Isinailalim sa alcohol at drug testing ang 2 piloto ng nabalahaw na eroplano ng Jetstar Airways na biyaheng Japan sa runway ng Ninoy Aquino International Airport (NAIA).
Ayon kay Civil Aviation Authority of the Philippines (CAAP) Spokesperson Eric Apolonio, bahagi ito ng imbestigasyon para matukoy ang dahilan ng pag–over shoot ng Jetstar Airways airbus a-320 at pagbaon ng unahang gulong nito sa damuhang bahagi ng runway.
Dagdag ni Apolonio, nakuhanan na rin nila ng pahayag ang 2 piloto maliban pa sa narekober na recording ng pag-uusap ng mga ito habang nasa cockpit ng eroplano.
Nakuha na rin aniya ang nilalaman ng black box o flight data na dadalhin naman sa Singapore para ma-decode.
Magugunitang 8 oras na isinara ang runway 1331 ng NAIA kahapon, December 14, matapos mabalahaw ang eroplano ng Jetstar na naging dahilan naman ng pagkakaantala ng nasa 11 flights.