June 2026

Hinimok ni Senador Francis Escudero ang Department of Transportation and Communications o DOTC na tingnan ang kalagayan ng Office of Transport Service o OTS.

Ang OTS ang siyang pangunahing isinasangkot sa sunud-sunod na insidente ng tanim bala sa Ninoy Aquino International Airport o NAIA.

Ayon kay Escudero, karamihan aniya sa mga kawani ng OTS na isinasangkot sa pangingikil ay nasa contractual status.

Mahalaga pa naman aniya ang papel na ginagampanan ng mga taga-OTS na tiyakin ang seguridad ng mga paliparan na tinaguriang gateway ng bansa.

By  Jaymark Dagala | Cely Bueno (Patrol 19)   

Kapwa may pananagutan ang Armed Forces of the Philippines o AFP gayundin ang New People’s Army o NPA sa walang habas na pagpatay sa mga katutubong Lumad sa Mindanao.

Ito ang inihayag ni Commission on Human Rights o CHR Chairman Chito Gascon sa harap ng mga katutubong nagkakampo sa Liwasang Bonifacio sa lungsod ng Maynila.

Sinabi ni Gascon na tila biktima ng tug of war sa pagitan ng militar at ng mga rebelde ang mga Lumad dahil sa pinapatay kapag hindi umaanib sa kanilang hanay ang mga ito.

Sa panig naman ng mga Lumad, sinabi ni Jomorito Goaynon, pinuno ng Lumad organization na Kalumbay na handa nilang ipaunawa at ilahad sa publiko ang kanilang sitwasyon lalo na sa Mindanao.

By Jaymark Dagala  

Nanawagan ang Pambansang Pulisya sa publiko na iwasan muna ang humusga ng ilang personalidad na sangkot sa umano’y tanim bala sa Ninoy Aquino International Airport (NAIA).

Ayon kay C/Supt. Wilben Mayor, tagapagsalita ng PNP, ito’y dahil sa wala pang resulta ang ginagawang imbestigasyon hinggil dito.

Mas mahalaga muna aniyang malaman ang puno’t dulo ng usaping ito dahil maging sila man sa PNP ay nais mabatid ang buong katotohanan at kung sino ang dapat managot dito.

Giit pa ni Mayor, hindi naman aniya makatuwiran na magdusa ang ilang grupo o organisasyon sa usapin lalo’t kung mapatutunayang wala naman silang kinalaman dito.

By  Jaymark Dagala 

Isa (1) ang patay habang 2 naman ang arestado nang magsagawa ng operasyon ang mga awtoridad sa Baseco Compound sa lungsod ng Maynila.

Ayon kay Police Supt. Albert Barrot, Commander ng Manila Police District Station 5, magsisilbi lamang sana ng search warrant ang pinagsanib na puwersa ng PNP CIDG, HPG at NCRPO sa bahagi ng Area 9 nang biglang manlaban ang isa sa mga suspek.

Layunin aniya ng operasyon na halughugin ang tahanan ng mga suspek na pinaniniwalaang nagtatago ng mga iligal na armas.

Narekober ng mga awtoridad ang apat na baril at 80 gramo ng hinihinalang shabu.

Inaalam na rin ng pulisya kung carnapped ang mga nakumpiskang walong motorsiklo o kung ginagamit ito sa paggawa ng krimen.

By Jaymark Dagala | Aya Yupangco (Patrol 5)   

Hugas kamay ang PNP Aviation Security Group sa isyu ng laglag bala scheme sa mga paliparan sa bansa.

Ayon kay Supt. Jean Panisan, Spokesperson ng PNP AVSEGROUP, pumapasok lamang sila sa eksena kapag may nakitaan ng bala sa screening na ginagawa ng Office for Transportation Security ng Department of Transportation and Communications o DOTC.

Kumbinsido rin si Panisan na walang sindikato ng laglag bala sa NAIA dahil wala naman silang nakukuhang ebidensya na nagpapatunay na mayroon lamang gustong mangikil sa mga pasahero.

