Tutol ang ilang mambabatas sa panukala ng Buhay partylist na ipagbawal na ang paglalabas ng resulta ng mga pre-election survey.
Giit kasi ng naturang partylist group, nagagamit ang mga survey para impluwensyahan ang mga botante.
Pero ayon sa political strategist at senador na si Serge Osmeña, malabong mangyari ito dahil sa paglabag sa freedom of speech and expression ang hindi paglalabas ng pre-election surveys.
Binigyang diin ni Osmeña na may naging desisyon na noon ang Korte Suprema na nagbabasura sa panukalang ipagbawal ang mga survey.
Samantala, sa pananaw naman ni presidential aspirant Senadora Miriam Defensor Santiago, hindi aniya kapani-paniwala ang resulta ng mga naglalabasang pre-election survey kung saan ay lagi itong kulelat sa hanay ng mga presidential candidate.
Giit ni Santiago, ginagamit lamang mga mapeperang kandidato at kanilang mga taga suporta ang survey upang ikondisyon ang isipan ng mga botante.
Kaya payo ni Santiago sa publiko, mag-ingat sa mga lumalabas na survey at huwag agad-agad paniwalaan ang resulta ng mga ito.
By Ralph Obina
