June 2026

Ayon kay House Committee on Good Government and Public Accountability Chairman at Pampanga Rep. Oscar Rodriguez sa lalong madaling panahon ay itatakda nito ang pagdinig sa ‘tanim-bala’ scheme.

Ang komiteng pinamumunuan ni Rodriguez at ang House Committee on Transportation na pinamumunuan naman ni Catanduanes Rep. Cesar Sarmiento ang naatasang magsiyasat sa tanim-bala incidents sa NAIA.

Ngayong araw, Nobyembre 3, ay muling magbubukas ang session sa Kamara matapos mag-recess kaakibat ng paggunita sa Undas.

Sinabi pa ni Rodriguez na kung matutukoy ang pagkakakilanlan ng whistleblower ay kasama ito sa mga ipatatawag at pahaharapin sa imbestigasyon ng kamara.

By: Mariboy Ysibido

Inihayag kahapon ni Transportation Sec. Jun Abaya ang agarang implimentasyon ng bagong security policy sa Ninoy Aquino International Airport, ito ay ang pagbabawal sa sinumang tauhan o empleyado ng NAIA na humawak, gumalaw at maghalukay ng bagahe ng mga pasahero.

Kasunod ito ng pagpapasimula ng isang malalimang imbestigasyon sa nauusong ‘tanim-bala’ na uri ng extortion racket sa NAIA.

Sinabi ni Sec. Abaya na tatapusin muna nila ang isinasagawang imbestigasyon bago pa buoin ang kongkretong solusyon para sa mga panawagang pagbitiwin sa pwesto si Manila International Airport Authority (MIAA) General Manager Angel Honrado.

Ganito rin ang posisyon ni Pangulong Benigno ‘Noynoy’ Aquino III base sa inilabas na pahayag ng Malacañang.

By: Mariboy Ysibido

Nakatakdang ilabas ng Department of Trade and Industry (DTI) ang Suggested Retail Price o SRP ng mga noche buena products sa ikalawa o ikatlong linggo ng Nobyembre.

Batay sa monitoring ng DTI, tinatayang nasa P0.05 hanggang P0.35 ang itataas ng bente porsyento ng lahat ng noche buena products.

Kasabay nito, inihayag ng DTI na bababa ang presyo ng Pinoy pandesal at Pinoy tasty sa loob ng buwang ito bunsod ng pagmura ng harina sa World Market.

Singkwenta sentimos hanggang piso (P0.50-P1.00) ang ibababa ng bawat supot ng Pinoy pandesal at Pinoy tasty simula sa Nobyembre 15.

Habang binigyan naman ng hanggang Nobyembre 5 ang mga negosyante para ibaba ng P0.24 hanggang P0.30 ang kada pakete ng instant noodles.

By Meann Tanbio  

Malabo nang maipasa ang Bangsamoro Basic Law o BBL.

Ito, ayon kay Representative Lito Atienza ng Buhay Partylist ay dahil pa rin sa kawalan ng quorum at abalang-abala ngayon sa pangangampanya ang mga kongresista.

Giit ni Atienza, karamihan sa mga mambabatas na hindi dumadalo sa sesyon ay miyembro ng partido ng administrasyon.

Samantala, nanawagan naman sa mga mambabatas si Government Chief Negotiator Miriam Coronel-Ferrer na dumalo sa mga nalalabing sesyon ng Kongreso upang matalakay ang Bangsamoro Basic Law o BBL.

Sa isang statement, iginiit ni Ferrer na kaya hindi natutuloy ang deliberasyon sa usapin ay dahil sa kawalan ng quorum at madalas na pag-absent ng mga kongresista.

Ayon kay Ferrer, dapat magkaisa na ang liderato nina Speaker Feliciano Belmonte at Senate President Franklin Drilon upang maipasa ang naturang panukalang batas.

Tiniyak din ng opisyal na handa ang Moro Islamic Liberation Front o MILF na ituloy ang decommissioning ng kanilang mga baril at combatants sakaling lumusot ang BBL.

