June 2026

Kapansin-pansin na ang epekto sa turismo ng bansa ang usapin ng tanim-bala sa Ninoy Aquino International Airport o NAIA.

Ito’y dahil sa takot at pag-aalala ang dulot nito hindi lamang sa mga Pilipinong biyahero kundi maging ang mga banyagang turista sa bansa.

Ayon kay Tourism Undersecretary Maria Jasmin, inuulan na sila ng mga tanong mula sa dayuhang turista kung totoo nga ba ang napapaulat na insidente.

Bagama’t wala pa aniya itong naidudulot na lamat sa turismo ng bansa, mahalaga aniyang matuldukan na ang usapin sa lalong madaling panahon.

Sa pag-iikot ng DWIZ patrol, maraming pasaherong dumarating sa paliparan ang nagta-tiyagang pumila ng mahaba, maipabalot lamang ng plastic ang kanilang mga bagahe upang makaiwas na mabiktima ng nasabing modus.

By  Jaymark Dagala  

Isa pang libel case ang nakatakdang isampa laban kay dating Iglesia ni Cristo Minister Lowell Menorca ll.

Ang kasong libel ay nag-ugat sa alegasyon ni Menorca na hit squad ng INC ang grupong SCAN o Society of Communicators and Networkers.

Sa pagkakataong ito, ang magsasampa ng kaso ay ang chapter ng SCAN sa lalawigan ng Albay.

Ayon kay SCAN President Ariel Higuit, nais nilang linisin ang kanilang pangalan na nabahiran ng dungis dahil sa mga alegasyon ni Menorca.

Una nang naghain ng kasong libel laban kay Menorca ang SCAN sa San Jose City Nueva Ecija.

Binigyang diin ng SCAN na ang kanilang grupo ang disaster response group ng INC.

Una nang ibinunyag ni Menorca na illegal syang ikinulong ng INC kasama ang kanyang pamilya.

By  Len Aguirre

Nanawagan ng grupo ng mga mambabatas na dating mga pulis at opisyal ng militar ang pamahalaan na simulan na rin nito ang pagsasagawa ng sariling naval patrol sa West Philippine Sea para ipagtanggol ang karapatan ng bansa sa mga pinag-aagawang mga isla ng Pilipinas at China.

Ang panawagan ay ginawa ng Saturday Group na mga mambabatas sa Kongreso para simulan na ng pamahalaan ang “freedom of navigation” patrol.

Sinabi naman ni Magdalo Partylist Representative Ashley Acedillo na ang sariling pagpapatrol ng Pilipinas ay pagpapakita na hindi nito tinatanggap ang pag-angkin ng China sa ilang bahagi ng West Philippine Sea.

Noong isang linggo ipinadala ng Amerika ang USS Lassen guided missile destroyer nito para maglayag sa 12 nautical miles ng isa sa isla sa Spratly Islands.

Sinabi ni US Pacific Command Commander Admiral Harry Harris na ang misyon ng USS Lassen’s ay bahagi US “routine freedom of navigation operations,” bagamat binigyang diin ng Washington na wala itong kinalaman sa sigalot sa rehiyon.

By  Mariboy Ysibido 

Lalong pinalakas ng Bureau of Fisheries and Aquatic Resources o BFAR ang pagbibigay-proteksiyon sa isdang ludong sa lalawigan ng Cagayan.

Ito’y matapos ipag-utos ng ahensya ang pagde-deploy ng mga law enforcer sa Cagayan River bilang bahagi ng conservation effort ng pamahalaan.

Ayon kay BFAR Director Milagros Morales, aarestuhin ng mga awtoridad ang sino mang masusumpungang nanghuhuli ng ludong na tinaguring president’s fish dahil ito ang pinakamahal na isda sa Pilipinas.

Mayroong kakaibang linamnam at lasa ang ludong kaya’t isa ito sa mga paboritong pagkain at espesyal na pangregalo ng mga maykayang pamilya sa lipunan.

Sinabi ni Morales na ang ludong ay mayroong market price na pumapalo mula P4,000 hanggang P5,000.

Kaya naman, kahit mapanganib at ipinagbabawal ay marami pa ring mangingisda ang nagtatangkang manghuli ng naturang isda.

By  Jelbert Perdez  

Binalaan na ng United Nations Department of Safety and Security o UNDSS ang kanilang mga staff laban sa “tanim-bala” modus sa Ninoy Aquino International Airport (NAIA).

Pinayuhan din ng UNDSS ang kanilang mga personnel na tiyaking nakabalot ng plastic ang kanilang mga bagahe upang hindi mabiktima ng talamak na pangingikil.

Maging ang ilang dayuhan ay ibinalot na rin sa plastic ang kanilang mga bag.

Kahapon ay apat pang pasahero ang nahulihan ng bala sa NAIA sa kabila ng ipinag-utos na imbestigasyon ng Malakanyang upang matigil na ang sinasabing extortion activities mga umano’y personnel ng NAIA.

By  Drew Nacino 

Apat pang pasahero ang nahaharap sa illegal possession of ammunition matapos mahulihan ng bala sa Ninoy Aquino International Airport (NAIA).

Kinilala ang 4 na sina Santiago Peñaflorida, 77-taon; Marilou Rose Espinola; Rowena Otic at Milagrosa Cadiente.

Gayunman, tanging ang anak na babae ni Peñaflorida ang nanindigang itinanim lamang ang bala sa bagahe.

Ayon sa Aviation Security Group-National Capital Region, ang nakatatandang Peñaflorida ay pasahero ng Philippine Airlines Flight patungong Los Angeles, sa America.

Dakong ala-6:00 kagabi nang harangin sa initial security screening checkpoint ng NAIA Terminal 2 ang Filipino-American matapos makita ng isang personnel ng DOTC-Office for Transportation Security sa x-ray scanner monitor ang tila isang bala sa kanyang naka-lock na backpack.

Dahil dito, inakusahan ng anak ng pasahero DOTC-OTS personnel na naglagay ng bala sa bag at iginiit na wala namang na-detect na ammunition nang dumaan ang bagahe sa Iloilo Airport.
New baggage handling procedure

Samantala, nagpatupad na ng bagong baggage handling procedures ang Department of Transportation and Communications sa Ninoy Aquino International Airport sa gitna ng umano’y tanim-bala modus.

Ayon kay Transportation and Communications Secretary Joseph Abaya, kasabay ng isinasagawang imbestigasyon ay nais nilang matiyak na masasawata ang tanim-bala modus kung mayroon man.

Sinimulan na anyang ilagay ng mga karagdagang closed circuit television camera sa mga screening stations at maglalagay din ng mas malalaking warning sign hinggil sa pagdadala ng ammunition.

Tiniyak din ni Abaya na nakatutok ang gobyerno partikular ang kagawaran sa sitwasyon.

By Drew Nacino