Pinagpapaliwanag ng Land Transportation Office ang mahigit 200 driving school sa bansa dahil sa sinasabing pagpasa sa mga student driver nang hindi nakatutugon sa minimum requirement.
Ayon sa LTO, nag-isyu sila ng show-cause order sa mga driving school dahil sa ilang paglabag tulad ng labis na paglalabas ng ‘theoretical and practical driving course certificates’ at pagkakaloob ng kaparehong certificate kahit na hindi pa naabot ng mga aplikante ang bilang ng oras na kinakailangan.
May mga alegasyon din laban sa mga driving school kaugnay sa pag-tamper ng kanilang computer system para mapaunlakan ang mas maraming student driver na lagpas sa daily limit.
Bukod dito, pinagpapaliwanag din ang 88 district heads na sakop ang dalawandaang driving schools kung bakit pinahintulutan ang mga ito na gumawa ng paglabag at hindi pa ito naresolba.