By  Jelbert Perdez  

Hindi maaaring maging substitute ni Martin Diño Chairman ng Volunteer Against Crime and Corruptions si Davao City Mayor Rodrigo Duterte.

Ito ang opinyon ng kilalang election lawyer na si Atty. Romulo Macalintal.

Ayon kay Macalintal, hanggang ngayon ay tumatanggi pa rin ang alkalde na tumakbong presidente.

Liban dito, depektibo rin umano ang Certificate of Candidacy (COC) na inihain ni Diño dahil nakasulat doon ang pagtakbo sa pagka-Mayor sa Pasay City, samantalang residente naman siya ng Quezon City.

Tinukoy pa ni Macalintal, na sa ilalim ng election code kailangang may certificate of nomination si Diño mula sa PDP-Laban at gayundin ay certificate of acceptance mula kay Mayor Duterte at maging ang COC mula sa alkalde.

By: Mariboy Ysibido

Humiling ng extension ang kampo ni Sen. Grace Poe sa disqualification case na isinampa laban sa kanya ng complainant na si Rizalito David sa pamamagitan nang paghahain ng counter-affidavit.

Ayon kay atty. George Garcia, legal counsel ni poe, napagdesisyunan nila na humingi sa COMELEC law department ng extension upang makapag-file sila ng sagot hinggil sa nasabing kaso.

Binigyan diin ni Atty. Garcia na hindi ito paraan upang i-delay ang kaso ng senadora.

Dagdag pa niya, ipinaalam na sa kanilang kampo ng hearing officer ang 10 araw na pagbigay ng extension simula sa November 3 hanggang November 13.

Nabatid na nagsampa rin ng kaso sa Senate Electoral Tribunal si David na nagnanais mapatalsik sa pwesto si Poe bilang senador dahil umano sa kwestiyunableng citizenship nito.

By: Mariboy Ysibido

Nagpatupad na ng taas presyo sa kanilang mga produktong petrolyo ang mga kumpaniya ng langis.

Epektibo ala-6:00 ngayong umaga, P0.25 ang taas presyo ng kumpaniyang Shell at Chevron sa kada litro ng gasolina habang P0.10 sa kada litro ng kerosene.

Sa gasolina lamang may pagtaas ang kumpaniyang Phoenix Petroleum sa kaparehong oras habang halos P3 ang idinagdag ng soLane sa presyo ng Liquified Petroleum Gas o LPG.

Dalawang piso at nobenta’y singko sentimos (P2.95) naman ang dagdag sa kada kilo ng LPG o P32.40 sa kada 11 kilogram na tangke nito.

Alas-12:01 naman kaninang hatinggabi, nagpatupad ng P2.50 dagdag sa kada litro ng LPG ang kumpaniyang Liquigaz.

Dalawang piso at nobenta sentimos (P2.90) naman sa kada litro ang ipatutupad price hike ng kumpaniyang Eastern Petroleum, epektibo ala-6:00 kanina nang ipatupad naman ng Petron ang P1. 65 na dagdag sa presyo ng kada kilo ng Auto LPG.

By  Jaymark Dagala 

Sisimulan na ngayong linggo ng Commission on Elections (COMELEC) ang pagdinig sa certificate of candidacy ng mga posibleng nuisance candidate.

Ayon kay COMELEC Chairman Andres Bautista, ipinatawag na ang mga kandidato na pinadalhan nila ng sulat.

Dito anya malalaman kung sino ang mga seryoso dahil ilan sa mga presidential “wannabe” ay hindi naman talaga dumarating sa hearing gaya sa mga nakaraang halalan.

Iginiit ni Bautista na kung pursigido ang naturang mga kandidato, ay ito na ang pagkakataon na ipagtanggol ang kanilang kandidatura at hindi sa ibang forum na hindi saklaw ng poll body.

By  Mariboy Ysibido | Aya Yupangco (Patrol 5)