June 2026

Sasamahan ng Aquino’s sisters sa mga lakad ang mga maybahay ng mga world leaders na dadalo sa Asia-Pacific economic Cooperation (APEC) summit sa Maynila.

Magsisilbing tour guide din ang presidential sisters sa mga first ladies sa Intramuros tour ng mga ito.

Ito ang kinumpirma ni Ambassador Marciano Paynor Jr., head ng APEC 2015 National Organizing Council.

Sasamahan din nila presidential sisters Ballsy Cruz, Pinky Abellada, Viel Dee at Kris Aquino ang mga maybahay ng APEC leaders sakaling mag shopping ang mga ito.

Sinabi ni Paynor na gagampanan ng presidential sisters ang pagiging host sa mga asawa ng mga APEC leaders dahil binata ang Pangulong Aquino.

Nabatid na kasama ng ilan sa mga APEC leaders ang kanilang mga maybahay.

Habang si Russian President Vladimir Putin ay nagpa divorce noong isang taon.

Samantalang single naman gaya ni PNoy si South Korea President Park Geun-Hye.

By: Mariboy Ysibido

Nagpaliwanag ang Malakaniyang kung bakit ngayon lamang isinulong ng administrasyong Aquino ang panukalang dagdag sahod para sa mga kawani ng gobyerno.

Sa harap na rin ito ng batikos na baka gamitin ito bilang pampapogi lalo’t nalalapit na ang halalan at papatapos na ang termino ng Pangulong Noynoy Aquino.

Ayon kay Deputy Presidential Spokesperson Abegail Valte, may resolusyon ang kongreso na repasuhin kada tatlong taon ang Salary Standardization Law kung saan, 2012 pa huling nagpatupad ng umento sa sahod ng mga manggagawa sa pamahalaan.

Sinabi pa ng opisyal na aabot sa 45 porsyento o P226 na bilyong piso ang umento sa sahod ng mahigit sa isa’t kalahating milyong kawani ng gobyerno.

Sa sandaling maipasa, Enero 1 ng susunod na taon ibibigay ang unang tranch ng salary increase ngunit hindi kasama rito ang Pangulo, Pangalawang Pangulo gayundin ang mga miyembro ng gabinete.

By Jaymark Dagala | Aileen Taliping (Patrol 23) 

Nagbabalang muli ang isang mataas na opisyal ng militar ng Estados Unidos na magresulta ng sigalot sa pagitan ng mga bansa sa Asya ang reclamation at military buildup ng bansang China sa pinag-aagawang teritor­yo sa West Philippine Sea (South China Sea).

Ayon sa ulat, sinabi ni U.S. Defense Secretary Ashton Carter, hindi lamang umano ito ang nababahala sa mabilis na reclamation ng Beijing sa South China Sea, kung hindi maging ang ibang bansa.

Idinagdag pa nito na nakakabahala rin umano ang patuloy na paglakas ng military force ng China sa mga pinag-aagawang teritoryo.

By: Mariboy Ysibido

Lusot na sa ikatlo at huling pagbasa sa senado ang panukalang nagtataas sa buwanang pensyon para sa mga miyembro ng Social Security System o SSS.

Tanging si Senate Minority Leader Juan Ponce Enrile lamang ang bumoto kontra sa nasabing panukala habang walang nag-abstain at 15 senador ang bumoto para rito.

Paliwanag ni Enrile, hindi naman daragdagan ang buwanang kontribusyon ng mga miyembro kaya’t tiyak na muubos ang pondo ng SSS kung itataas ang pension sa mga retiradong miyembro.

Ngunit ayon naman kay Senadora Cynthia Villar na siyang nagsusulong ng panukala, maraming paraan para hindi mangyari ang pangamba ni Enrile tulad ng pagpapahusay sa koleksyon at bigyan ng subsidy ng pamahalaan.

By  Jaymark Dagala | Cely Bueno (Patrol 19)  

Buo ang suporta ni Batangas Gov. Vilma Santos-Recto sa pamunuan ng daang matuwid kahit ginawa pang guest candidate sa senatorial slate ng kampo nina Sen. Grace Poe at Sen. Chiz Escudero ang kanyang asawang si Sen. Ralph Recto.

