Nanindigan si Presidential Adviser for Entrepreneurship at Go Negosyo Founder Joey Concepcion na walang ipinatutupad na “no vaccine, no salary” policy sa pribadong sektor.
Ayon kay Concepcion, hindi maaaring gamitin ng mga employer ang vaccination status ng kanilang mga empleyado bilang palusot upang hindi pasuwelduhin ang mga ito.
Una nang isiniwalat ni Associated Labor Union -Trade Union Congress of the Philippines Spokesman Alan Tanjusay na may mga empleyado ng isang kumpanya sa Metro Manila ang lumapit sa kanila at isinumbong ang nasabing polisiya.
Inirekomenda naman ni Concepcion sa Department Of Labor and Employment na magpatupad ng polisiya para sa mga fully vaccinated na empleyado sa high-risk at labor-intensive business establishments upang maiwasan ang hawaan ng COVID-19.
Umaasa anya sila na magiging stable na ang supply ng bakuna upang maipatupad ng DOLE ang mandatory vaccination sa mga high-risk industry.—sa panulat ni Drew Nacino
