June 2026

Nangangamba si Senador Bongbong Marcos na magamit sa darating na halalan ang bilyung-bilyong pondo na inilaan para sa mga sinalanta ng super bagyong Yolanda noong 2013.

Ito’y dahil sa patuloy na pagtanggi ng Department of Social Welfare and Development o DSWD na ilahad sa publiko kung saan napunta ang mga perang donasyon ng iba’t ibang bansa para sa mga sinalantang kalamidad.

Ayon kay Marcos, nakalulungkot aniyang malaman na bukod sa mga hindi nagagamit na pondo, may mga napapaulat na relief goods na hindi na mapakinabangan dahil sa na-expire na ang mag ito.

Binatikos din ng Senador ang mga pangakong pabahay para sa mga sinalanta ng bagyo dahil sa hindi pa rin ito nakikita ng nga residente makalipas ang dalawang taon mula nang sila’y salantain.

By Jaymark Dagala / Cely Bueno (Patrol 19)  

Nanganganib tumaas pa ang presyo ng sibuyas makaraang mapinsala ng husto ng bagyong Lando ang mga taniman ng nito sa hilaga at gitnang Luzon na siyang pinagkukunan ng suplay sa Kamaynilaan.

Ayon kay Leah Cruz, Pangulo ng Vegetables Importers Exporters and Vendors Association o VIEVA, siya na lamang ang may hawak ng malaking stock ng sibuyas na nasa mahigit 1.2 milyong sako o kabuuang 31.2 kilong sibuyas.

Binigyang diin ni Cruz na ang nasabing dami ng mga stock na sibuyas ay maaaring tumagal lamang ng hanggang ikatlong linggo ng buwang kasalukuyan o isang buwan bago mag-Pasko.

Kung hindi aniya magbibigay ng permit ang BPI sa mga trader ng sibuyas, posibleng sumirit ang presyo nito sa pamilihan dahil sa kontrolado na ng ilang negosyante ang suplay nito.

Sa kasalukuyan, ibinebenta ang kada kilo ng sibuyas sa halagang P70 hanggang P80 kumpara sa dating P40 hanggang P50 bago manalasa ang bagyong Lando.

By Jaymark Dagala / Aya Yupangco (Patrol 5) 

Tinaningan ni Justice Secretary Alfredo Benjamin Caguioa ang National Bureau of Investigation o NBI.

Kaugnay ito sa ginagawang imbestigasyon ng NBI hinggil sa tanim o laglag bala modus o talaba sa NAIA.

Kasunod nito, inatasan na rin ni Secretary Caguioa ang binuong special task force tanim-laglag bala o talaba na makipag-ugnayan sa mga ahensya ng pamahalaan para sa ginagawa nilang pagsisiyasat.

Dapat aniyang makapagpalabas ng report ang NBI special task force upang mapanagot ang mga pribado at pampublikong personalidad na mapatutunayang sangkot sa iligal na gawaing ito.

By Jaymark Dagala / Bert Mozo (Patrol 3)  

Naglagay na ng mga CCTV cameras ang Department of Transportation and Communications gayundin ang Office of Transport Service sa paligid ng Ninoy Aquino International Airport o NAIA.

Ayon kay Transportation Secretary Joseph Emilio Abaya, ito’y bilang bahagi pa rin ng kanilang precautionary measures laban sa tanim o laglag bala o talaba modus sa mga paliparan.

Sinabi ni Abaya, kanilang tututukan at hindi tatantanan ang mga naitatalang insidente ng tanim o laglag bala hanggang sa mapanagot ang mga nasa likod ng nasabing modus.

By Jaymark Dagala / Raoul Esperas (Patrol 45) 

Nagmartsa patungong Mendiola sa Maynila ang mga militanteng grupo bilang paggunita sa dapat sana’y ika-27 kaarawan ng pinaslang na transgender na si Jennifer Laude.

Nagtipun-tipon ang mga militante sa Morayta bitbit ang mga watawat at mga plakards na may larawan ni Laude.

Pagdating sa Mendiola, nag-alay ng kandila at panalangin ang mga militante gayundin ang mga tagasuporta ni Laude bilang pag-alala sa kaniyang naging buhay.

Ayon naman kay Atty. Virgie Suarez, abogado ng pamilya Laude, sisimulan din ngayong araw ang 44-day countdown bago ibaba ang hatol laban kay US Serviceman Lance Corporal Joseph Scott Pemberton sa susunod na buwan.

By  Jaymark Dagala / Aya Yupangco (Patrol 5) 

Hinamon ng isang mambabatas si Pangulong Noynoy Aquino na huwag magpaka-plastic at ipakita sa mundo ang tunay na kalagayan ng bansa.

Ito ang inihayag ni Gabriela Partylist Rep. Emmi de Jesus kasunod ng pangambang mawalis na naman sa lansangan ang mag palaboy at street vendors sa Metro Manila.

Sinabi ng mambabatas, tiyak na itatago na naman ng Department of Social Welfare and Development o DSWD ang mga mahihirap na pilipino lalo na iyong mga informal settler upang hindi makita ng iba’t ibang lider ng mga bansang lalahok sa APEC summit.

Una nang itinanggi ni DSWD Sec. Dinky Soliman na kanilang itatago o dadalhin sa malayo ang mga palaboy at maralita na nasa kalsada bagkus, titipunin ang mga ito para sa ilang aktibidad.

By: Jaymark Dagala

Isinasapinal na ng pamahalaan ang mga paghahanda para sa nalalapit na Asia Pacific Economic Cooperation o APEC summit na gagawin sa bansa ngayong buwan.

Pinulong ni Pangulong Noynoy Aquino ang kaniyang gabinete para plantsahin ang magiging preparasyon sa seguridad ng mga dadalong delegado mula sa iba’t ibang bansa at sa pagdaraos ng mismong summit.

Ayon kay Presidential Spokesman Edwin Lacierda, tinalakay sa nasabing pulong ang lahat ng APEC related activities dahil nais ng pangulo na maging maayos ang paghohost ng bansa.

Hindi pa rin masabi ni Lacierda kung magpapatupad ng no rally zone sa lungsod ng Maynila o sa iba pang bahagi ng metro manila bunsod na rin ng planong pagpapalawig ng grupo ng mga lumad sa kanilang pagkilos.

Sentro ng nasabing aktibidad ang World Trade Center kung saan magtitipun-tipon ang mga pinuno ng iba’t ibang bansa.

By: Jaymark Dagala

Kapwa nanindigan ang Armed Forces of the Philippines o AFP gayundin ang pambansang pulisya na kanilang paiiralin ang no ransom policy.

Ito’y kasunod ng panibagong video na nagpapakita sa mga biktima ng Samal kidnapping nuong Setyembre at nananawagan ng P4 Billion ransom kapalit ng kanilang kalayaan.

Sa pahayag nila Col. Restituto Padilla, Tagapagsalita ng AFP, at C/Supt. Wilben Mayor, Tagapagsalita ng PNP, wala silang planong makipag-negosasyon sa mga bandido na may hawak sa mga biktima.

Binigyang diin ng 2 opisyal na ang kaligtasan ng mga biktima ang kanilang pangunahing prayoridad sa ngayon kaya’t magtutuluy-tuloy ang kanilang operasyon para masagip ang mga ito.

Sinopla naman ng AFP ang ginagawang propaganda ng mga suspek at wala silang planong palakihin ito dahil sa malinaw ang ginagawa nilang pangingikil.

Kasalukuyan nang nakikipag-ugnayan ang isa’t isa para sauriin ang panibagong video na ipinalabas ng mga bandido.

By: Jaymark Dagala