June 2026

Nailipat na sa maayos na tirahan ang 400 sa 800 pamilya na nasa ‘no dwelling zones’ sa Leyte.

Ayon kay Tanauan Mayor Pelagio Tecson, nakatira na ngayon sa mga kongkretong bahay ang mga naturang pamilya sa relocation sites sa mga barangay ng Pago at Sacme.

Sinabi ni Tecson na ang pagpapalipat sa mga ito ay bahagi ng rehabilitation efforts ng pamahalaan para sa mga nasalanta ng bagyong Yolanda noong 2013.

Giit ni Tecson, kaya mabagal ang rehabilitasyon, partikular ang paglilipat sa mga biktima ng kalamidad, ay dahil sa kakapusan ng construction materials at water supply sa relocation sites.

Aniya, ayaw din umanong lumipat ng ilang pamilya sa inilalaang relokasyon dahil sa livelihood-related concerns.

By Jelbert Perdez  

Pinaigting pa ng Manila International Airport Authority o MIAA ang kanilang surveillance upang matiyak ang kaligtasan ng mga pasahero sa gitna ng dumaraming kaso ng tanim-bala modus.

Ayon kay MIAA Spokesman David Castro, tinitignan na rin nila ang kanilang operational procedures maging ang posibleng scenario na maaaring palihim inilagay ang mga bala sa bagahe ng mga pasahero.

Nagpapatuloy na rin anya ang imbestigasyon ng Office of Transport Security at PNP-Aviation Security Group at tututukan na rin ng MIAA ang alegasyon ng isang netizen laban sa isang taxi driver na sangkot umano sa modus.

Dagdag ni Castro, simula noong 2008 ay halos 40 airport security personnel na ang inimbestigahan kaugnay sa mga insidente ng tanim-bala.

Sa ngayon ay limang kaso pa lamang ng tanim-bala ang naka-record simula nang mabunyag ang nabanggit na modus.

By  Drew Nacino 

Muling nanawagan ang Moro Islamic Liberation Front (MILF) sa Kongreso na bilisan na ang pagpasa sa Bangsamoro Basic Law o BBL.

Ayon sa MILF, dapat harapin ng maayos ang mga nagtatangkang humarang sa pagpapasa ng panukala upang maiwasan ang mga komplikasyon dahil kung mapapatuloy ang mga kritiko ng BBL ay lalo lamang magiging magulo ang bansa at madismaya ang mga Moro.

Mas dapat anilang bilisan ang pagpapasa sa BBL lalo’t maraming kinakaharap na problema ang gobyerno na kailangan ng suporta ng publiko gaya ng territorial dispute sa West Philippine Sea.

Iginiit din ng rebeldeng grupo na ang BBL ay hindi susi upang magkawatak-watak ang bansa bagkus ay tulay sa pagkakaisa at kapayapaan sa Mindanao.

By  Drew Nacino 

Mayroong libreng sakay ang Metropolitan Manila Development Authority (MMDA) sa mga gumagamit ng Pasig River Ferry, sa Biyernes bilang bahagi ng 40th Founding Anniversary ng MMDA.

Epektibo ang libreng sakay simula alas-8:00 ng umaga hanggang ala-5:00 ng hapon para sa lahat ng 11 istasyon mula barangay Pinagbuhatan, Pasig City hanggang Escolta, Maynila.

Ayon kay MMDA Chairman Emerson Carlos, nais nilang masuklian ang publiko sa pagsuporta sa ferry service simula nang buhayin ito noong isang taon.

Makatutulong anya ito upang ma-engganyo ang mga mas maraming mananakay na tangkilikin ang ferry boat service sa ilog pasig sa gitna ng matinding traffic sa EDSA.

Samantala, isang aktibidad din ang nakahanda sa Quirino Grandstand, Maynila sa Sabado ng umaga kung saan ipaparada ng mga MMDA personnel ang kanilang mga equipment at specialized vehicle.

By  Drew Nacino 

Inihayag ng Department of Agriculture (DA) na matatag ang presyo ng karne, manok at maging processed meat sa panahon ng Kapaskuhan.

Ayon kay Agriculture Undersecretary for Livestock Jose Reano, mataas ang produksyon ng baboy at manok sa bansa lalo na ang mga backyard farm kung kaya’t maganda rin ang presyo ng bawat kilo sa buhay na baboy o live weight na aabot sa P92 hanggang P111 sa backyard, habang sa commercial live weight ay nasa P109 hanggang P113 kada kilo.

Binigyang diin ng DA na nakakabuti ang matinding pagbabantay sa paglabas ng karne mula sa slaughter house upang mas lalong kilalanin ang magandang kalidad ng karne ng Pilipinas sa ibang bansa.

Ipinabatid ni Reano na patuloy ang pagtaas ng pag-export ng karne at mga kaugnay na produkto sa bansang Japan, Brunei, South Korea, Papua New Guinea, Australia, Dubai, Kuwait, Qatar, Kingdom of Saudi Arabia, Russia, United Arab Emirates, Bahrain, Oman at Lebanon.

Ipinagmalaki pa ni Reano na bumaba na rin ang importasyon ng laman ng karne o premium cut at maging officials ngayong taon na umabot sa 180 milyong kilo mula sa 183 milyong kilo sa taong 2014 sa pagitan ng Enero hanggang Setyembre.

By  Meann Tanbio | Monchet Laranio 

Binalaan kahapon ni Philippine National Police Chief Director General Ricardo Marquez ang mga tauhan nito laban sa nabuking na talamak na tanim-bala scam sa Ninoy Aquino International Airport.

Ito’y sa gitna na rin ng pagkakasangkot ng ilang mga tiwaling opisyal at miyembro ng Office of Transportation Security (OTS) sa NAIA sa laglag-bala scam o ang pagtatanim ng bala sa mga maleta ng mga pasahero ng eroplano na hinihingan ng malaking halaga para hindi sampahan ng kaso.

Dahil dito, binalaan ni Marquez ang mga opisyal at tauhan ng PNP Aviation Security Group sa pamumuno ni Chief Supt. Francisco Balagtas na huwag makiki-pagsabwatan sa sindikato ng tanim-bala.

Pinaalalahanan ni Marquez ang PNP-ASG na kabilang sa nangangalaga sa seguridad sa NAIA na maging propesyunal at gawing tama ang kanilang mga trabaho.

By: Mariboy Ysibido

Tinabla ng Malacañang ang panawagang pagbitiwin sa puwesto si Manila International Airport Authority (MIAA) General Manager Jose Angel Honrado dahil sa isyu ng laglag-bala sa NAIA.

Unfair, ayon kay Secretary to the Cabinet Jose Rene Almendras na pagbitiwin si Honrado dahil sa kontrobersya na tiyak aniyang hindi ito sangkot.

Mas mabuti aniyang hanapan ng solusyon ang problema sa halip na pababain sa puwesto ang isang opisyal na ginagawa ang kanyang trabaho.

Aminado rin si Almendras na mahirap pagbitiwin si Honrado sa ngayon dahil kailangan pang hanapan ito ng kapalit, habang pag-aaralan pa ng kapalit nito ang trabaho na hindi kaya ng sitwasyon dahil sa preparasyon sa pagdating ng mga delegado ng APEC Summit.

By  Meann Tanbio | Aileen Taliping (Patrol 23)