Tinanggap ni daang matuwid standard bearer Mar Roxas ang suporta ng mga Batangueñong opisyal ng Partido Liberal mula sa 3 lungsod at 31 bayan ng Batangas sa isang event noong Biyernes.

Kasama ni Roxas sina Gov. Vi, Sen. Recto, Batangas Vice Gov. Mark Leviste at ang running mate ni Roxas na si Rep. Leni Robredo.

Binigyang halaga naman ni Roxas ang kooperasyon ng mga lokal na pamahalaan sa tagumpay ng kahit anong programa ng pamahalaang national.

By: Mariboy Ysibido

Bigo umano ang pamahalaan na ipatupad ang mga programa nito para maibsan ang kagutuman at kahirapan sa bansa.

Ayon kay Isabela de Ba­silan Bishop Martin Jumoad, lumalala ang pangungu­tang ng mga pilipino dahil sa kawalan ng trabaho, mapagkakakitaan at kagutuman.

Sinabi pa ng Obispo na, dahil sa kawalan ng alternatibo upang maibsan ang kagutuman ng maraming Filipino pati pautangan ay pinapatulan na rin.

Nakikita rin ng Obispo na kulang pa rin ang trabaho at programa ng pamahalaan para sa mga mahihirap.

Sa pag-aaral ng World Food Program (WFP) mula August 16 hanggang September 5, 2015 sa mga mahihirap na probinsya sa Pilipinas, lumalabas na 62 percent ng mga kabahayan ang nagungutang.

Naitala naman ang Sulu na may mataas na porsyento o bilang ng mga nangungu­tang na umaabot sa mahigit 94 percent.

By: Mariboy Ysibido

Kibit-balikat lamang si Transportation Secretary Joseph Emilio Abaya sa mga panawagang siya’y magbitiw na sa puwesto.

Inihayag ito ng Kalihim sa kaniyang pagharap sa pagdinig ng senado, binigyang diin ni Abaya na isang pribilehiyo at hindi karapatan ang manungkulan sa pamahalaan.

Sa kabila ng mga batikos na kaniyang inaabot dahil sa mga problemang pang-transportasyon, sinabi ni Abaya na nakatutulog pa naman siya ng mahimbing sa gabi.

Sen. Poe may pahiwatig

Nagpahiwatig si Senadora Grace Poe na dapat nang palitan sa puwesto si Transportation Secretary Joseph Emilio Abaya.

Sinabi ni Poe na siyang Chairman ng Senate Sub-Committee on Public Services, karapatan ng publiko na magkaroon ng mas mahusay na Transportation Secretary.

Bagama’t hindi naman aniya matatawaran ang katalinuhan ni Secretary Abaya, sinabi ni Poe na hindi ito sapat para matutukan ng husto at matugunan ang mga problemang kinahaharap ng ahensya.

Marami ang nangangamba na madiskaril ang operasyon ng DOTC kapag sinibak sa puwesto si Abaya gayung ilang buwan na lamang bago ang halalan, ngunit tanong ng senadora, tama ba na magtiis na lamang ang publiko.

By  Jaymark Dagala | Cely Bueno (Patrol 19) 

Mayroong legal na basehan at magbe-benepisyo ang vulnerable sector tulad ng senior citizens at persons with disabilities sa plano ng Commission on Elections (COMELEC) na isagawa rin ang botohan sa mga mall.

Ayon kay COMELEC Chairman Andres Bautista, handa na ang legal opinion ng kanilang law department hinggil sa posibleng mall voting.

Binigyang diin ni Bautista na ipinatutupad lamang nila ang nakasaad sa konstitusyon partikular sa Article 9 ng 1987 Constitution na nagsasabing may kapangyarihan ang COMELEC para tukuyin ang mga polling precincts.

Nakasaad din sa konstitusyon ang pagtatalaga bilang polling precincts ng mga pribadong gusali.

Una nang nagsagawa ng dry run ng mall voting ang COMELEC sa Eastwood Mall sa Libis, Quezon City.