“Wala po, kasi wala naman po akong basehan eh, wala akong ebidensya, wala akong documents o CCTV na may nakita akong nagtatanim ng bala, mas okay po yun atleast once and for all matapos na ang isyu kung meron o wala, kasi kami po hindi rin kami natutuwa eh na ganun ang nangyayari, kasi ang nasisira hindi lang po ang PNP, o yung MIAA kundi ang ating buong bansa.” Ani Panisan.

Ipinaliwanag ni Panisan na may mga insidente na ginamit ng pasahero ang bag ng kapatid na sundalo kaya’t hindi nakita ang bala doon, mayroon rin naman anyang galing sa firing range at nakalimutang nailagay pala sa bulsa ng jacket ang bala.

Dahil dito, mahigpit aniya ang payo nila sa mga pasahero na tiyaking sila ang nag-impake ng kanilang mga gamit sa bag o maleta na nilinis munang mabuti kung aalis ng bansa.

Sa kaso naman ni Nanay Gloria, ang 65-taong gulang na nahulihan ng bala, sinabi ni Panisan na nakalusot ito sa Laoag Airport dahil manual screening ang ginawa sa kanya.

“Minanual po yan ibig sabihin po titignan random hindi po inisa-isa, yun po ang totoo nun, so from Laoag to Terminal 2 malayo pa rin yun so maaaring may intervention na nangyari from that distance na hindi rin po natin masabi, pero hindi po siya dumaan sa screening procedure na ine-xray po ang gamit niya kasi sira po.” Pahayag ni Panisan.

By  Len Aguirre | Karambola 

Lumobo ng mahigit sa 90 porsyento ang bilang ng mga nahuling may dalang bala sa mga paliparan sa bansa kumpara noong nakaraang taon.

Ayon kay Supt. Jean Panisan, Spokesperson ng PNP Aviation Security Group, umabot sa 105 katao ang nahuling may dalang bala sa paliparan mula lamang Enero hanggang November 1 ng taong ito.

Noong nakaraang taon anya ay 12 lamang ang nahuli, mas mababa pa rin kumpara sa 21 noong 2013 at 20 noong 2012.

Ipinaliwanag ni Panisan na hindi lamang naman sa NAIA nakakahuli ng pasaherong may dalang bala kundi maging sa ibang malalaking paliparan tulad ng Cebu, Davao, Cagayan de Oro at maging sa Palawan.

Aminado si Panisan na bagamat nasampahan ng kaso ang marami sa mga ito ay wala hindi na nila alam kung ano ang nangyari sa kaso.

“Sinimulan na po ng aming investigation division, tina-track na nila kung nai-file na at kung ano na ang nangyari, kasi pag nai-file na po yun, hindi naman po kumbaga ang maiimpormahan doon yung accused, so far andun na kami sa punto na yun, admitted po kami na hindi namin na-track yan.” Pahayag ni Panisan.

By Len Aguirre | Karambola  

Tiwala ang Malakanyang sa kakayahan ng Department of Transportation and Communications o DOTC na imbestigahan ang laglag bala modus na nambibiktima ng mga pasahero sa Ninoy Aquino International Airport (NAIA).

Ayon kay Presidential Spokesman Edwin Lacierda, hindi isyu ang pagiging abala ng DOTC sa ibang mga problemang pantransportasyon upang hindi maaksyunan ang isyu ng laglag bala.

Sinabi ni Lacierda na mahigpit ang bilin ng Pangulong Aquino sa DOTC na siyasatin mabuti ang report ukol sa extortion na nagaganap sa NAIA at alamin din ang epekto ng laglag bala modus sa turismo ng bansa.

Matatandaang kaliwa’t kanang problema ang kinakaharap ng DOTC gaya ng problema sa LRT, MRT, mga pasaway na bus at mga taxi.

By Ralph Obina | Aileen Taliping (Patrol 23)