Binalaan ni Pangulong Rodrigo Duterte ang mga human rights advocate na patuloy na tumutuligsa sa kanyang kampanya kontra iligal na droga.
Sa kanyang pagdalo kahapon sa inagurasyon ng Gov. Miranda Bridge II sa Tagum City, Davao del Norte, iprinisinta ng Pangulo kung gaano kalala ang problema ng Pilipinas sa droga.
May pagkakataon pa aniya na para makaiwas sa kaso ang isang drug suspect, idedepensa ng abogado ng mga ito na wala sila sa sariling katinuan nang magawa ang krimen.
Iginiit pa ng Pangulo na umaabot na sa 77,000 drug-connected at homicide cases ang naitala sa mga nakalipas na administrasyon.
Bunsod nito, sinabi ng Pangulo na sisikapin niyang matapos ang drug war sa loob ng tatlong taon.
By: Meann Tanbio
Muling binira ni Pangulong Rodrigo Duterte ang sinibak na si dating DILG Secretary Ismael Sueno.
Sa kanyang talumpati sa Davao Del Norte, sinabi ng Pangulo na noong nagsisilbi pa sa gobyerno si Sueno, nagsinungaling ito matapos matuklasang gumamit ng wangwang o sirena para makaiwas sa matinding trapiko.
Iginiit ng Pangulo na mahigpit niyang ipinagbabawal sa kanyang mga gabinete ang paggamit ng wangwang at ang ‘number 6 plate’.
Matatandaang sinibak ng Pangulo si Sueno dahil sa maanomalyang firetruck deal sa Austrian government.
By: Meann Tanbio
“BRING IT ON”
Ito ang binitiwang pahayag ni Ombudsman Conchita Carpio Morales matapos siyang bantaan ng VACC o Volunteers Against Crime and Corruption na sasampahan siya ng impeachment complaint.
Iginiit ni morales na hindi siya nababahala sa naturang banta ni VACC Chairman Dante Jimenez.
Sinabi pa ni Morales na sakaling ituloy ng grupo ni Jimenez ang paghahain ng impeachment complaint sa kongreso, handa niya itong sagutin punto por punto
By: Meann Tanbio / Jill Resontoc
Nanindigan ang Malakanyang na kinonsulta ang mga economic managers sa gobyerno bago nagpasya si Pangulong Rodrigo Duterte na putulin na ang mga tinatanggap na tulong mula sa European Union.
Ito ang tugon ng palasyo makaraang ihayag ni NEDA Director General Ernesto pernia Na hindi nakonsulta ang economic team at hindi rin natalakay sa cabinet meeting ang isyu sa pagkansela ng aid mula sa E.U.
Sinabi ni Presidential Spokesman Ernesto Abella Na sa kanyang pagkakaalam, nanggaling sa Department of Finance ang rekomendasyon kaya’t mali aniyang sabihin na hindi sila nakonsulta sa bagay na ito.
By: Meann Tanbio / Aileen Taliping
Mahigpit ang ipatutupad na seguridad ng Manila Police District sa Quiapo, Manila partikular na sa islamic center sa pagsisimula ng Ramadan sa Mayo 26.
Ayon kay MPD Director Joel Coronel, posibleng madagdagan pa ang nauna nang ipinakalat na mahigit 400 pulis sa Quiapo matapos ang pambobomba sa lugar ngayong buwan.
Gayunman, sinabi ni Coronel na nakadepende ito sa intelligence reports na kanilang matatanggap sa napapalapit na pag-aayuno ng mga muslim na buwan ng Ramadan.
Siniguro rin ng opisyal na tuluy-tuloy ang kanilang pakikipag-ugnayan sa mga muslim leaders.
By: Meann Tanbio
Nanumpa na si dating Senador Alan Peter Cayetano kay Pangulong Rodrigo Duterte bilang bagong kalihim ng Department of Foreign Affairs.
Ginanap ang oath taking ceremony sa Presidential guest house sa Panacan, Davao city kahapon.
Matapos makumpirma si Cayetano sa Commission on Appointments, nagtungo siya sa davao kasama ang kanyang pamilya para manumpa sa harap ng Pangulo.
Kasama ng kalihim ang asawang si Taguig City Mayor Lanie Cayetano, Senador Pia Cayetano at film director Lino Cayetano.
By: Meann Tanbio / Aileen Taliping
Pirmado na ni Pangulong Rodrigo Duterte ang Executive Order na nagtatakda ng Nationwide Smoking Ban sa mga pampublikong lugar.
Ayon sa Office of the Executive Secretary, nilagdaan ni Pangulong Duterte ang E.O. Number 26 noong Mayo 16.
Kaugnay nito, sinabi ni health SECRETARY Paulyn Ubial na napapahon ang paglagda Sa E.O. dahil ipagdiriwang “World No Tobacco DAY” SA MAYo 31.
Sa ilalim ng kautusan ,bawal ang paninigarilyo sa mga pampublikong lugar, indoor man o outdoor.
By: Meann Tanbio / Aileen Taliping
Laya na si Marine Lt. Col. Ferdinand Marcelino matapos bawiin ng Department of Justice ang paghaharap ng mga kasong may kinalaman sa conspiracy, manufacture at possession of illegal drugs laban sa kanya at Chinese interpreter na si Yan Yi Shou.
Pasado alas 5:00 ng hapon kahapon nang makalabas si Marcelino mula sa detention cell ng Intelligence Service ng AFP sa Camp Aguinaldo.
Mismong si Public Attorney’s Office Chief Percida Acosta ang naghatid ng release order ng korte sa kampo at siyang nagsundo kay Marcelino.
Emosyonal namang humarap sa media si Marcelino.
Aniya, pinapatawad niya ang mga operatiba na humuli at nagpakulong sa kanya.
Naniniwala si Marcelino na walang mali sa naging desisyon ng DOJ makaraan siyang absweltuhin sa kaso.
Ngayong laya na, maaari nang makabalik sa military service si Marcelino lalo’t aktibo pa siyang miyembro ng Philippine Marines.
By: Meann Tanbio / Jonathan Andal
Nanguna si COMELEC Chairman Andres Bautista sa pinakamayamang head ng limang Constitutional Commissions sa Gobyerno.
Batay sa isinumiteng Sal-N o Statement of Assets, Liabilities and Net Worth para sa taong 2016, may kabuuang P176.3 Million si Bautista, mas mataas ng P6 million mula sa kanyang 2015 net worth na P170.3 million.
Lumalabas din na mayroong total assets si Bautista na P241.8 million, kabilang na ang P158.5-million halaga ng real properties, P83.3-million personal properties, habang umaabot sa P65.5 million ang kanyang liabilities.
Pumangalawa kay Bautista si Ombudsman Conchita Carpio Morales na mayroong kabuuang net worth na P54.13 million noong 2016, o P2.02 million mas mataas sa kanyang 2015 net worth na P52.11 million.
Pangatlo si Commission on Audit Chairman Micheal Aguinaldo na may P51.07 million net worth noong 2016, mas mataas ng P4.66 million mula sa kanyang 2015 net worth na P46.41 million.
Nasa pang-apat na pwesto si Civil Service Commission Chairperson Alicia Bala, na may 2016 net worth na P21.86 million, mas mataas ng P8.77 million mula sa kanyang 2015 net worth na P13.07 million.
Panghuli naman si Commission on Human Rights Chairman Chito Gascon na mayroong kabuuang P6.08 million net worth, mas mataas ng P729,824.66 mula sa kanyang 2015 net worth na P5.35 million.
By: Meann Tanbio