Suportado ng House prosecution panel ang panawagan sa Senate Impeachment Court ng mga grupo kabilang ang impeachment watchdog na bantay senado na payagan na ang pagpapa-subpoena sa tax at bank records ni Vice President Sara Duterte.
Ayon kay Prosecution legal spokesperon Atty. Benjamin Tolosa Jr., nararamdaman at sumasang-ayon sila sa panawagan at paniniwala ng mga grupo na napakahalaga na makita ng ating mga kababayan ang mga nilalaman ng mga dokumento at malaman ang kabuuang yaman ng bise presidente.
Ito aniya ang paraan para makita ang katotohanan kaugnay sa Article 2 o unexplained wealth ni VP Sara.
Aniya, mabigat at matibay ang mga batayang ginamit sa ilalim ng konstitusyon.
Para kay Tolosa napakalinaw ang basehan kung bakit dapat buksan ang BIR box dahil pinapayagan ang pagbubukas nito batay narin sa 1987 Constitution.
Ayon naman kay House impeachment spokesperson at Lanao Del Sur Rep. Zia Alonto Adiong, hindi maaaring paghiwalayin ang katotohanan at pananagutan.
Sinabi ni Adiong, na kung hindi masisilip ang tax at bank records ni VP Sara, mararamdaman lamang ng taumbayan ang dobleng pagtataksil sa kanila. | mula sa panulat ni Geli mendez
