo Duterte
By Drew Nacino / ulat ni Aileen Taliping (Patrol 23)
Hindi pa naisisilbi ng pambansang pulisya sa grupo ni Supt. Marvin Marcos ang suspension order sa kanila kaugnay sa kinahaharap nilang kasong administratibo bunsod ng pagpatay kay dating Albuera Mayor Rolando Espinosa sr.
Ito ang nilinaw ni PNP Chief Dir/Gen. Ronald Bato Dela Rosa dahil sa may nakabinbin pang Motion for Reconsideration sa Korte ang kampo ni Marcos at ng 19 na iba pang pulis.
Batay sa nilagdaang rekumendasyon ng PNP Chief, pinapatawan ng 4 na buwang suspensyon si Marcos habang demotion naman ng isang ranggo para sa kaniyang mga kapwa akusado sa krimen.
Ngunit pagtitiyak ni Dela Rosa, kanilang ipatutuapad ang nasabing kautusan sakaling ibasura ng Korte ang inihaing mosyon ng mga akusado.
By: Jaymark Dagala
Itinuturing ng Malacañang na magandang balita ang Pulse Asia Survey kung saan si Pangulong Rodrigo Duterte ang “most appreciated” government official sa bansa.
Ayon kay Presidential Spokesman Ernesto Abella, kilala ang Pangulo na hindi nagbubuhat ng sariling bangko kaya’t aasahang ibabahagi niya ang kredito sa kanyang mga gabinete pati na ang partisipasyon ng lahat ng ahensya ng pamahalaan.
Kilala ang Pangulo na prangka at direktang magsalita dahil gusto niyang maisulong ang mga pagbabagong nais ipatupad sa gobyerno.
Batay sa survey ng Pulse Asia na noong June 24 hanggang 29, nakakuha ang Pangulo ng 82 percent, pinakamataas na marka sa lahat ng top officials na kasama sa survey.
Kabilang sa mga opisyal na isinama sa survey ay sina Vice-President Leni Robredo na nakakuha ng 61 percent; Senate President Aquilino Pimentel III, 62 percent; House Speaker Pantaleon Alvarez na may 43 percent approval rating at Chief Justice Maria Lourdes Sereno na nakakuha ng 48 percent approval rating.
By Drew Nacino / ulat ni Aileen Taliping (Patrol 23)
