Kumbinsido ang AFP o Armed Forces of the Philippines na diversionary tactic ng Abu Sayyaf ang ginawang pananambang sa mga sundalo sa Patikul, Sulu noong Huwebes, Mayo 25.
Ayon kay AFP Chief of Staff Eduardo Año, malaking insidente ang nangyari sa Marawi City na hanggang sa ngayon ay kanilang nire-resolba.
Aniya, ang naganap naman ambush sa Sulu ay posibleng diversionary tactic ng Abu Sayyaf bilang suporta sa mga umatake naman sa Marawi.
Isang sundalo ang nasawi habang sampung (10) iba pa ang nasugatan sa pagsalakay ng hindi bababa sa sampu (15) hanggang labinlimang (15) bandido sa bayan ng Patikul, Huwebes ng umaga.
By Meann Tanbio
Naitala sa India ang kauna-unahang kaso ng Zika virus.
Ayon sa World Health Organization, ang India ang panibagong bansa na apektado ngayon ng mosquito-borne virus.
Kabilang sa epekto ng Zika virus ay ang pagkakaroon ng microcephaly sa mga sanggol.
Mula nang napaulat ang pagkalat ng Zika virus noong kalagitnaan ng 2015, aabot na sa 1.5 milyong katao ang naapektuhan ng virus na karamihan ay mula sa Brazil at iba pang bansa sa South America.
By Meann Tanbio
Nadagdagan pa ang mga bansa na naglabas ng travel advisory kasunod ng pagdedeklara ng martial law sa Mindanao.
Sa inilabas na kalatas, inabisuhan ng GAC o Global Affairs Canada ang kanilang mga kababayan na iwasan ang pagtungo sa Mindanao region, maliban na lang sa Davao City, dahil sa seryosong banta ng terror attack at kidnapping.
Nakasaad din sa advisory na limitado ang pagbibigay ng consular assistance ng Canada sa rehiyon.
Bukod dito, nagpaalala din ang GAC sa kanilang citizens na huwag nang magpunta sa Davao City kung hindi naman importante at umiwas din sa pagbiyahe sa Sulu archipelago at sa Southern Sulu sea, kabilang na ang palawan, dahil naman sa banta ng pirata at kidnapping.
Nagpaala din ang Canada sa kanilang mga kababayan na bumibisita at naninirahan sa Mindanao na maging alerto at iwasan ang matataong lugar.
Una nang nagpalabas ng travel advisory ang United States at United Kingdom dahil sa bakbakan sa Marawi City at deklarasyon ng batas militar sa Mindanao.
By Meann Tanbio
Nanindigan ang CHR o Commission on Human Rights na iligal ang warrantless arrest kasunod ng deklarasyon ni Pangulong Rodrigo Duterte na martial law sa Mindanao.
Ginawa ng CHR ang naturang pahayag makaraang sabihin ng pangulo na maaaring mag-aresto ang mga awtoridad nang walang arrest warrant at maghalughog ng mga bahay sa ilalabas na arrest search and seizure order na pirmado ni AFP Chief of Staff General Eduardo Año.
Ayon sa CHR, ipinagbabawal ang naging kautusan ng pangulo sa 1987 constitution dahil mayroong lehislatura at sinusunod na protocol kaugnay nito upang masigurong hindi na mauulit ang umano’y pang-aabuso noong martial law ni dating Pangulong Ferdinand Marcos.
Tinukoy din ng CHR ang nakapaloob sa ilalim ng section 5, Rule 113 ng rules of court na hindi maaaring humuli o dumakip nang walang arrest warrant kahit nasa ilalim ng batas militar ang isang bansa.
Maaari lang anilang gawin ito kung nasaksihan mismo ng awtoridad ang krimen at kung isang takas na bilanggo batay sa rules on criminal procedure.
By Meann Tanbio
Dalawang pelikulang Pilipino ang nakatakdang ipalabas sa 41st San Franscisco International LGBTQ Film Festival sa Amerika, sa Hunyo 15 hanggang 25.
Mapapanood sa nasabing film fest ang mga obra ni Victor Kaiba Villanueva na “Patay Na Si Hesus” at Samantha Lee na “Baka Bukas” makaraang mapili ng mga organizer dahil sumasalamin ang mga ito sa mga kakaibang istorya sa mundo.
