Isinusulong sa Kamara ni Parañaque City 2nd District Rep. Brian Yamsuan ang House Bill 9476 na layong ma-institutionalize ang Mobile Legal Clinics (MLCs) at Barangay Legal Aid Desks (BLADs) sa buong bansa upang mas madali ang pag-access ng mga Pilipino sa libreng serbisyong legal.
Ayon kay Yamsuan, karapatan ng bawat Pilipino, kasama ang mga mahihirap at nakatira sa malalayong komunidad, na magkaroon ng libreng legal assistance desk sa bawat barangay, partikular sa malalayong komunidad.
Sinabi ni Yamsuan, marami pa rin sa ating mga kababayan ang hindi nabibigyan ng nararapat na serbisyo dahil malayo ang mga korte o abogado sa kanilang lugar, o kaya’y kakarampot at hindi sapat ang kanilang pera o kita.
Batay sa datos ng World Justice Project, 8 sa bawat 10 Pilipino ang walang access sa legal aid, at karamihan sa kanila ay mga overseas Filipino workers, persons with disabilities, maliliit na negosyante, at mga indigent clients.
Sakaling maging ganap na batas ang panukala, ang mga MLC ay itatatag at patatakbuhin ng Department of Justice at Public Attorney’s Office kung saan magkakaroon ng mga PAO lawyer, paralegals, accredited volunteer lawyers, law student interns, at legal aid volunteers.
Magkakaroon din ng mga nabanggit na legal professionals at personnel ang mga BLAD upang masuportahan ang mga MLC na mag-aalok ng legal consultation at payong legal; mediation at conciliation; tutulong sa paghahanda ng mga legal na dokumento gaya ng affidavits, kontrata, at simpleng pleadings.
Uubra rin sa mga MLC ang labor disputes; kaso sa mga lupa, pamilya, consumer protection; notaryo; at public education sessions. | via Geli Mendez (Patrol 30)
