Hindi nakikita ni Philippine Coast Guard (PCG) spokesperson for the West Philippine Sea Jay Tarriela na may paglala o escalation sa mga insidente ng pangha-harass ng China Coast Guard sa mga barko ng Pilipinas sa West Philippine Sea.
Ayon kay Tarriela, matagal nang bahagi ng tinatawag na “gray zone activities” ng China ang paggamit ng water cannon at iba pang mapanghimasok na aksyon laban sa mga barko ng Pilipinas.
Gayunman, iginiit niyang hindi dapat ituring na normal ang mga ganitong insidente kahit matagal na itong nangyayari.
Aniya, patuloy itong inilalantad ng pamahalaan upang maipakita sa publiko at sa international community ang mga umano’y mapang-abusong kilos ng China sa loob ng exclusive economic zone (EEZ) ng Pilipinas.
Binanggit din niya na ang huling insidente ng paggamit ng water cannon bago ang pinakahuling pangyayari ay noong Disyembre 2025. Aniya, mas madalas ang mga katulad na insidente noong nakaraang taon, na halos buwan-buwan itong nangyayari.
Ayon kay Tarriela, may indikasyon na magkakaugnay ang mga nagdaang insidente, gaya rin ng naunang binanggit ni Defense Secretary Gilbert Teodoro. Kabilang dito ang isyu sa Batanes, pagkalat ng AI-generated video, pananakit sa isang Navy seaman, at ang paggamit ng water cannon laban sa mga barko ng Pilipinas sa Scarborough Shoal.
Aniya, bagama’t walang water cannon incident sa loob ng ilang buwan at sa tingin niya ay nagkunwaring “nice guy” ang China nitong mga nakalipas na buwan dahil batid nitong ang Pilipinas ang host ng ASEAN Summit, kapansin-pansin ang muling paggamit nito kasabay ng idinaraos na Association of Southeast Asian Nations (ASEAN) Foreign Ministers’ Meeting sa Pilipinas.
