June 2026

Imingungkahi ng isang grupo na gamitin na lamang ang Clark Airport para sa mga maaapektuhang flights sa darating na Asia Pacific Economic Cooperation o APEC Summit ngayong buwan.

Ayon kay Renato Diaz, Chairman ng Center for Strategic Initiaitve at dating miyembro ng Civil Aeronotics Board, mas mainam aniya ito kaysa sa magkansela pa ng maraming flights kungsaan, daan-daang mga pasahero ang tiyak na mapeperwisyo.

Giit pa ni Diaz, masyado nang congested ang Ninoy Aquino International Airport habang nananatiling maluwag ang sa Clark.

Kakayanin din ayon kay Diaz ang mga connecting flights mula Clark patungong lalawigan kung ang mga balikbayan ay mga taga-Visayas o Mindanao.

May sapat pa aniyang panahon para pag-isipan ng mga kinauukulan ang panukala ni Diaz bago ang APEC Summit.

By  Jaymark Dagala  

Kung kahapon, yung benepisyo ng Department of Social Welfare and Development (DSWD) para sa mga senior citizen yung binanatan ng kampo ni Vice President Jejomar Binay.

Ngayon naman ay ang programang 4Ps o Pantawid Pamilya Pilipino Program yung tinuligsa ng kaalyado ng Bise Presidente.

Ayon kasi kay Joey Salgado, Head ng Media Affairs ni Binay, hindi maayos na naipatutupad ng Department of Social welfare and Development ang programa.

May mga kaso raw kasi silang nalaman na hindi ibinibigay ang kumpletong benepisyo o kung ibigay man ito sa mga benepisyaryo ay hindi aniya kumpleto.

Mayroon din aniyang iregularidad sa programa kung saan dobleng inililista ang pangalan benepisyaryo at minsan ay naaantala rin daw ang pagbigay ng pinansyal na tulong mula rito.

Ani Salgado, ang report mula sa Commission on Audit o COA ang makapagpapatunay ng iregularidad sa programa kung saan mahigit sa 1 bilyong piso ang hindi raw nakarating sa mga mahihirap.

Kaugnay nito, ayon naman sa website ng DSWD, pumalo na sa mahigit 4 na milyon ang household beneficiaries nito kung saan ang bawat pamilyang benepisyaryo ay makatatanggap ng cash grant o tulong pinansyal na nagkakahalaga anila ng P500 para sa health grant sa bawat bahay kada buwan. Habang meron ding educational grant na nagkakahalaga naman ng P300 bawat bata bilang pangsuporta sa pag-aaral nito.

By Allan Francisco  

Ipinasara ng Department of Trade and Industry o DTI ang 10 tindahan sa 168 Mall sa Divisoria, Maynila.

Ito’y makaraang mabisto na ilan sa mga tindahan dito ang nagbebenta ng mga hindi rehistradong Christmas lights at mga dekorasyong pamasko.

Bukod dito, may nahuli rin ang DTI na ilang produktong nagtataglay ng mga pekeng import clearance certificate o ICC sticker.

Pinangunahan ni DTI Director danilo Enriquez ang paggalugad sa mga tindahan sa nasabing mall bilang bahagi ng paghahanda para sa panahon ng Kapaskuhan.

Magugunitang inilabas kamakailan ng DTI ang bagong ICC sticker bilang proteksyon ng mga mamimili sa mga bibilhin nilang inangkat na mga produkto.

By  Jaymark Dagala | Aya Yupangco (Patrol 5)  

May bago nang tagapagsalita ang Department of Justice (DOJ) sa katauhan ni Atty. Emmanuel Caparas.

Itinalaga si Caparas ni Justice Secretary Alfred Benjamin Caguioa sa bisa ng ipinalabas nitong department order.

Magugunitang dati nang nagsilbi si Caparas bilang Chief Regulator ng Metropolitan Waterworks and Sewerage System o MWSS.

Batay sa ipinalabas na kautusan ng kalihim, immediately executory ang pagkakatalaga kay Caparas at mananatili ito until further notice.

By Jaymark Dagala 

Binatikos ng grupo ng mga mangingisda ang ipinatutupad na ‘no sail zone’ ng Phlippine Coast Guard at ng Philippine Navy sa Manila Bay.

Ito’y bilang bahagi ng inilalatag na seguridad para sa nalalapit na Asia Pacific Economic Cooperation o APEC Summit ngayong buwan.

Ayon kay Dr. Mario Pascual, Pangulo ng Navotas Fishers and traders Association, tiyak na gutom na naman ang kanilang aabutin kapag hindi sila pinayagang mamalakaya sa nasabing karagatan.

Ilan sa mga lugar na tatamaan ng no sail zone ay ang bahagi ng Maynila, Navotas, Cavite, Parañaque hanggang Bataan na nakapaligid sa Manila Bay.

By  Jaymark Dagala | Aya Yupangco (Patrol 5)