Susuriin ng House prosecution panel ang Philippine Government Electronic Procurement System o PhilGEPS records kaugnay sa mga kontrata ng Gencorp Industries na iniuugnay kay Vice President Sara Duterte at mister na si Atty. Mans Carpio.
Ayon kay House Prosecution Adviser at Spokesperson Robert Ace Barbers, handa na ang prosecution sa pagharap ng bagong testigo para sa Article 2 na tumutukoy sa unexplained wealth o hindi maipaliwanag na yaman ni VP Sara.
Aniya, isusunod nila sa witness stand si PhilGEPS witness Rendell Sopeña, ang procurement records ng Gencorp at City Hall sakaling matapos na ang cross-examination at kung magkakaroon pa redirect at recross-examination ngayong Day 28 ng impeachment trial.
Sinabi ni Barbers na bahagi ito ng kanilang pagsusuri sa business interests na idineklara ng Bise Presidente sa kanyang Statement of Assets, Liabilities, and Net Worth o SALN at sa posibleng conflict of interest sa mga transaksiyon ng kumpanya sa lokal na pamahalaan na pinamumunuan ng kanyang kapatid.
Para naman kay House Trial Spokesperson Zia Alonto Adiong, sakaling mapatunayang may na-award na kontrata o negosyo sa kumpanyang konektado sa mag-asawang Duterte-Carpio, maaari itong magbukas sa conflict of interest at posibleng undue advantage.
Sa ngayon aniya, sinisilip na ng prosecution ang ugnayan ng kumpanyang lumalahok sa bidding at ng lokal na pamahalaang nagsasagawa ng transaksiyon.
