June 2026

Paiiralin ng pamahalaan ang ‘no wang-wang policy’ sa pagdating ng iba’t ibang pinuno ng mga bansang dadalo sa Asia Pacific Economic Cooperation o APEC Summit sa susunod na linggo.

Ayon kay APEC National Organizing Council Director General Ambassador Marciano Paynor, walang dahilan para gumamit ng sirena para manghawi ng mga sasakyan sa lansangan.

Kasama aniya ito sa mga preparasyon para matiyak ang maayos at ligtas na pagdating at pagdaan ng mga delegado ng APEC Summit.

Batid aniya ng lahat na bawal ang paggamit ng wang-wang at magandang polisiya aniya ito ng gobyerno kaya’t hindi exempted dito ang lider ng iba’t ibang bansa.

Tanging ang mga ambulansya lamang ang papayagang gumamit ng wang-wang o sirena lalo na kapag emergency.

By Jaymark Dagala | Aileen Taliping (Patrol 23)  

Sarado ang United States Embassy at iba pang tanggapan nito sa Maynila bukas, Nobyembre 11.

Ito’y bunsod ng pag-obserba ng Veterans Day na isang holiday sa Amerika.

Muli namang babalik ang regular na pagseserbisyo ng embahada at gayundin ng mga affiliated office nito sa Huwebes, Nobyembre 12.

Taun-taong ipinagdiriwang sa Estados Unidos ang Veterans Day para magbigay pugay sa mga beteranong sundalo.

By Jelbert Perdez 

Gumulong na ang imbestigasyon laban sa 3 sundalo na umano’y gumahasa sa isang 14-anyos na dalagita na miyembro ng tribung Lumad sa Davao del Norte.

Sina Private First Class Joffrey Galot, PFC Stanly Revil at PFC John Banilla ay kapwa naghain ng “not guilty plea” sa General Court Martial o GCM matapos ipagharap ng kasong paglabag sa Articles of War 97.

Ayon kay Captain Rhyan Batchar, Public Affairs Head ng Army’s 10th Infantry Division, nakapagsumite na rin ng documentary evidence ang prosekusyon sa naturang kaso.

Ang pamilya ng biktima ay kabilang sa mga lumad na nanunuluyan ngayon sa isang church compound bunsod ng umano’y militarization sa kanilang komunidad.

By  Jelbert Perdez 

Sumadsad na naman ang halaga ng piso kontra dolyar.

Ito’y matapos magsara ang piso sa P47.16 kahapon na mas mahina sa P46.93 na naitala noong isang linggo.

Inaasahang magbubukas ang palitan ngayong araw sa pagitan ng P47.00 at P47.20.

Ang paghina ng piso ay sinasabing bunsod ng gumagandang ekonomiya ng Estados Unidos.

By Jelbert Perdez 

Ipinag-utos ng Pasay City Prosecutors Office ang pagpapalaya sa 12 katao na umano’y biktima ng “tanim-bala” sa NAIA.

Sa resolusyon na nilagdaan ni Prosecutor Nolasco Fernandez Jr., walang nakitang sapat na basehan para usigin sa kasong paglabag sa Republic Act 10591 o Comprehensive Firearms and Ammunition Regulation Act ang mga respondent.

Ang mga ito ay sina Rufina Cruz, Melody Valdez, Marlou Espanola, Rowena Otic, Milagros Cadiente, at Mildred Botog.

Kabilang din sa mga respondent sina Ma. Josephine Rabano, Shine Enola, Rey Salado, Ryan Rosales, Santiago Cabrera, at Gloria Ortinez.

Giit ng piskal, nabigo ang mga otoridad na isailalim sa ballistic examination ang mga nakumpiskang bala upang matukoy kung live ammunition nga ang mga ito.

By  Jelbert Perdez 

Simpleng salary increase lamang ang isinusulong na umento sa sahod ng mga kawani ng gobyerno.

Sa panayam ng DWIZ, binigyang diin ni Teachers’ Dignity Coalition Head Benjo Basas na dapat mataas ang suweldo ng mga guro dahil sa ibang bansa aniya’y itinuturing na kapantay nila sa wage system ang mga abogado at engineer.

Ayon kay Basas, ang mga government teacher ay mayroon lamang salary grade 11 o katumbas ng P18,000 na sahod.

“Teaching is the most important job, and the single most important factor in an education system, so nagtataka kami kung bakit ang mga teachers ay kailangang ilagay sa napakababang salary grade.” Pahayag ni Basas.

By Jelbert Perdez | Ratsada Balita 

Inaasahang tatamaan ng matinding dry spell dulot ng El Niño ang 12 mga lalawigan sa bansa na tatagal pa hanggang sa kalagitnaan ng 2016 ayon sa Philippine Atmospheric, Geophysical and Astronomical Services Administration (PAGASA).

Dahil dito, inaasahang aabot sa 60-porsyentong kakulangan sa aktwal na dami ng ulan ang mararanasan ng bansa sa mga susunod na buwan.

Partikular na makakaranas ng matinding tagtuyot ang mga lalawigan ng Quezon, Camarines Norte at Sarangani na nauna nang kinakitaan ng kakapusan ng pag-ulan sa nakalipas na mga buwan.

Inalerto na rin ng pagasa ang mga lalawigan ng Laguna, Mindoro Occidental, Mindoro Oriental, Romblon, Aklan, Antique, Guimaras, Biliran at North Cotabato.

Puspusan na ang ginagawang paghahanda ng Department of Agriculture (DA) at naghahanap na rin sila ng iba pang solusyon kung paano mababawasan ang hinaharap na problema ng sektor ng agrikultura sa bansa.

By: Mariboy Ysibido

Walang signal jamming na mararanasan sa mga cellphone sa Asia-Pacific Economic Cooperation leaders’ meeting sa susunod na linggo.

Ito ang sinabi ni Philippine National Police (PNP) Chief Ricardo Marquez. Ayon kay Marquez, walang indikasyon na uulitin nila ang pagpatay ng cellphone signal na ginawa nang bumisita sa bansa si Pope Francis noong nakaraang buwan ng enero.

Paliwanag ni Marquez, wala pang pinal na plano ukol sa signal cut off sa mga lugar kung saan isasagawa ang pulong at maging sa mga hotel na tutuluyan ng mga delegado.

Nabatid na simula sa Nobyembre 12 ay mayroon nang mga aktibidad bago ang leaders’ summit sa Nobyembre 18-19 at inaasahan namang Nobyembre 16 magsisimulang magdatingan ang mga world leaders at aalis ng Nobyembre 20.

By: Mariboy Ysibido