June 2026

Inaprubahan na ng Commission on Elections o COMELEC en banc ang planong paggamit ng mga pasilidad ng mga shopping mall para gawing voting centers sa susunod na taon.

Ayon kay COMELEC Chairman Andres Bautista, lumusot na sa en banc ang naturang plano matapos ang idinaos na regular session kahapon.

Sinabi ni Bautista na anim na commissioner ang pumabor sa prinsipyo ng mall voting habang isa lamang ang kumontra.

Giit ni Bautista, natapos na ang draft ng memorandum of agreement o MOA at kasalukuyan na itong nire-review ng mga commissioner at ng law department ng ahensya.

Kabilang sa mga posibleng pagdausan ng botohan ang Fisher Mall sa Quezon Avenue sa Quezon City; Robinsons Magnolia sa Aurora Blvd. sa Quezon City; SM Aura sa Taguig City, at Lucky China Town sa Binondo, Maynila.

By Jelbert Perdez 

Tinatayang 30,000 personnel ng Armed Forces of the Philippines (AFP) at iba’t ibang ahensya ang inatasang magbigay seguridad sa Asia Pacific Economic Cooperation o APEC Economic Leaders meeting sa Maynila, sa susunod na dalawang linggo.

Ayon kay AFP Spokesman Col. Restituto Padilla, sa ngayon ay wala silang natatanggap na seryosong banta sa APEC subalit isang malaking hamon para sa kanila ang pagbibigay seguridad sa aktibidad.

Ang tangi anya nila inaasahan ay ang iba’t ibang kilos protesta na ilulunsad ng iba’t ibang militanteng grupo sa Maynila.

Ipinaliwanag ni Padilla na maaari namang maghayag ng saloobin sinuman o anumang grupo subalit dapat ding sumunod ang mga ito sa ipatutupad na protocol at irespeto ang mga bibisitang foreign leader sa Pilipinas.

Tiniyak din ng opisyal na kanilang minomonitor ang galaw ng mga terror group na posibleng nagbabalak na manabotahe sa economic summit.

***

Kaugnay nito, tututukan din ng militar ang posibleng pagpasok ng mga dayuhang terorista sa bansa para maghasik ng lagim sa gaganaping APEC Summit ngayong buwan.

Ayon kay AFP Spokesman Col. Restituto Padilla, lahat ng mga ahensya ng gobyerno ay kasama sa security preparations partikular sa intelligence monitoring.

Sinabi ni Padilla na inilatag na ng security forces ang contingency plan dahil sa maaaring banta ng chemical, biological at nuclear attacks.

Gayunman, nilinaw ni Padilla na wala pa namang namo-monitor ang Armed Forces of the Philippines o AFP na anumang banta sa seguridad.

Ang APEC Leaders’ Meeting ay idaraos sa simula sa November 17 hanggang November 20.

By Drew Nacino | Jelbert Perdez 

Ipagpapatuloy ngayong Miyerkules sa Senado ang period of interpellation sa panukalang Bangsamoro Basic Law o BBL.

Ayon kay Senate President Franklin Drilon, si Senador Tito Sotto ang magpapatuloy ng kanyang interpellation.

Kasabay nito, sinabi ni Drilon na posibleng talakayin ang proposed 2016 national budget sa susunod na linggo o kaya’y sa November 16 pa ma-sponsoran ni Senate Committee on Finance Chairman Grace Poe.

By Meann Tanbio | Cely Bueno (Patrol 19)

Hindi pinatulan ng Malakanyang ang hamon ni Davao City Mayor Rodrigo Duterte na lutasin sa loob ng limang araw ang kontrobersya sa laglag bala modus sa NAIA.

Ayon kay Presidential Spokesman Edwin Lacierda, inatasan na ni Pangulong Noynoy Aquino si DOTC Secretary Jun Abaya para tignan ang puno’t dulo ng laglag bala.

Sinabi ni Lacierda na ang DOTC ang magbibigay ng sagot sa publiko kaugnay sa tunay na kaganapan sa NAIA.

Bukod kay Duterte, maingay na rin ang ibang grupo para igiit sa gobyerno na lutasin ang modus na tanim bala na nambibiktima ng mga pasahero.

By  Meann Tanbio | Aileen Taliping (Patrol 23)  

Nanawagan ang Catholic Bishops Conference of the Philippines o CBCP sa pamahalaan na isailalim sa lifestyle check ang mga security personnel sa paliparan dahil sa umiiral na laglag bala modus.

Ayon sa CBCP, dapat imbestigahan ng mga otoridad ang mga naatasang mag-inspeksyon sa mga bagahe lalo na yung mga nakakahuli ng umano’y may bitbit na bala sa mga bagahe.

Sinabi ng Simbahang Katolika na nakalulungkot isipin na napagsasamantalahan ng ilang mga airport security personnel ang Comprehensive Firearms and Ammunition para lamang makapangikil ng pera mula sa mga pasahero.

By  Meann Tanbio | Aya Yupangco (Patrol 5)