Iginiit ng House prosecution panel na normal na bahagi ng impeachment trial ang clarificatory questions at interjections ng mga senator-judge.
Ito ang sinabi ni House Lead Prosecutor Gerville Luistro, matapos ang pagtatanong nina Senator-Judge Pia Cayetano tungkol sa isyu ng unnotarized document at Senator-Judge Robin Padilla kaugnay ng umano’y pagsisinungaling ng isang testigo.
Sa pulong balitaan, aminado si Luistro na pakiramdam niya ay napagkaitan siya ng pagkakataon dahil hindi niya naipaliwanag nang buo ang kanilang panig.
Para kay Luistro, hindi sapat ang simpleng pagsagot ng “yes” o “no” sa ilang tanong ng senator-judge.
Nilinaw rin niya na ang affidavit ni self-confessed Davao Death Squad member Arturo Lascañas ay hindi bahagi ng ebidensiya ng prosekusyon.
Aniya, ipinakita lamang ito upang ilahad ang naging takbo ng imbestigasyon ng National Bureau of Investigation o NBI.
Samantala, tinugunan din ni Luistro ang pahayag ni Senator-Judge Robin Padilla na hindi dapat maging one-sided ang prosekusyon.
Ayon sa lead prosecutor, adversarial ang impeachment proceedings, kung saan tungkulin ng prosekusyon na patunayan ang mga alegasyon habang responsibilidad ng depensa na ipagtanggol ang respondent na si Vice President Sara Duterte.
Aniya, mas magiging katawa-taka kung magiging neutral ang prosekusyon o ipagtatanggol ang respondent sa paglilitis.
