Sa #SiyasatExpress, ang epekto ng haze sa kalusugan ng tao.
Sinampahan nila Senador Alan Peter Cayetano at Volunteers Against Crime and Corruption (VACC) Chairman Dante Jimenez ng isang joint administrative complaint sa Ombudsman sila Transportation Secretary Jun Abaya, Manila International Airport Authority (MIAA) General Manager Jose Angel Honrado, Office for Transportation Security Administrator Roland Recomono at Philippine National Police Aviation Security Group Director Chief Superintendent Pablo Francisco Balagtas.
Ang reklamo ay kaugnay ng tanim-bala scheme sa NAIA at pagpapabaya umano sa tungkulin ng mga opisyal sa ilalim ng executive order 226 o Doctrine of Command Responsibility in all Government Offices and Agencies.
Hiniling din nina Cayetano sa Ombudsman na suspindihin sa tungkulin sina Abaya, Honrado, Recomono at Balagtas habang iniimbestigahan ang kanilang reklamo laban sa mga ito.
“Sinasabi natin dito sa section 1 neglect of duty under the doctrine of command responsibility, kumbaga sa ano any government official or supervisor ay puwedeng to be hold accountable kapag hindi nila naayos ang kanilang trabaho.” Pahayag ni Jimenez.
By Mariboy Ysibido | Balitang Todong Lakas
Bumaba ang negosyo ng mga freight o cargo forwarder ngayong 2015 kumpara noong nakaraang taon.
Ipinabatid ng Overseas Filipino Workers advocate na si Susan “Toots” Ople na 20 hanggang 30 porsyento ang ibinaba ng negosyo ng mga freight forwarder dahil na rin sa naunang plano ng Bureau of Customs na pagbubukas ng balikbayan box ng mga OFW.
Inihalimbawa ni Ople ang kaso ng negosyong Atlas Shipping kung saan sinabi ng may-ari nitong si Joel Lungares na 50 containers na lamang ang ipinadadala sa kanila ngayong taon ng mga OFW kumpara noong Oktubre 2014 na pumapalo sa 70 containers.
Ani Ople, bumaba ang sales ng mga balikbayan box dahil hindi pa aniya lubusang gumagaling ang epekto ng naudlot na pagbubukas ng mga ito ng customs.
Inaasahan aniya na pagpasok ng Ber months ay triple na ang sales ng mga cargo forwarder.
Matatandaang noong Agosto, ipinag-utos ni Pangulong Noynoy Aquino sa customs na itigil ang planong pagbubukas ng mga balikbayan box matapos itong batikusin ng maraming OFW.
By: Meann Tanbio I Allan Francisco
Ginulat ng Philippine youth basketball team ang three-time defending champion China matapos isukbit ang score na 78-72 sa bago ang knockout rounds ng 2015 FIBA Asia Under-16 Championship sa Jakarta, Indonesia.
Si Gian Mamuyac ang nanguna sa Batang Gilas taglay ang kanyang 22 points at five assists habang si team captain SJ Belangel ay nag-ambag ng 11 points kung saan tig-10 points naman ang tinipa nina Harvey Pagsanjan at Jason Credo.
Matatandaang hindi pa natatalo sa kahit isang laro ang China sa tatlong edisyon ng FIBA Asia Under-16 Competition kung saan sila ang nagka-kampeon.
Dahil sa tagumpay na ito ay natapos ng mga Pinoy ang second round kasama ang China at South Korea na mayroong 4-1 records sa Group F.
Batay naman sa quotient system, nasa unang puwesto ang China sa Group F, pangalawa ang Pilipinas at third ang Korea.
By Jelbert Perdez
Hinatulang guilty sa kasong graft at malversation charges ang dalawang opisyal ng National Bureau of Investigation.
Ito’y makaraang mapatunayang ibinulsa nina Quezon City NBI Satellite Office Chief Ramil Rodriguez at ang Chief cashier na si Elizabeth Sobrevilla ang halos ay P1 Million na nakolekta sa mga kumukuha ng NBI clearance.
Alinsunod sa hatol ni Quezon City Regional Trial Court Branch 226 Judge Manuel Sta. Cruz Jr., bukod sa 10 taong pagkaka-kulong, inutusan ang dalawa na ibalik sa pamahalaan ang nawawalang halaga na umaabot sa P942,425.
Nabuking ang modus nina Rodriguez at Sobrevilla sa isinagawang surprise cash inspection noong 2006.
