Sinimulan na ng Technical Working Group ng House Committee on the Welfare of Children ang pagtalakay sa panukalang magkaroon ng regulasyon sa paggamit ng social media ng mga kabataan.
Kasunod ito ng inihaing House Bill 9965 nina House Speaker Faustino Dy III at House Majority Leader Sandro Marcos, matapos ang madugong insidente sa isang paaralan sa Tacloban na ikinasawi ng tatlong estudyante.
Sa ilalim ng panukala, ipagbabawal ang pagkakaroon ng social media accounts ng mga batang 13-anyos pababa at papayagan lamang ang mga edad 13 hanggang 17 na gumamit ng social media kung may beripikadong pahintulot at gabay ng kanilang mga magulang.
Ayon kay Speaker Dy, hindi sapat ang simpleng pagbabawal upang maprotektahan ang mga kabataan dahil mahalaga ring maturuan sila kung paano matukoy ang maling impormasyon at iba pang panganib sa internet.
Binigyang-diin din ng lider ng Kamara na hindi maaaring ipaubaya sa teknolohiya ang pagpapalaki sa mga anak dahil kailangan aniyang magtulungan ang mga magulang, guro, at pamahalaan upang matiyak ang isang ligtas na online environment para sa mga kabataan.
Iginiit pa ni Dy na hindi layunin ng panukala na ilayo ang mga bata sa teknolohiya, kundi para protektahan sila laban sa mga panganib sa digital world. | via Geli Mendez (Patrol 30)
