Patay ang dalawang bata habang dalawa ang nasugatan sa pagsabog na naganap sa Kumalarang, Zamboanga del Sur kahapon.
Ayon sa Kumalarang Police Municipal Station, pinaglalaruan ng mga biktima ang isang tubo na bigla itong sumabog.
Agad na nasawi ang dalawang bata na edad walo at anim habang dinala sa Pagadian City Medical Hospital ang dalawang nasaktan.
Sinabi naman ni Brigadier General Leonel Nicolas, commander ng 102nd Infantry Brigade ng Philippine Army, na posibleng kagagawan ng mga terorista ang pagsabog.
Bagaman hindi pa makumpirma, nanawagan si Nicolas sa publiko na huwag magpakalat ng impormasyon na magdudulot ng takot.
Sa ngayon, inaalam na ng mga awtoridad kung anong uri ng pampasabog ang kumitil sa mga biktima.