Napasakamay ng Los Angeles Lakers ang unang panalo matapos ang apat na talo.
Pinahiya ng Lakers ang Brooklyn Nets sa final score na 104-98.
Pinangunahan ni Kobe Bryant ang Lakers na nagtala ng 18 points samantalang nagdagdag naman ng tig-16 points sina Jordan Clarkson at D’ Angelo Russell.
Samantala, bigo naman ang Miami Heat na manalo kontra Indiana Pacers at talo naman ang New Orleans Pelicans kontra Atlanta Hawks.
By Judith Larino
Naninindigan ang Malakaniyang sa pagkontra sa batikos na mabagal na pagpapatupad ng recovery plan sa mga biktima ng bagyong Yolanda.
Nakatakdang gunitain bukas ang ikalawang anibersaryo ng kalamidad kung saan dumadagsa pa rin ang mga reklamo ng mga biktima partikular sa pangakong permanent housing and relocation.
Lumalabas sa report ng Commission on Audit na ilan daang milyong pisong donasyon at pondo para sa mga Yolanda victim ang nananatili pa rin sa isang bangko at pinuna ang Office of Civil Defense sa mabagal na pagkilos.
Ayon kay Deputy Presidential Spokesperson Abigail Valte, pagkuha ng land title at paghahanap ng relocation sites ang ilan sa mga balakid sa isinusulong nilang mabilis na pagpapatayo ng mga bahay at iba pang istruktura sa mga sinira ng kalamidad.
Binigyang diin pa ni Valte na may proseso rin ang pagkilala sa mga totoong naulila sa bagyo habang idinadaan din sa dna testing ang pagkilala sa mga labi.
Muling tiniyak ng Malakaniyang ang pagkilos para mapabilis ang proseso at makumpleto ang recovery plan ng gobyerno.
By Judith Larino
Nasa ospital si suspended FIFA President Sepp Blatter upang magpa-medical check up.
Ito ang sinabi ng kaniyang abogado na si Atty. Richard Cullen pero hindi na nito idinetalye pa ang kalagayan ng kliyente.
Pero base sa mga ulat, nakararanas ng stress si Blatter matapos suspendehin dahil sa umano’y isyu ng korapsyon sa pamunuan ng FIFA.
Una na namang itinanggi ni Blatter ang naturang akusasyon.
By Allan Francisco
Umabot na sa mahigit 24,000 ang lumagda sa petisyon ng mga OFW upang kondenahin ang umano’y tanim o laglag bala modus sa NAIA.
Batay sa change.org, ang petisyon ay may titulong “hanapin ang katotohanan, imbestigahan at pigilan ang laglag-bala extort modus sa NAIA”.
Ayon sa naturang petisyon, nais paimbestigahan ng mga OFW ang umano’y scam dahil kawawa anila ang mga nabibiktima kabilang na ang mga kapwa nila OFW.
Lumiliit na anila ang tingin ng mga tao sa mga OFW, partikular sa Hong Kong dahil sa naturang isyu.
By Allan Francisco
Pumalo sa mahigit 50 milyong Pilipino ang mga rehistradong botante para sa 2016 elections ayon sa COMELEC.
Sinabi ni COMELEC Chairperson Andres Bautista na mas mataas ito ng 2 milyon kumpara sa nakaraang halalan.
Posible pa rin aniya itong tumaas kapag dumating na ang datos mula sa Autonomous Region in Muslim Mindanao o ARMM.
Hindi naman na tinukoy ni Bautista kung bakit naantala ang datos ng mga rehistradong botante mula sa ARMM.
Overseas absentee voters
Samantala, nasa 1.3 million na Pilipino ang rehistradong overseas absentee voters para sa 2016 elections ayon kay COMELEC Spokesperson James Jimenez.
Umaasa din sila na papalo pa ito sa target nilang 1.5 million kapag nagreport na ang lahat ng Philippine diplomatic posts.
Ayon kay Jimenez, malaki ang naitulong ng social media sa paghikayat sa mga botante na magparehistro.
Bukod dito, Presidential elections kasi ang mangyayari sa susunod na taon kaya marami aniya ang interesado.
By Allan Francisco
Pinaalalahanan ni Senator Grace Poe na hindi lamang siya ang maapektuhan kundi maging ang libu-libo pang mga abandonadong mga bata sa bansa.
Ito ay sa oras na desisyunan na ng Senate Electoral Tribunal ang disqualification case na isinampa laban sa senadora.
Ayon kay Poe, sa oras na ma-disqualify siya dahil sa hindi matukoy ang kanyang mga magulang ay otomatiko itong magre-reflect sa kalagayan ng iba pang mga foundling tulad niya.
Kaugnay nito, tiwala si Poe sa kanyang mga kasamahang senador na miyembro ng SET at sa iba pang miyembro ng tribunal na mananaig pa rin ang hustisya at pagkakapantay-pantay.
By Rianne Briones
Natagpuang patay ang kilalang adviser ni Russian President Vladimir Putin sa isang hotel sa Washington DC.
Natagpuan ang bangkay ni Mikhail Lesin, isang Russian millionaire at dating hepe ng Media Affairs ng Russian government sa tinutuluyan nitong kuwarto sa Hotel Dupont.
Hindi malinaw kung ano ang ginagawa ni Lesin sa Amerika gayundin ang dahilan ng kanyang pagkamatay.
Nagtutulungan na ang American at Russian authorities sa pag-iimbestiga sa naturang insidente.
By Rianne Briones
Bukas ang Malacañang na makipag-usap sa mga magbababoy upang hindi matuloy ang bantang pork holiday ngayong panahon ng Kapaskuhan.
Ayon kay Presidential Deputy Spokesperson Abigail Valte, nakahanda ang pamahalaan na makinig sa mga hinaing ng mga nasa likod ng industriya ng baboy at iba pang mga poultry products.
Ilan sa mga concern ng mga ito ay sinusolusyunan na ng gobyerno tulad ng paghihigpit ng Bureau of Customs sa mga pumapasok na poultry products sa bansa.
Una rito ay nagbanta ang Swine Development Council na maglulunsad sila ng pork holiday dahil hanggang ngayon ay nagpapatuloy pa rin ang talamak na smuggling ng karne ng baboy sa bansa.
By Rianne Briones
Nakatakdang isumite ng National Bureau of Investigation (NBI) ang kanilang unang progress report sa kobtrobersiyal na ‘laglag-bala’ scam sa Ninoy Aquino International Airport.
Ayon kay Task Force Talaba Head Agent Manny Eduarte, anumang araw ngayong weekend o sa Lunes ay mahahawakan na ni Justice Secretary Benjamin Caguioa ang kanilang inisyal findings.
Matatandaang binigyan lamang ni Caguioa ng 15 araw ang ahensya upang magsumite ng report sa umano’y scam sa NAIA.
By Rianne Briones
Patay ang 3 katao at 1 ang sugatan sa masaker sa Isabela, Negros Occidental.
Kabilang sa mga nasawi ang mag-asawang Ricardo at Consuelo Carpentero, kapwa 60 taong gulang at anak nilang si Carlo.
Samantala, ginagamot naman sa Western Visayas Regional Hospital ang isa pang anak ng mag-asawang karpentero na si Shiela.
Itinuturong suspek sa krimen ang isang Jemar Carpio na tinutugis na ng mga otoridad.
Inaalam na ng mga otoridad ang motibo sa pag-masaker sa naturang pamilya.
By Judith Larino