Itinuturing na malaking tagumpay ng House Prosecution Panel para sa mga Pilipino ang desisyon ng Senate Impeachment Court na ipa-subpoena ang tax records, financial records at mga bank records ni Vice President Sara Duterte.
Ayon kay House Prosecutor at Mamamayang Liberal Partylist Rep. Leila de Lima, ang pag-apruba ng impeachment court sa kahilingan ng kanilang panig ay hindi lamang panalo ng prosecution para sa katotohanan at pananagutan kundi para sa mamamayan na matagal nang naghahanap ng kasagutan.
Bukod pa dito, tagumpay rin ito ng Senate Impeachment Court dahil pinagtibay nito ang kapangyarihang ipinagkaloob ng Konstitusyon.
Malugod ding tinanggap ng prosekusyon ang desisyon na payagang makuha ang bank records ng bise presidente mula taong 2007 upang magsilbing “factual baseline” o batayan upang masubaybayan ang pag-ipon ng yaman ni VP Sara habang nasa serbisyo publiko.
Kinumpirma rin ni De Lima na saklaw din ng subpoena ang mga financial interest ng mister ni VP Sara na si Atty. Manases Carpio alinsunod sa umiiral na absolute community of property sa ilalim ng batas.
Ang naturang mga subpoena ay bahagi ng ebidensyang inihahain ng prosekusyon para sa Article II ng Articles of Impeachment, na nagsasaad ng alegasyon na si VP Sara ay nagkamal umano ng hindi maipaliwanag na yaman habang nanunungkulan sa gobyerno. | via Geli Mendez (Patrol 30)
