Isang sundalo ang sugatan nang pagbabarilin ng mga miyembro umano ng New People’s Army ang mga tropa ng gobyernong tumutulong sa pagpapalikas dahil sa pag-aalburoto ng Mayon Volcano, sa Guinobatan, Albay.
Kinilala ang nasugatan na si Private First Class Gilmo Canuel ng 83rd Infantry Battalion.
Ayon kay Albay Provincial Police Spokesman, Chief Insp. Arthur Gomez, tinambangan ng apat na hinihinalang rebelde ang isang squad ng 83rd I.B. sa Barangay Malobago habang pabalik ang mga sundalo sa Doña Mercedes Patrol Base.
Tumagal anya ng apat na minuto ang engkuwentro bago tuluyang umatras ang mga sinasabing komunistang rebelde.
Hindi pa mabatid kung may nasugatan o namatay sa hanay ng mga rebelde.