Layunin din ng San Francisco Fest o Frameline na parangalan ang mga legendary filmmaker at tumuklas ng mga bagong talento.
Ang pelikula ni Villanueva na istoryang sumasalamin sa buhay ng pamilyang Pilipino ay pinagbibidahan ng Cannes best actress na si Jaclyn Jose habang ang obra ni Lee ay istoryang tumatalakay sa lesbian life sa pananaw ng bawat Pinoy.
By Drew Nacino
Hindi pa isinasara ng veteran basketball player na si Willie Miller ang posibilidad ng kanyang pagbabalik Philippine Basketball Association (PBA).
Ayon kay Miller, kung mayroong mga team na nangangailangan ng kanyang tulong at pursigidong makasungkit ng kampyonato ay handa siyang maglaro muli.
Taong 2015 pa naglaro sa PBA ang 15-year veteran para sa Talk and Text Tropang Texters na nagkampyon naman sa Commissioner’s Cup 2015.
Dalawang beses din naging Most Valuable Player (MVP) at mayroong apat na championship si Miller sa PBA.
Matapos nito ay naglaro ang veteran guard sa ASEAN Basketball League para sa Pilipinas MX3 Kings.
By Drew Nacino
Libu-libong pasahero ang apektado sa kanselasyon ng lahat ng flights ng British Airways sa Heathrow at Gatwick Airports, ang dalawang pinakamalaking paliparan sa London, United Kingdom.
Ito’y makaraang pumalya ang IT system ng airline kaya’t nabalam din ang kanilang flight operations sa iba’t ibang panig ng mundo.
Hindi pa mabatid ng British Airways kung ano ang sanhi ng system failure at wala ring ebidensya na isa itong uri ng cyber-attack.
Bagaman asahan na hanggang ngayong araw ang mga flight delay, humingi na ng pang-unawa ang airline sa mga apektado nilang pasahero.
By Drew Nacino
Isang pitumpung (70) taong gulang na lalaki ang sugatan sa pagsabog ng limang granada sa bayan ng Datu Hoffer Ampatuan, Maguindanao.
Ayon sa Philippine National Police, tinamaan sa mukha ang biktima ng shrapnel mula sa M203 grenade.
Dakong ala sais y medya kagabi nang maganap ang insidente sa Maguindanao Provincial Police Office.
Ilang hindi nakilalang lalaki ang naghagis ng limang granada sa naturang lugar.
Hindi pa mabatid kung ano ang motibo at grupo ang kinabibilangan ng mga nasa likod ng pag-atake.
By Drew Nacino
Inalis na ng Supreme Court (SC) ang temporary restraining order laban sa kontrobersyal na Torre de Manila sa Taft Avenue, Maynila.
Sa desisyon ng SC na pinonente ni Senior Associate Justice Antonio Carpio, walang nakitang paglabag ang mga mahistrado sa batas sa panig ng DMCI na developer ng 49-storey condominium.
Pinaboran ang pasya ng walo pang mahistrado sa pangunguna ni Chief Justice Maria Lourdes Sereno, Associate Justices Presbitero Velasco Junior, Lucas Bersamin, Mariano del Castillo, Bienvenido Reyes, Estela Perlas-Bernabe, Marvic leonen at Noel Tijam.
Bumoto naman kontra sa konstruksyon ng Torre de Manila sina Associate Justices Francis Jardeleza, Samuel Martires, Teresita de Castro, Diosdado Peralta, Jose Mendoza at Alfredo Caguioa.
Wala ring nakitang pruweba ang Korte Suprema na may masamang epekto sa komunidad ang pagpapatayo ng nasabing gusali.
Ipinaliwanag ng high court na walang batas na nagsasabing bawal ang pagtatayo ng building sa labas ng boundaries ng isang historic site o facility kung saan maka-aapekto ang gusali sa background o view ng makasaysayang lugar gaya ng bantayog ng pambansang bayaning si Dr. Jose Rizal.
Ipinunto pa ng kataas-taasang hukuman na hindi naman binabanggit sa Republic Act 10066 o National Cultural Heritage Act of 2009 na maaaring maging “subject” sa cease-and-desist order ang isang gusali o property kung nakasasagabal ito sa view ng isang heritage site.
By Drew Nacino