Nanindigan si dating Philippine Drug Enforcement Agency (PDEA) Director for Special Enforcement Services Col. Ferdinand Marcelino na lehitimo ang kanyang operasyon.
Ito’y makaraang maaresto si Marcelino kasama ang isang Chinese national sa isinagawang drug buy bust operation kahapon sa Sta. Cruz, Maynila.
Depensa ni Marcelino, naroon siya sa bahay ng Chinese national na si Yan Yu Shou upang berepikahin ang impormasyong ipinarating sa kaniya ng action agents ng PDEA.
Sa huli, iginiit ni Marcelino na mayroon siyang pinanghahawakang mission order at kaya umano niya itong patunayan.
Proof
Hinahamon ng PNP-Anti Illegal Drugs Group o PNP-AIDG si Col. Ferdinand Marcelino na maglabas ng matibay na ebidensya para patunayan ang kanyang depensa na legitimong operasyon ang nangyari nang mahuli siya sa raid ng AIDG at PDEA sa Sta. Cruz, Maynila.
Ayon kay PNP-AIDG Spokesman C/Insp Roque Merdegia, mahirap paniwalaan ang alegasyon ni Marcelino dahil unang una, hindi na siya miyembro ng PDEA at wala na siyang koneksyon sa anumang anti-drug agency.
Maliban dito, sinabi ni Merdegia na wala ring maipakitang mission order o authority si Marcelino para ipaliwanag ang kanyang presenya sa townhouse unit sa Celadon residences.
Paniwala ng AIDG, modus nina Marcelino na kumpiskahin ang mga umano’y luto nang shabu saka ito ibebenta.
Philippine Navy
Tiniyak ng Philippine Navy na siyang nakasasakop sa Philippine Marines na handa silang makipagtulungan sa anumang law enforcement agency na tumututok ngayon sa kaso ng kanilang kabarong si Col. Ferdinand Marcelino.
Ayon kay Philippine Navy Spokesman Col. Edgar Arevalo, hindi kinukunsinti ng kanilang hanay ang kinasasangkutang kaso ngayon ni Marcelino na kabilang sa dinampot sa drug raid sa isang shabu lab sa Maynila.
Handa aniya silang magbigay ng kakailanganing dokumento o anumang tulong sa gagawing imbestigasyon sa nasabing marine officer.
Nabatid mula kay Arevalo na si Marcelino ay kasalukuyang superintendent ng navy officer candidate school na naka-assign sa naval education and training command sa Zambales.
By Jaymark Dagala | Meann Tanbio | Jonathan Andal
