Naihatid na sa huling hantungan ang Grade 4 pupil na namatay matapos ang isang school-based deworming activity sa Trece Martires City, Cavite.
Patuloy namang nananawagan ng hustisya ang pamilya ng walong taong gulang na si Rex Mission habang nagpapatuloy ang sanib-pwersang imbestigasyon ng DepEd at NBI sa kanyang pagkamatay.
Nauna nang lumabas sa death certificate ng estudyante na central nervous system infection na humantong sa septic shock ang dahilan ng kanyang biglaang pagkamatay.
Nagsagawa na ng autopsy ang National Bureau of Investigation, at nilinaw ng mga otoridad na wala pang matibay na ebidensiyang direktang nag-uugnay sa albendazole sa pagkamatay ng bata.
Samantala, nilinaw ng lokal na pamahalaan ng Trece Martires na sinunod ng guro ang tamang proseso sa pagbibigay ng gamot at hindi expired ang ginamit sa pampapurga.
Hinihintay na lamang ng mga otoridad ang resulta ng autopsy upang makumpleto ang imbestigasyon.
