June 2026

Nakatanggap ng pagbabanta sa pamamagitan ng tawag sa telepono ang Manila International Airport Authority o MIAA.

Sa inisyal na impormasyon, mismong ang tanggapan ng airport police sa NAIA Terminal 3 ang nakatanggap ng dalawang tawag.

Ang unang tawag ay naganap noong Sabado, Oktubre 31 at ang ikalawang tawag ay kahapon, pasado 12 ng tanghali.

Sa isinagawang international trace ng electronic communications ng MIAA, overseas call pa ang isa sa mga tawag.

Dahil sa insidente, nagpatupad na ng precautionary measure ang pamunuan ng MIAA at inalerto ang lahat ng kapulisan maging ang mga airport police na nakatalaga sa lahat ng paliparan.

Kasalukuyan pang bine-beripika kung kanino ang mga numerong lumabas.

By: Meann Tanbio I Raoul Esperas (patrol 45)

Kinansela na ng Land Transportation Franchising and Regulatory Board o LTFRB ang prangkisa ng taxi na nasangkot umano sa tanim bala modus.

Ito’y kahit pa itinanggi na ng driver ng vigil taxi na si Ricky Milagrosa ang akusasyon ng netizen na si Julius Neil Habana na nag-report ng insidente sa facebook.

Ayon kay LTFRB Chairman Winston Ginez, hindi pa rin ligtas si Milagrosa dahil isa pang kahalintulad na reklamo ang inihain laban sa kanya ni William Abellanosa, Chief Administrative Officer ng manpower agency, bilang kinatawan ni Vincent Anthony.

Sa salaysay ni Abellanosa, patungo na sa NAIA si Anthony mula Makati nang mabiktima rin ng driver alas-3:00 ng hapon noong October 29 subalit hindi na umano maalala ng tsuper kung naka-duty siya sa nasabing araw.

Samantala, ipinatawag na ng LTFRB ang mga complainant na sina Abellanosa at Habana para sa susunod na hearing sa November 10.

By  Drew Nacino 

Dapat ng itigil ng china ang militarisasyon sa ilang bahagi ng Spratly Islands.

Ito ang panawagan ni U.S. Secretary of Defense Ash Carter kay Chinese Defense Minister General Chang Wanquan sa Kuala Lumpur, Malaysia.

Ayon kay Carter, dapat din anyang itigil ng ibang claimant ang anumang reclamation at militarization activities sa mga pinag-aagawang teritoryo.

Muling iginiit ng U.S. official sa kanyang Chinese counter part na ipagpapatuloy ng Estados Unidos ang pagpapatrol ng mga barko nito sa Spratly bilang bahagi ng prinsipyo ng freedom of navigation.

Nasa Kuala Lumpur si Carter para sa ASEAN Defense Ministers Meeting at iba pang kaalyado nitong bansa.

By  Drew Nacino 

Ipatutupad na simula ngayong araw ang batas na nag-aatas sa mga tobacco company na maglagay ng graphic health warning sa mga cigarette pack.

Ayon kay New Vois Association of the Philippines President Emer rojas, inaasahan nilang tatalima ang mga tobacco manufacturers sa Republic Act 10643 na nangangahulugang iligal ang paglalabas ng mga produktong walang graphic warning.

Isang taon anya ang ibinigay ng Department of Health sa mga kumpanya upang mag-comply sa paglalagay ng template na inissue ng kagawaran noong November 4, 2014.

Kabilang sa template ang mga larawan ng mga taong na-stroke, nagkaroon ng emphysema, mouth cancer, throat cancer at iba pang sakit na dulot ng paninigarilyo upang hindi na ma-engganyo ang mga nagbibisyo na bumili at mabawasan ang mga nagkakasakit.

Ang mga picture warnings ay dapat nakalagay sa ibabang bahagi ng harap at likuran ng mga kaha ng sigarilyo habang ang karagdagang babala ay nasa ibabaw lamang ng pack.

By  Drew Nacino 

Apat (4) katao ang arestado matapos maaktuhang nag-iimprenta ng mga pekeng pera sa Binondo, Maynila.

Kinilala ang mga suspek na sina Ernani Cabaling, kapatid nitong si Edwin, girlfriend na si Nina Perez at Joel Celo.

Ayon kay Supt. Romeo Macapaz, Hepe ng Manila Police District Station 11, nasakote ang apat habang na sa isang kuwarto ng hotel.

Narekober anya sa mga suspek ang 87 piraso ng pekeng 1,000 peso bill, laptop, printer, ilang ink cartridges, sachet ng shabu at drug paraphernalia.

By Drew Nacino