Hindi maitatanggi na sa tuwing nasasara ng telecommunications industry ang isang paraan na ginagamit ng mga scammer, naghahanap naman ang mga cybercriminal ng panibagong paraan upang makapanloko.
Habang patuloy na pinalalakas ng mga service provider ang kanilang proteksiyon laban sa pekeng SMS, mapanlinlang na link, at SIM-based fraud, patuloy rin ang pag-aangkop ng mga scammer sa kanilang mga taktika.
Dahil dito, ang paglaban sa digital fraud ay hindi na lamang isang beses na solusyon kundi isang tuloy-tuloy na proseso na nangangailangan ng patuloy na inobasyon at pagtutulungan.
“Scammers are constantly looking for new ways to reach potential victims. As the industry strengthens controls against one type of attack, we often see fraudsters shift to different tactics and platforms,” pahayag ni Garrett Silao, Chief Information Security Officer sa Globe. “This is why anti-scam efforts cannot rely on a single solution. It requires continuous innovation, collaboration, and public awareness.”
Sa mga nakalipas na taon, patuloy na pinalakas ng Globe ang depensa nito laban sa digital scams sa pamamagitan ng iba’t ibang hakbang tulad ng pag-secure sa enterprise sender IDs, pagharang sa mga mapaminsalang link, pagtukoy sa mga operasyon ng SIM box, at paggamit ng network analytics upang matukoy ang kahina-hinalang aktibidad.
Nakatulong ang mga hakbang na ito upang mabawasan ang mga karaniwang scam gamit ang SMS na dati nang tumatarget sa milyon-milyong mobile users.
Gayunman, habang nagiging mas mahirap isagawa ang tradisyunal na paraan ng panloloko, nagsisimula naman ang mga scammer na gumamit ng mas sopistikadong pamamaraan.
Isang halimbawa nito ang paggamit ng ilegal na IMSI Catchers o pekeng cell towers na nililinlang ang mga mobile device sa isang lugar upang kumonekta sa mga ito sa halip na sa lehitimong cellular network.
Hindi tulad ng pekeng SMS na karaniwang nagmumula sa messaging systems, sinasamantala ng IMSI catchers ang cellular networks sa pamamagitan ng pagpapalabas ng mas malakas na signal upangt awtomatikong kumonekta ang mga kalapit na cellphone at malampasan ang ilang security controls.
Bagama’t iba ang operasyon ng mga kagamitang ito kumpara sa karaniwang scam, ipinakikita nito ang mas malaking realidad na patuloy na binabago ng cybercriminals ang kanilang mga pamamaraan habang pinahuhusay naman ang mga panlaban sa seguridad.
Upang makasabay sa nagbabagong banta, gumagamit ang Globe ng multi-layered approach na pinagsasama ang networkt protection, threat intelligence, pakikipagtulungan sa industriya, at edukasyon sa mga customer.
Nakikipagtulungan ang kompanya sa mga enterprise partners upang mapanatiling ligtas ang lehitimong messaging channels, maagap na harangin ang mga kilalang phishing websites, at magbahagi ng impormasyon sa mga institusyong pinansiyal, ahensiya ng gobyerno, at law enforcement upang mas mabilis na matukoy at matugunan ang mga bagong banta.
Pinalawak din ng Globe ang mga hakbang nito para sa proteksiyon ng mga consumer hindi lamang sa teknikal na aspeto kundi pati sa pagpapataas ng kaalaman ng publiko.
Sa pamamagitan ng mga inisyatiba tulad ng Go Safe with Globe, Scam Shield sa GlobeOne app, customer advisories, at digital literacy campaigns, patuloy na tinutulungan ng kompanya ang mga Pilipino na makilala at maiwasan ang mga scam bago pa man magdulot ng pinsala.
“Technology plays a critical role in protecting customers, but awareness is equally important,” ani Silao. “The more informed people are about how scams work, the more difficult it becomes for fraudsters to succeed. Protecting consumers is a shared responsibility that requires industry, government, and the public to work together.”
Habang patuloy na nagiging mas sopistikado ang mga scam, patuloy namang namumuhunan ang Globe sa mas matibay na mga depensa at nakikipagtulungan sa mga katuwang mula sa pampubliko at pribadong sektor upang manatiling nangunguna laban sa mga bagong banta.
Hinimok ng kompanya ang mga customer na maging maingat sa pagtanggap ng mga hindi hinihinging mensahe, kahilingan para sa sensitibong impormasyon, o mga alok na nagdudulot ng maling pakiramdam ng pagmamadali
Pinayuhan din ang publiko na iulat ang anumang kahina-hinalang aktibidad sa pamamagitan ng mga opisyal na channel upang makatulong na maprotektahan ang iba laban sa pagiging biktima ng scam.