Base sa ginawang imbentaryo ng NBI headquarters, umaabot sa 120 booklets ng mga NBI clearance na may kabuuang 8,195 piraso ng mga certificate ang hindi nila idineklara.
Bagama’t nakapag-issue sila ng mga official receipts ay nabigo naman silang mai-turnover sa nbi office ang halagang umaabot sa halos ay P1 Million.
By: Meann Tanbio I Bert Mozo (patrol 3)
Itinanggi ni presidential aspirant Senador Grace Poe ang kumakalat na e-mail kung saan ipinapalabas na hindi na siya tatakbo sa pagkapangulo.
Ayon kay Poe, tuloy ang pagsabak niya sa 2016 presidential elections.
Wala aniya siyang balak na pag-aksayahan ng panahon para alamin kung sino ang nasa likod ng nasabing bogus e-mail na may titulong “paalam”.
Gayunman, kumbinsido si Poe na posibleng may kaugnayan sa mga naglabasang disqualification case laban sa kanya ang nasa likod ng naturang e-mail.
By: Meann Tanbio I Cely Ortega-Bueno (patrol 19)
Minaliit ng Malacanang ang bantang “laglag-boto” ng grupong Migrante bilang pantapat sa umiiral na laglag bala modus sa Ninoy Aquino International Airport.
Sinabi ni Presidential Spokesman Edwin Lacierda na wala sa kamay ng iilang grupo ng mga militante ang kapalaran ng mga kandidato ng administrasyon kundi nasa mas maraming botante na nakakaintindi sa usapin.
Nakatitiyak aniya siyang hindi magpapadikta ang mga botante sa mga grupong walang ginawa kundi hanapan ng butas ang pamahalaan.
Nauna rito, nagbanta ang Migrante International na ikakampanya ang laglag-boto para sa mga kandidato ng administrasyon sa 2016 elections dahil sa kabiguan umanong aksyunan ang modus na laglag bala sa NAIA.
By: Meann Tanbio I Aileen Taliping (patrol 23)
Pinalaya na ng New People’s Army o NPA ang dalawang sundalo na dinukot sa Monkayo, Compostella Valley noong Setyembre 30.
Kinilala ang mga pinakawalang biktima na sina privates first class Niño Alavaro at Marjon Añover.
Itinurn-over ng mga rebelde ang dalawa kay Davao City Mayor Rodrigo Duterte.
Nauna nang inihayag ng npa na kaya nila dinukot sina Alavaro at Añover ay dahil iniimbestigahan nila ito sa posibleng “crimes against humanity” at “counter-revolutionary activities.”
By: Meann Tanbio
Isusulong ni Sen. Bam Aquino ang panukalang batas na naglalayong huwag nang gawing krimen o i-decriminalize ang pagtataglay ng tatlo o mas kaunti pa rito na bilang ng bala.
Ito’y kasunod na rin ng pagkakabunyag ng tanim-bala na umano’y kagagawan ng mga airport personnel sa NAIA.
Ayon kay aquino, ihahain niya ang “iwas-tanim bala bill” upang hindi na mabiktima ng laglag-bala o bullet planting sa airport ang mga biyahero.
Sa ilalim ng Republic Act 10591 o Firearms and Ammunition Act ay ipinagbabawal ang pagdadala o pagbili ng baril o bala nang walang lisensya.
Bukod kay Aquino, may kahalintulad ding panukalang batas si Camarines Sur Representative Leni Robredo na inihain nito sa mababang kapulungan ng Kongreso.
Kaugnay nito, isang online petition naman ang kumakalat para baguhin ang batas na nagpaparusa sa mga mahuhulihan ng bala.
Layon ng petisyon na matigil ang panghuhuli sa mga biyahero na nakikitaan ng bala sa bagahe.
Ayon naman kay Sen. Miriam Santiago, dapat masigurong nagagamit nang tama at hindi naaabuso ang naturang batas.
By Jelbert Perdez
Nanawagan si Senador JV Ejercito na magbitiw na sa pwesto si Manila International Airport Authority General Manager Jose Angel Honrado sa harap na rin ng insidente ng tanim bala sa Ninoy Aquino International Airport.
Paliwanag ni Ejercito, ito ay sa ilalim ng tinatawag na “principle of command responsibility”.
Ayon kay Ejercito, mahalagang maimbestigahan sa lalong madaling panahon ang insidente lalo pa’t mismong mga airport personnel ang sinasabing naglalagay ng bala sa bagahe ng mga travellers.
By: Meann Tanbio I Cely Ortega-Bueno (patrol 19)