June 2026

Sinuspinde ng Sandiganbayan ang pinuno at 3 tauhan ng Quirino Memorial Medical Center o QMMC.

Batay sa 5 pahinang resousyon ng anti-graft court, hindi susuweldo sa loob ng 3 buwan si QMMC Chief Dr. Angeles de Leon, ang nurse na si Luz Padua, nutritionist dietician na si Milagrina Jacinto at medical technologist na si Michael Raquel.

Nag-ugat ang kasong graft na isinampa laban sa mga nabanggit dahil sa maanomalyang pagbili ng magnetic resonance imaging machine o MRI sa Fernando Medical Enterprises na nagkakahalaga ng halos P45 Million.

Paliwanag ng Sandiganbayan, layunin ng preventive suspension sa apat na hindi maimpluwensyahan ang isinasagawang imbestigasyon hinggil sa usapin

Dahil dito, dapat munang lisanin ng mga nabanggit ang kanilang pusisyon bilang proteksyon na rin sa mga ihaharap na testigo laban sa kanila.

By: Jaymark Dagala

Nagbanta ang Aduana Business Club na ikakasa pa rin nila ang malawakang kilos protesta sa darating na Lunes, Nobyembre 9.

Ito’y upang kalampagin ang pamahalaan sa kabiguan ng Bureau of Customs na gawing organisado at sistematikoa ng pagpasok ng mga truck sa mga pantalan sa kabila ng ipinatutupad na terminal appointment booking system.

Ayon kay Marie Zapata, pangulo ng Aduana Business Club, hindi aniya nakatutulong ang nasabing sistema dahil sa lalo lamang natetengga at naiipon ang mga ipinapasok at inilalabas na mga container vans sa pantalan.

Hindi rin tinupad ni Cabinet Secretary Jose Rene Almendras ang kaniyang pangako na magkakaroon ng exemption sa truck ban kapag ipinatupad ang nasabing sistema.

Gayunman, nilinaw ni Zapata na susunod pa rin sila sa ipatutupad na truck ban sa panahon ng Asia Pacific Economic Cooperation o APEC Summit ngayong buwan sa kabila ng kanilang pagbatikos sa pamahalaan.

By: Jaymark Dagala

Dinala na sa senado ang labi ng yumaong dating senador na si Ernesto Herrera.

Agad isinagawa sa session hall ang pagbibigay-pugay kay Herrera sa pamamagitan ng necrological services.

Dinaluhan ang nasabing aktibidad ng mga dati at kasalukuyang senador, pamilya, kaanak at malalapit na kaibigan.

Kinilala ang mga naging accomplishment ni Herrera sa senado tulad ng pagtataguyod sa karapatan ng mga manggagawa.

By  Jaymark Dagala | Cely Bueno (Patrol 19)

Arestado ang isang Fil-Am na pasahero na papaalis ng bansa matapos mahulihan ng baril sa loob ng Ninoy Aquino International Airport o NAIA Terminal 3.

Nahuli ang kalibre .22 na baril at 5 bala na pagmamay-ari ng isang Ramon Velasco – Loarca sa final x-ray ng paliparan pagkalagpas ng Immigration.

Sinasabing nakalusot ang baril at mga bala ni Loarca sa paunang x-ray na matatagpuan sa entrada ng NAIA Terminal 3 na inooperate ng Office of Transport Service o OTS.

Nangyari ang inisdente sa kainitan ng usapin ng laglag bala kung saan, nasabay pa ito habang nagsasagawa ng pulong balitaan ang mga opisyal ng Department of Transportation and Communications o DOTC.

By  Jaymark Dagala | Raoul Esperas (Patrol 45)

Hiniling ng isang hukom na may hawak sa kasong syndicated estafa ni real estate developer Delfin Lee na ilipat ito ng piitan.

Inihayag ito ni Pampanga RTC Branch 42 Amifaith Reyes makaraang makatanggap siya ng impormasyon na binibigyan umano ng special treatment si Lee sa kulungan nito sa Pampanga Provincial Jail.

Inihain ni Reyes ang kaniyang petisyon kay Pampanga RTC Executive Judge Divina Simbulan kung saan, hiniling nito na ilipat si Lee sa isang detention facility na hawak ng Bureau of Jail Management and Penology.

Dahil dito, agad ipinatawag ni Simbulan ang jail warden ng Pampanga Provincial Jail na si Edwin Mangaliman sa Nobyembre 9 para hingan ng paliwanag hinggil dito.

Tutol

Samantala, kinontra naman ng kampo ni Delfin Lee ang hirit ng hukom na humahawak kaniyang kasong syndicated estafa na ilipat siya sa ibang kulungan.

Ito’y makaraang maghain ng mosyon ang mga abogado ni Lee sa Office of the Court Administrator na humaharang sa petisyong inihain ni RTC Branch 42 Judge Amifaith Reyes.

Sa kaniyang mosyon, sinabi ni Lee na hindi magiging patas sa kaniya ang petisyon ng hukom dahil maihahalo siya sa halos 100 kriminal samantalang wala pa namang hatol laban sa kaniya.

Hindi rin aniya tama ang hirit na ito ng hukom dahil ibinase lamang sa sabi-sabi o tsismis ang ibinibintang na special treatment umano sa kanya sa Pampanga Provincial Jail.

By  Jaymark Dagala  

Nasasabik nang bumalik ang mga katutubong Lumad sa kani-kanilang mga tahanan at komunidad sa kabundukan ng Mindanao.

Ito’y makaraang magtungo ang may 700 katutubo sa Maynila upang ipanawagan sa pamahalaan na resolbahin na ang problema ng mga pag-atake sa kanila ng mga armadong grupo.

Ayon kay Renato Reyes, Secretary General ng Bagong Alyansang Makabayan o BAYAN, paraiso kung ituring ng mga Lumad ang kanilang mga tahanan.

Hindi aniya magawang bumalik ng mga Lumad hangga’t may presensya pa ng mga armadong grupo sa kanilang komunidad.

“Ilang buwan na po ang situation na ito, ilang buwan na po silang nasa evacuation centers na nanganganib sila na mag-Pasko sa evacuation centers, dahil hindi sila makakauwi dahil walang signs ang gobyerno na ititgil nila yung mga military operation.” Ani Reyes.

Binigyang diin ni Reyes na hindi naman makikita sa mga lansangan ng Maynila ang mga Lumad kung nakikinig lamang ang pamahalaan sa kanilang mga hinaing.

” Ang hinihiling lang nila paalisin yung military, ipatigil yung military operation para makabalik sila sa kanilang mga communities, at arestuhin yung mga perpetrators nung mga pumatay doon sa teacher at sa community leaders nila.” Pahayag ni Reyes.

By Jaymark Dagala | Karambola