Ipinauubaya na ng House prosecution panel sa Senate Impeachment Court ang desisyon kung isasalang sa witness stand si dating OVP Security Officer Raymund Dante Lachica.
Sa press conference, sinabi ni House Prosecution Legal Spokesperson Atty. Benjamin Tolosa Jr. na pinal na ang desisyon ng prosecution na huwag nang isama si Lachica sa kanilang presentasyon.
Ginawa ni Tolosa ang pahayag kasunod na rin ng mungkahi ng ilang senator-judges na ipatawag bilang testigo si Lachica upang mas maging malinaw at matukoy ang mga pangalang nakalagay sa acknowledgement receipts na tumanggap ng confidential funds sa ilalim ng OVP at DepEd.
Ayon kay Tolosa, hahayaan nila ang Senate Impeachment Court na magdesisyon sa usapin kung kailangan pang isalang si Lachica sa witness stand sakaling matapos na ang pagtalakay sa Articles of Impeachment.
Paliwanag ni Tolosa, posibleng walang maganap na direct at cross-examination kay Lachica dahil hindi naman hiniling ng prosecution sa Impeachment Court na ipa-subpoena ang security officer.
Sakali namang magdesisyon ang mga senator-judge na isalang si Lachica bilang testigo, tanging sila lamang ang magkakaroon ng pagkakataon na magsagawa ng clarificatory questions kay Lachica kaugnay sa Article 1 o maling paggamit ng confidential funds ni VP Sara. | Sa panulat ni Geli Mendez
