Iginiit ng pamunuan ng Grab Philippines na legal ang ipinataw nilang dagdag na 2 Pesos per minute travel charge sa kanilang mga pasahero.
Ayon kay Atty. Miguel Aquila , legal counsel ng Grab tama lang at walang over-charging sa kanilang pamasahe dahil mayruon aniya silang mga dokumento mula sa Department of Transportation na nagsasabing may kalayaan silang magpataw ng dagdag singil.
Nakahanda rin aniya ang Grab na tumalima sa anumang kautusan ng Land Transportation Franchising and Regulatory Board sakaling mapatunayan na sila ay nagmalabis sa ipinataw na pamasahe.
Sa susunod na linggo ay muling haharap sa pagdinig ng LTFRB ang pamunuan ng Grab Philippines para sagutin ang ilan pang mga reklamo na ipinarating ng publiko.
